77-SONLI MAKTABDA "BALLI QIZLAR" KOʻRIK-TANLOVI OʻTKAZILDI

Fasli navbahor kirib kelishi bilan yurtimizda bayramlar boshlanadi. Bahorni sogʻingan yurtdoshlarimiz uning tashrifidan quvonchga toʻlib, har bir kunni bayramga ulaydi. Ayniqsa, ayol-qizlar qadimiy Navroʻz bayramiga tadorikni koʻklamning ilk kunidan boshlab yuborishadi.

9-mart kuni Amudaryo tumanidagi 77-sonli maktabda oʻtkazilgan “Balli qizlar!” koʻrik-tanlovi ham barchaga bahoriy kayfiyat ulashdi. Bahor bayramlari munosabati bilan oʻtkazilgan tadbirda maktab oʻqituvchi va oʻquvchilari ishtirok etishdi. Shuningdek, oʻquvchilarning ota-onalari ham tadbir mehmonlari boʻlishdi.

Tadbirda soʻzga chiqqanlar barchani koʻklam tashrifi va kelayotgan bayramlar bilan tabrikladi. Shuningdek, mamlakatimiz Prezidenti ayol-qizlarning jamiyatdagi oʻrni va roliga yuqori baho berib, ularning manfaatlarini himoya qilish, ularning bilimdon, zamonaviy mutaxassis, malakali kasb egalari boʻlishlari davlatimiz va jamiyatimizning doimiy eʼtiboridagi eng ustuvor vazifa ekanligiga alohida eʼtibor qaratilayotganini taʼkidlab oʻtishdi.

Shundan soʻng, maktabning 10-sinf oʻquvchisi Sevara Nazarova, 9-sinf oʻquvchisi Madina Sobirova, 8-sinf oʻquvchisi Dilnura Tozaboyeva, 7-sinf oʻquvchisi Saodat Jumaboyevalar ishtirokidagi tanlov boshlandi. Koʻrik-tanlovda ishtirok etgan oʻquvchi-qizlar dastlabki shartga koʻra oʻzlarini tanishtirib, salomlashish odobini koʻrsatishdi. Ikkinchi shartga koʻra Beshta muhim tashabbus yoʻnalishlarini izohlab, bilimdonliklarini namoyish etishdi. Soʻngra bahoriy sabzavotlardan salatlar tayyorlab, pazandaligini, chaqqonligini koʻrsatishga harakat qilishdi. Keyingi shartga koʻra Ona haqidagi sheʼrlarni ifodali aytib berishdi. Erkin mavzu deb nomlangan oxirgi shart boʻyicha esa oʻzlari sevgan va tanlagan kasbi haqidagi tushunchalari, orzu-istaklarini tomoshabinlarga sahna koʻrinishlari, qoʻshiq va raqslar orqali chiroyli tarzda yetkazib berdilar.

Tadbir davomida maktabning 3-4-sinf oʻquvchilari bahor, ona, ayol haqidagi sheʼr va qoʻshiqlar, raqslar ijro etib, barchaga koʻtarinki kayfiyat ulashishdi.

Chaqqon qizlarjonning har bir shartga koʻra chiqishlarini Boʻz yop ovul fuqarolar yigʻini xotin-qizlar faoli Gulzoda Koʻbayeva, maktabning boshlangʻich sinf oʻqituvchilari Erkinoy Tajiboyeva, Yorqinoy Erboyeva, maktabi psixologi Raisa Ibodullayevalardan iborat hakamlar hayʼati haqqoniy baholab borishdi. Tanlov yakunida 7-sinf oʻquvchisi Saodat Jumaboyeva faxrli 1 -oʻrinni egalladi. Shu jumladan, 9-sinf oʻquvchisi Madina Sobirova, 8-sinf oʻquvchisi Dilnura Tozaboyevalar 2-oʻrin, 10-sinf oʻquvchisi Sevara Nazarova esa 3-oʻrinni egalladilar. 

Tadbir soʻngida maktab direktori Shavkat Toʻrayev ishtirokchilarni yutuqlari bilan tabrikladi va ularni maktab maʼmuriyati tomonidan tayyorlangan sovgʻalar va diplom bilan taqdirladi. Maktabning maʼnaviy-maʼrifiy ishlar boʻyicha direktor oʻrinbosari Muhabbat Mangʻitova ham oʻz tilaklarini bildirib, ishtirokchilarni tabrikladi. Tadbirda oʻz chiqishlari bilan qatnashgan oʻquvchilarni faolligi uchun faxriy yorliqlar bilan taqdirladi. Shuningdek, fuqarolar yigʻini xotin-qizlar faoli Gulzoda Koʻbayeva ham soʻzga chiqib, tadbir haqida oʻz fikrlarini bildirdi.

Bahor bayramlari munosabati bilan hamda qizlarni milliy qadriyatlarga hurmat, yuksak odob-axloq tamoyillari asosida tarbiyalash, ularning ongi va qalbini turli yot gʻoyaviy tahdidlardan himoya qilish maqsadida tashkil etilgan ushbu tadbir barchaga birdek manzur boʻldi.

Ozoda Xudoyberganova.