36-SONLI MAKTABDA BAHOR BAYRAMLARIGA BAGʻIShLANGAN TADBIRLAR OʻTKAZILDI

Oʻlkamizga bahor fasli kirib kelishi bilan yurtdoshlarimizda ham bayramona kayfiyat uygʻonib, turli tadbirlarni boshlab yuborishadi. Dastlabki kundan atoqli shoira Zulfiyaxonim tavalludi, shundan soʻng, 8-mart – Xalqaro xotin-qizlar kuni, sumalak sayllari, Navroʻz bayramiga bagʻishlangan kechalar, shodiyonalar oʻtkaziladi.

Bahor bayramlari munosabati bilan 36-sonli maktabda ham katta tadbirlar tashkil etildi. Koʻklamning ilk kunidan shoira Zulfiyaxonim tavalludiga bagʻishlangan adabiy kecha oʻtkazilib, ehtirom koʻrsatildi. Kechada oʻquvchi-qizlar atoqli shoiraning sheʼrlaridan parchalar oʻqishdi, bahru-baytlar, mushoiralarda qatnashishdi va barchaga bahoriy kayfiyat, bayramona ruh bagʻishlashdi. Ayniqsa, 8-mart – Xalqaro xotin-qizlar kuni arafasida maktabning boshlangʻich sinflari tomonidan tashkil etilgan musiqiy kechalar, sumalak sayllari yuqori saviyada oʻtkazilib, barchaga birdek shodiyonalar ulashildi.

Maktabning faollar zalida boshlangʻich sinflar oʻquvchilari dastlab “Ona – moʻʼtabar va ulugʻ zot” deb nomlangan katta musiqiy dasturni namoyish etdilar. Tadbirga maktab direktorining oʻquv ishlari boʻyicha oʻrinbosari Sarvar Qutlimurodov, maʼnaviy-maʼrifiy masalalar boʻyicha oʻrinbosari Vahobjon Davletov hamda boshlangʻich taʼlim va boshqa fanlar oʻqituvchilari, oʻquvchilar tashrif buyurishdi.

Soʻzga chiqqanlar maktabda faoliyat koʻrsatayotgan barcha ayollar va oʻquvchi-qizlarga oʻzining samimiy bayram tilaklarini izhor qilib oʻtdilar. Shuningdek, ijtimoiy-siyosiy hayot va jamiyatimizni yuksaltiruvchi barcha sohalarda xotin-qizlar faoliyati muhim ahamiyat kasb etayotgani, ayollarimizga taʼlim-tarbiya hamda davlat boshqaruvida ham katta ishonch bildirilayotganini, qizlar orasidan Toʻmaris va Barchinoylar, Zulfiyaxonim izdoshlari yetishib chiqayotganini alohida taʼkidlashdi.

Shundan soʻng, maktabning boshlangʻich sinf oʻquvchilari, “Yosh jurnalistlar” toʻgaragi aʼzolari aʼzolari onani, ayolni, dilbar qizlarimizni ulugʻlovi sheʼr va qoʻshiqlar aytishdi. Milliy va xorazmcha navolarga dilrabo raqslar ijro etib, bayramga yanada fayz kiritishdi.

Bayram tadbirini maktabning boshlangʻich taʼlim oʻqituvchisi Saragul Yusupovaning 1-“A” sinfi oʻquvchilari oʻzlarining bayramona raqslari, onajonlarga bagʻishlangan sheʼrlari bilan davom ettirishdi. Gullar bilan chiroyli bezatilgan sahnada jajji oʻquvchilar ajoyib sheʼrlar aytib, bayramga tashrif buyurgan onalarini tabriklashdi va ularga guldastalar hadya etib, xushnud etishdi. Oʻquvchilar ijrosidagi “Tulpor”, “Onajonimga taʼzim” deb nomlangan qoʻshiq va raqslar, ona haqidagi sheʼrlar juda manzur boʻldi.

Shu kuni maktabning yuqori sinf oʻquvituvchi va oʻquvchilari tomonidan sumalak sayli ham tashkil etildi. Maktabning ona tili va adabiyot fani oʻqituvchisi Umida Jumaniyozova boshchiligida boʻlib oʻtgan sayilda oʻqituvchilar bilan birga oʻquvchilar ham faol qatnashib, doshqozonlarni keltirish, oʻtin tayyorlash va yoqish, bugʻdoy tuyish, suv tashish kabilarni bajarishda koʻmaklashishdi. Maktab jamoasi navroʻzning shoh taomini ahillikda, hamjihatlikda tayyorlashdi va pishib maromiga yetganidan soʻng, maktab yaqinidagi hovlilarga, yoshi ulugʻlar va bemor yotganlarga ulashishdi.

Koʻklam ana shunday ezguliklar bilan boshlanib, oʻlkamizga oʻzgacha tarovati va nafosati bilan kirib kelmoqda. Bunday xayrli ishlarda 36-sonli maktab jamoasi, oʻquvchilari ham ishtirok etib, barchaga bahoriy kayfiyat baxsh etishmoqda.

Ozoda Xudoyberganova, 36-sonli maktabning ijodiy-madaniy masalalar boʻyicha targʻibotchisi.