Yozgi biatlon boʻyicha Sh.Kamolov xotirasiga bagʻishlangan Qoraqalpogʻiston kubogi musobaqalari oʻtkazildi

Oʻzbekiston Respublikasi Prezidentining “Yoshlarni vatanparvarlik ruhida va jismoniy yetuk insonlar qilib tarbiyalash hamda chaqiriluvchilarni harbiy-texnik mutaxassisliklar boʻyicha tayyorlash tartibini takomillashtirish boʻyicha qoʻshimcha chora-tadbirlar toʻgʻrisida”gi 2018-yil 12-dekabrdagi 4061-sonli Qarori ijrosini taʼminlash maqsadida Oʻzbekiston Respublikasi mudofaasiga koʻmaklashuvchi “Vatanparvar” tashkiloti Qoraqalpogʻiston Respublikasi Kengashining 2023-yilgi taqvimiy rejasiga koʻra, joriy yilning 3-mart kuni Amudaryo tuman oʻquv sport-texnika klubida yozgi biatlon boʻyicha Sh. Kamolov xotirasiga bagʻishlangan Qoraqalpogʻiston kubogi sport musobaqasi oʻtkazildi.

Musobaqada Oʻzbekiston Respublikasi Mudofaasiga koʻmaklashuvchi “Vatanparvar” tashkiloti Qoraqalpogʻiston Respublikasi Kengashi tasarrufidagi barcha oʻquv sport-texnika klublaridan jamoalar ishtirok etdi.

Musobaqa ertalab soat 10-00da tantanali ravishda ochildi. Oʻyin qoidasiga koʻra, maydonda barcha jamoalar saf tortib turishdi. Tadbirni Oʻzbekiston Respublikasi mudofaasiga koʻmaklashuvchi “Vatanparvar” tashkiloti Qoraqalpogʻiston Respublikasi Kengashi raisi Q.Razbekov ochdi hamda Qoraqalpogʻiston Respublikasi Kengashi raisi, HV va YoBI boʻyicha rais oʻrinbosari M.Shamuratov, Amudaryo tuman oʻquv sport-texnika klubi boshligʻi A.Ismailov, Yoshlar ishlari agentligi Amudaryo tuman boʻlimi boshligʻi Sardor Ismailov, shuningdek, hakam, Amudaryo tumani oʻquv sport-texnika klubi murabbiyi N.Ismailovlar sportchilarga omad tiladilar.

Musobaka shartiga koʻra, ishtirok etayotgan jamoalarning har bir aʼzosi 3000 metrga yugurishi va oraliqda bir marta tik turgan holatda, keyin aylanani yugurib oʻtib, yotgan holatda havo miltigʻidan nishonlarga oʻq otishni amalga oshirdilar. Agarda berilgan 5 ta oʻqdan nishonlarga kam tegizilsa, shuncha marta yugurib, belgilangan jarima aylanasini qoʻshimcha ravishda yugurib oʻtishlari talab etildi.

Musobaqa murosasiz kurashlarga boy tarzda, qiziqarli oʻtdi. Barcha jamoalar gʻoliblik uchun harakat qildilar. Musobaqa yakunida yaxshi natijalar koʻrsatgan jamoalar gʻolib va sovrindorlar qatoridan oʻrin oldilar.  

Tadbirda yozgi biatlon sport turi boʻyicha umum jamoa hisobida fahrli 1-oʻrin Amudaryo tuman oʻquv sport-texnika klubi jamoasiga nasib etdi. 2-oʻrinni Toʻrtkoʻl tumani oʻquv sport-texnika klubi va 3-oʻrinni Beruniy tumani oʻquv sport -texnika klubi jamoalari egalladilar.

Shuningdek, oʻgʻil bolalar oʻrtasida 1-oʻrin Rashidbek Iskandarovga, 2-oʻrin Sardor Tajenov, 3-oʻrinni esa Usnatdin Temirbekovlarga nasib etdi.

Qiz bolalar oʻrtasida fahrli 1-oʻrinni Muxlisa Toʻliboyeva, 2-oʻrinni Gavhar Satimboyeva, 3-oʻrinni Dilnoza Yoʻldoshovalar egallashdi.

Musobaqa yakunida gʻolib jamoa va shaxsiy birinchilikka erishgan sportchilarga hamkor tashkilotlar tomonidan Diplomlar va esdalik sovgʻalari topshirildi. Gʻolib jamoalar sharafiga Amudaryo tumani Madaniyat va turizm boʻlimi sanʼatkorlari tomonidan kontsert dasturi namoyish etildi.

Robiya YOʻLDOShEVA.