ChORDARA MAHALLASIDA XOTIN-QIZLAR OʻRTASIDA MUSOBAQALAR OʻTKAZILDI

Ayol-qizlarni ommaviy sportga keng jalb etish, ular oʻrtasida sogʻlom turmush tarzini targʻib etish maqsadida ovul va mahallalardagi ayol-qizlar oʻrtasida Oila va xotin-qizlar qoʻmitasi tuman boʻlimi va Sport maktabi bilan hamkorlikda sport musobaqalari tashkil etildi. Musobaqalarda barcha mahallalardan 20-25 yoshdan yuqori boʻlgan ayollar va qizlar sportning stol tennisi, shaxmat-shashka, voleybol, yengil atletika, gimnastrada va boshqa turlari boʻyicha bellashdilar.

7-mart kuni Chordara mahallasida boʻlib oʻtgan mini futbol musobaqasining ochilish marosimida tuman Sport maktabi direktori Chorsham Tajimurodov, Yoshlar ishlari agentligi tuman boʻlimi boshligʻi Sardor Ismoilov hamda sport murabbiylari, maktablarning jismoniy tarbiya oʻqituvchilari, fuqarolar yigʻini masʼullari, xotin-qizlar faollari, yoshlar yetakchilari qatnashishdi.

Tadbirni Sport maktabi direktori Chorsham Tajimurodov ochib berdi. U oʻz soʻzida bugungi kunda jamiyatimizda yoshlarni sport va jismoniy tarbiyaga qiziqtirish, keng jalb etish borasida amalga oshirilayotgan muhim chora-tadbirlarga keng toʻxtalib oʻtdi. shuningdek, Yoshlarni sogʻlom va baquvvat qilib voyaga yetkazish, ular oʻrtasida jismoniy tarbiya va sportni keng targʻib etish maqsadida oʻtkazilayotgan musobaqalarda yuzlab yoshlar faol ishtirok etayotgani, tumanimiz sharafini munosib himoya qilib, faxrli oʻrinlarni qoʻlga kiritishayotgani haqida soʻzlab oʻtdi.

Shundan soʻng boshlab yuborilgan musobaqalarda ovul va mahallalardan tashrif buyurgan oʻsmir qizlardan tashkil topgan 9 ta jamoa ishtirok etdi.

Xalqaro xotin-qizlar kuni munosabati bilan qolaversa, beshta muhim tashabbus doirasida sport va sogʻlomlashtirish ishlari samaradorligini oshirish maqsadida xotin-qizlar oʻrtasida tashkil etilgan ushbu musobaqalar qizgʻin hamda murosasiz bahslarga boy boʻldi. Musobaqalar davomida barcha jamoalar oʻzlarining abjirliklarini koʻrsatib, gʻoliblik uchun harakat qilishdi.

Toʻp surish boʻyicha eng kuchli va mahoratli deb topilgan, koʻp ball toʻplashga erishgan jamoalar musobaqaning final bosqichiga yetib kelishdi. Qizlar oʻrtasida mini-futbol boʻyicha tashkil etilgan musobaqa oʻz nihoyasiga yetganidan soʻng, hakamlar hayʼati tomonidan gʻoliblar aniqlanib, eʼlon qilindi.

Qizgʻin kechgan oʻyinlar davomida darvozaga eng koʻp toʻp kiritishga muvaffaq boʻlgan tuman Sport maktabi jamoasiga faxrli 1-oʻrin gʻolibligi nasib etdi. Ushbu jamoa 3-5-mart Xoʻjayli shahrida qizlar oʻrtasida Qoraqalpogʻiston Respublikasi kubogi uchun boʻlib oʻtgan futzal musobaqasida ham faxrli 1-oʻrinni egallab, kubokni qoʻlga kiritgan edi. Ularni tuman Sport maktabining tajribali trenerlari musobaqalarga tayyorlab, sportning ushbu turi boʻyicha mahorat sirlarini oʻrgatib kelmoqda.

Shuningdek, musobaqa davomida ulardan ortda qolmaslikka harakat qilgan 35-sonli maktab jamoasi 2-oʻrin, 41-sonli maktab jamoasi esa 3-oʻringa munosib deb topildilar.

Musobaqalar juda qizgʻin va koʻtarinki ruhda oʻtib, barchaga bahoriy kayfiyat baxsh etdi. Tadbir yakunida gʻoliblarga diplom va esdalik sovgʻalari topshirildi.

O.Xudoyberganova.