77-СОНЛИ МАКТАБДА "БАЛЛИ ҚИЗЛАР" КЎРИК-ТАНЛОВИ ЎТКАЗИЛДИ

Фасли навбаҳор кириб келиши билан юртимизда байрамлар бошланади. Баҳорни соғинган юртдошларимиз унинг ташрифидан қувончга тўлиб, ҳар бир кунни байрамга улайди. Айниқса, аёл-қизлар қадимий Наврўз байрамига тадорикни кўкламнинг илк кунидан бошлаб юборишади.

9 март куни Амударё туманидаги 77-сонли мактабда ўтказилган “Балли қизлар!” кўрик-танлови ҳам барчага баҳорий кайфият улашди. Баҳор байрамлари муносабати билан ўтказилган тадбирда мактаб ўқитувчи ва ўқувчилари иштирок этишди. Шунингдек, ўқувчиларнинг ота-оналари ҳам тадбир меҳмонлари бўлишди.

Тадбирда сўзга чиққанлар барчани кўклам ташрифи ва келаётган байрамлар билан табриклади. Шунингдек, мамлакатимиз Президенти аёл-қизларнинг жамиятдаги ўрни ва ролига юқори баҳо бериб, уларнинг манфаатларини ҳимоя қилиш, уларнинг билимдон, замонавий мутахассис, малакали касб эгалари бўлишлари давлатимиз ва жамиятимизнинг доимий эътиборидаги энг устувор вазифа эканлигига алоҳида эътибор қаратилаётганини таъкидлаб ўтишди.

Шундан сўнг, мактабнинг 10-синф ўқувчиси Севара Назарова, 9-синф ўқувчиси Мадина Собирова, 8-синф ўқувчиси Дилнура Тозабоева, 7-синф ўқувчиси Саодат Жумабоевалар иштирокидаги танлов бошланди. Кўрик-танловда иштирок этган ўқувчи-қизлар дастлабки шартга кўра ўзларини таништириб, саломлашиш одобини кўрсатишди. Иккинчи шартга кўра Бешта муҳим ташаббус йўналишларини изоҳлаб, билимдонликларини намойиш этишди. Сўнгра баҳорий сабзавотлардан салатлар тайёрлаб, пазандалигини, чаққонлигини кўрсатишга ҳаракат қилишди. Кейинги шартга кўра Она ҳақидаги шеърларни ифодали айтиб беришди. Эркин мавзу деб номланган охирги шарт бўйича эса ўзлари севган ва танлаган касби ҳақидаги тушунчалари, орзу-истакларини томошабинларга саҳна кўринишлари, қўшиқ ва рақслар орқали чиройли тарзда етказиб бердилар.

Тадбир давомида мактабнинг 3-4-синф ўқувчилари баҳор, она, аёл ҳақидаги шеър ва қўшиқлар, рақслар ижро этиб, барчага кўтаринки кайфият улашишди.

Чаққон қизларжоннинг ҳар бир шартга кўра чиқишларини Бўз ёп овул фуқаролар йиғини хотин-қизлар фаоли Гулзода Кўбаева, мактабнинг бошланғич синф ўқитувчилари Эркиной Тажибоева, Ёрқиной Эрбоева, мактаби психологи Раиса Ибодуллаевалардан иборат ҳакамлар ҳайъати ҳаққоний баҳолаб боришди. Танлов якунида 7-синф ўқувчиси Саодат Жумабоева фахрли 1 -ўринни эгаллади. Шу жумладан, 9-синф ўқувчиси Мадина Собирова, 8-синф ўқувчиси Дилнура Тозабоевалар 2-ўрин, 10-синф ўқувчиси Севара Назарова эса 3-ўринни эгалладилар. 

Тадбир сўнгида мактаб директори Шавкат Тўраев иштирокчиларни ютуқлари билан табриклади ва уларни мактаб маъмурияти томонидан тайёрланган совғалар ва диплом билан тақдирлади. Мактабнинг маънавий-маърифий ишлар бўйича директор ўринбосари Муҳаббат Манғитова ҳам ўз тилакларини билдириб, иштирокчиларни табриклади. Тадбирда ўз чиқишлари билан қатнашган ўқувчиларни фаоллиги учун фахрий ёрлиқлар билан тақдирлади. Шунингдек, фуқаролар йиғини хотин-қизлар фаоли Гулзода Кўбаева ҳам сўзга чиқиб, тадбир ҳақида ўз фикрларини билдирди.

Баҳор байрамлари муносабати билан ҳамда қизларни миллий қадриятларга ҳурмат, юксак одоб-ахлоқ тамойиллари асосида тарбиялаш, уларнинг онги ва қалбини турли ёт ғоявий таҳдидлардан ҳимоя қилиш мақсадида ташкил этилган ушбу тадбир барчага бирдек манзур бўлди.

Озода Худойберганова.