ЧОРДАРА МАҲАЛЛАСИДА ХОТИН-ҚИЗЛАР ЎРТАСИДА МУСОБАҚАЛАР ЎТКАЗИЛДИ

Аёл-қизларни оммавий спортга кенг жалб этиш, улар ўртасида соғлом турмуш тарзини тарғиб этиш мақсадида овул ва маҳаллалардаги аёл-қизлар ўртасида Оила ва хотин-қизлар қўмитаси туман бўлими ва Спорт мактаби билан ҳамкорликда спорт мусобақалари ташкил этилди. Мусобақаларда барча маҳаллалардан 20-25 ёшдан юқори бўлган аёллар ва қизлар спортнинг стол тенниси, шахмат-шашка, волейбол, енгил атлетика, гимнастрада ва бошқа турлари бўйича беллашдилар.

7 март куни Чордара маҳалласида бўлиб ўтган мини футбол мусобақасининг очилиш маросимида туман Спорт мактаби директори Чоршам Тажимуродов, Ёшлар ишлари агентлиги туман бўлими бошлиғи Сардор Исмоилов ҳамда спорт мураббийлари, мактабларнинг жисмоний тарбия ўқитувчилари, фуқаролар йиғини масъуллари, хотин-қизлар фаоллари, ёшлар етакчилари қатнашишди.

Тадбирни Спорт мактаби директори Чоршам Тажимуродов очиб берди. У ўз сўзида бугунги кунда жамиятимизда ёшларни спорт ва жисмоний тарбияга қизиқтириш, кенг жалб этиш борасида амалга оширилаётган муҳим чора-тадбирларга кенг тўхталиб ўтди. шунингдек, Ёшларни соғлом ва бақувват қилиб вояга етказиш, улар ўртасида жисмоний тарбия ва спортни кенг тарғиб этиш мақсадида ўтказилаётган мусобақаларда юзлаб ёшлар фаол иштирок этаётгани, туманимиз шарафини муносиб ҳимоя қилиб, фахрли ўринларни қўлга киритишаётгани ҳақида сўзлаб ўтди.

Шундан сўнг бошлаб юборилган мусобақаларда овул ва маҳаллалардан ташриф буюрган ўсмир қизлардан ташкил топган 9 та жамоа иштирок этди.

Халқаро хотин-қизлар куни муносабати билан қолаверса, бешта муҳим ташаббус доирасида спорт ва соғломлаштириш ишлари самарадорлигини ошириш мақсадида хотин-қизлар ўртасида ташкил этилган ушбу мусобақалар қизғин ҳамда муросасиз баҳсларга бой бўлди. Мусобақалар давомида барча жамоалар ўзларининг абжирликларини кўрсатиб, ғолиблик учун ҳаракат қилишди.

Тўп суриш бўйича энг кучли ва маҳоратли деб топилган, кўп балл тўплашга эришган жамоалар мусобақанинг финал босқичига етиб келишди. Қизлар ўртасида мини-футбол бўйича ташкил этилган мусобақа ўз ниҳоясига етганидан сўнг, ҳакамлар ҳайъати томонидан ғолиблар аниқланиб, эълон қилинди.

Қизғин кечган ўйинлар давомида дарвозага энг кўп тўп киритишга муваффақ бўлган туман Спорт мактаби жамоасига фахрли 1-ўрин ғолиблиги насиб этди. Ушбу жамоа 3-5 март Хўжайли шаҳрида қизлар ўртасида Қорақалпоғистон Республикаси кубоги учун бўлиб ўтган футзал мусобақасида ҳам фахрли 1-ўринни эгаллаб, кубокни қўлга киритган эди. Уларни туман Спорт мактабининг тажрибали тренерлари мусобақаларга тайёрлаб, спортнинг ушбу тури бўйича маҳорат сирларини ўргатиб келмоқда.

Шунингдек, мусобақа давомида улардан ортда қолмасликка ҳаракат қилган 35-сонли мактаб жамоаси 2-ўрин, 41-сонли мактаб жамоаси эса 3-ўринга муносиб деб топилдилар.

Мусобақалар жуда қизғин ва кўтаринки руҳда ўтиб, барчага баҳорий кайфият бахш этди. Тадбир якунида ғолибларга диплом ва эсдалик совғалари топширилди.

О.Худойберганова.