36-СОНЛИ МАКТАБДА БАҲОР БАЙРАМЛАРИГА БАҒИШЛАНГАН ТАДБИРЛАР ЎТКАЗИЛДИ
Ўлкамизга баҳор фасли кириб келиши билан юртдошларимизда ҳам байрамона кайфият уйғониб, турли тадбирларни бошлаб юборишади. Дастлабки кундан атоқли шоира Зулфияхоним таваллуди, шундан сўнг, 8 март – Халқаро хотин-қизлар куни, сумалак сайллари, Наврўз байрамига бағишланган кечалар, шодиёналар ўтказилади.
Баҳор байрамлари муносабати билан 36-сонли мактабда ҳам катта тадбирлар ташкил этилди. Кўкламнинг илк кунидан шоира Зулфияхоним таваллудига бағишланган адабий кеча ўтказилиб, эҳтиром кўрсатилди. Кечада ўқувчи-қизлар атоқли шоиранинг шеърларидан парчалар ўқишди, баҳру-байтлар, мушоираларда қатнашишди ва барчага баҳорий кайфият, байрамона руҳ бағишлашди. Айниқса, 8 март – Халқаро хотин-қизлар куни арафасида мактабнинг бошланғич синфлари томонидан ташкил этилган мусиқий кечалар, сумалак сайллари юқори савияда ўтказилиб, барчага бирдек шодиёналар улашилди.
Мактабнинг фаоллар залида бошланғич синфлар ўқувчилари дастлаб “Она – мўътабар ва улуғ зот” деб номланган катта мусиқий дастурни намойиш этдилар. Тадбирга мактаб директорининг ўқув ишлари бўйича ўринбосари Сарвар Қутлимуродов, маънавий-маърифий масалалар бўйича ўринбосари Ваҳобжон Давлетов ҳамда бошланғич таълим ва бошқа фанлар ўқитувчилари, ўқувчилар ташриф буюришди.
Сўзга чиққанлар мактабда фаолият кўрсатаётган барча аёллар ва ўқувчи-қизларга ўзининг самимий байрам тилакларини изҳор қилиб ўтдилар. Шунингдек, ижтимоий-сиёсий ҳаёт ва жамиятимизни юксалтирувчи барча соҳаларда хотин-қизлар фаолияти муҳим аҳамият касб этаётгани, аёлларимизга таълим-тарбия ҳамда давлат бошқарувида ҳам катта ишонч билдирилаётганини, қизлар орасидан Тўмарис ва Барчинойлар, Зулфияхоним издошлари етишиб чиқаётганини алоҳида таъкидлашди.
Шундан сўнг, мактабнинг бошланғич синф ўқувчилари, “Ёш журналистлар” тўгараги аъзолари аъзолари онани, аёлни, дилбар қизларимизни улуғлови шеър ва қўшиқлар айтишди. Миллий ва хоразмча наволарга дилрабо рақслар ижро этиб, байрамга янада файз киритишди.
Байрам тадбирини мактабнинг бошланғич таълим ўқитувчиси Сарагул Юсупованинг 1-“А” синфи ўқувчилари ўзларининг байрамона рақслари, онажонларга бағишланган шеърлари билан давом эттиришди. Гуллар билан чиройли безатилган саҳнада жажжи ўқувчилар ажойиб шеърлар айтиб, байрамга ташриф буюрган оналарини табриклашди ва уларга гулдасталар ҳадя этиб, хушнуд этишди. Ўқувчилар ижросидаги “Тулпор”, “Онажонимга таъзим” деб номланган қўшиқ ва рақслар, она ҳақидаги шеърлар жуда манзур бўлди.
Шу куни мактабнинг юқори синф ўқувитувчи ва ўқувчилари томонидан сумалак сайли ҳам ташкил этилди. Мактабнинг она тили ва адабиёт фани ўқитувчиси Умида Жуманиёзова бошчилигида бўлиб ўтган сайилда ўқитувчилар билан бирга ўқувчилар ҳам фаол қатнашиб, дошқозонларни келтириш, ўтин тайёрлаш ва ёқиш, буғдой туйиш, сув ташиш кабиларни бажаришда кўмаклашишди. Мактаб жамоаси наврўзнинг шоҳ таомини аҳилликда, ҳамжиҳатликда тайёрлашди ва пишиб маромига етганидан сўнг, мактаб яқинидаги ҳовлиларга, ёши улуғлар ва бемор ётганларга улашишди.
Кўклам ана шундай эзгуликлар билан бошланиб, ўлкамизга ўзгача таровати ва нафосати билан кириб келмоқда. Бундай хайрли ишларда 36-сонли мактаб жамоаси, ўқувчилари ҳам иштирок этиб, барчага баҳорий кайфият бахш этишмоқда.
Озода Худойберганова, 36-сонли мактабнинг ижодий-маданий масалалар бўйича тарғиботчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
