Ёзги биатлон бўйича Ш.Камолов хотирасига бағишланган Қорақалпоғистон кубоги мусобақалари ўтказилди

Ўзбекистон Республикаси Президентининг “Ёшларни ватанпарварлик руҳида ва жисмоний етук инсонлар қилиб тарбиялаш ҳамда чақирилувчиларни ҳарбий-техник мутахассисликлар бўйича тайёрлаш тартибини такомиллаштириш бўйича қўшимча чора-тадбирлар тўғрисида”ги 2018 йил 12 декабрдаги 4061-сонли Қарори ижросини таъминлаш мақсадида Ўзбекистон Республикаси мудофаасига кўмаклашувчи “Ватанпарвар” ташкилоти Қорақалпоғистон Республикаси Кенгашининг 2023 йилги тақвимий режасига кўра, жорий йилнинг 3 март куни Амударё туман ўқув спорт-техника клубида ёзги биатлон бўйича Ш. Камолов хотирасига бағишланган Қорақалпоғистон кубоги спорт мусобақаси ўтказилди.

Мусобақада Ўзбекистон Республикаси Мудофаасига кўмаклашувчи “Ватанпарвар” ташкилоти Қорақалпоғистон Республикаси Кенгаши тасарруфидаги барча ўқув спорт-техника клубларидан жамоалар иштирок этди.

Мусобақа эрталаб соат 10-00да тантанали равишда очилди. Ўйин қоидасига кўра, майдонда барча жамоалар саф тортиб туришди. Тадбирни Ўзбекистон Республикаси мудофаасига кўмаклашувчи “Ватанпарвар” ташкилоти Қорақалпоғистон Республикаси Кенгаши раиси Қ.Разбеков очди ҳамда Қорақалпоғистон Республикаси Кенгаши раиси, ҲВ ва ЁБИ бўйича раис ўринбосари М.Шамуратов, Амударё туман ўқув спорт-техника клуби бошлиғи А.Исмаилов, Ёшлар ишлари агентлиги Амударё туман бўлими бошлиғи Сардор Исмаилов, шунингдек, ҳакам, Амударё тумани ўқув спорт-техника клуби мураббийи Н.Исмаиловлар спортчиларга омад тиладилар.

Мусобака шартига кўра, иштирок этаётган жамоаларнинг ҳар бир аъзоси 3000 метрга югуриши ва оралиқда бир марта тик турган ҳолатда, кейин айланани югуриб ўтиб, ётган ҳолатда ҳаво милтиғидан нишонларга ўқ отишни амалга оширдилар. Агарда берилган 5 та ўқдан нишонларга кам тегизилса, шунча марта югуриб, белгиланган жарима айланасини қўшимча равишда югуриб ўтишлари талаб этилди.

Мусобақа муросасиз курашларга бой тарзда, қизиқарли ўтди. Барча жамоалар ғолиблик учун ҳаракат қилдилар. Мусобақа якунида яхши натижалар кўрсатган жамоалар ғолиб ва совриндорлар қаторидан ўрин олдилар.  

Тадбирда ёзги биатлон спорт тури бўйича умум жамоа ҳисобида фаҳрли 1-ўрин Амударё туман ўқув спорт-техника клуби жамоасига насиб этди. 2-ўринни Тўрткўл тумани ўқув спорт-техника клуби ва 3-ўринни Беруний тумани ўқув спорт -техника клуби жамоалари эгалладилар.

Шунингдек, ўғил болалар ўртасида 1-ўрин Рашидбек Искандаровга, 2-ўрин Сардор Таженов, 3-ўринни эса Уснатдин Темирбековларга насиб этди.

Қиз болалар ўртасида фаҳрли 1-ўринни Мухлиса Тўлибоева, 2-ўринни Гавҳар Сатимбоева, 3-ўринни Дилноза Йўлдошовалар эгаллашди.

Мусобақа якунида ғолиб жамоа ва шахсий биринчиликка эришган спортчиларга ҳамкор ташкилотлар томонидан Дипломлар ва эсдалик совғалари топширилди. Ғолиб жамоалар шарафига Амударё тумани Маданият ва туризм бўлими санъаткорлари томонидан концерт дастури намойиш этилди.

Робия ЙЎЛДОШЕВА.