БУТУНЖАҲОН СИЛГА ҚАРШИ КУРАШ КУНИГА БАҒИШЛАНГАН ТАДБИР БЎЛИБ ЎТДИ

Сил (туберкулёз) инсониятга қадимдан маълум касаллик бўлса-да, шу кунгача ҳам дунё аҳолиси бу дарддан бутунлай халос бўла олмади. Аксинча айни кунда ҳам турли ёшдаги одамлар, ёшлар орасида тобора кўпаяётгани қайд этилмоқда.

Ер юзида энг кўп тарқалган юқумли ва сурункали ушбу касалликнинг юқиш йўли – касаллик таёқчаларининг организмга тушишидир. Сил таёқчаси аввал ўпкани зарарлайди. Айрим ҳолларда мия, мия қобиғи, суяк, бўғин, кўз ичак ва бошқа аъзолар сили ҳам учраб туради.

Шуни алоҳида эҳтироф этиш жоизки, юртимиз замонавий тиббиёти аксарият сил касалликларини даволаш имкониятига эга. Агар касалликни аниқлаш даволаш тўғри, қатъий назорат остида ва мунтазам олиб борилса, бемор албатта, соғайиб кетади.

Силга чалинган одамларда биринчи галда йўтал, кейинчалик тез чарчаш, қувватсизлик, кўкрак қафасда оғриқ, иштаҳа пасайиши, озиб кетиш ҳолатлари пайдо бўлади. Агар кимдир икки ҳафтадан ортиқ йўталса, дарҳол тиббий муассасага мурожаат қилиши, чуқур текширувлардан ўтиши лозим.

Афсуски, одамларнинг ўз соғлиқларига бепарволиги ёки сил касаллигига чалинганини билса ҳам ўз вақтида қатъий назорат остида даволанмаслиги, ўз билганича турли дориларни қабул қилиши, ўз касаллигини бошқаларда беркитишга уриниши баъзан салбий оқибатларга олиб келади.

Ана шундай кўнгилсизликларни олдини олиш мақсадида туманимизда аҳоли орасида тушунтириш-тарғибот масалалари тез-тез ўтказилмоқда.

Шундай тадбирлардан бири жорий йилнинг 24 куни Манғит деҳқон бозорида ўтказилди. Унда туман Тиббиёт бирлашмаси шифокорлари Матёқуб Эрназаров, Гулора Абдуллаева, Тамара Саидова, “Чегарасиз шифокорлар” ташкилоти ходими Турсуной Султонбоевалар қатнашдилар.

Очиқ мулоқот тарзида “Бутунжаҳон силга қарши кураш куни” муносабати билан ўтказилган тадбирда Деҳқон бозорда фаолият юритувчи, шунингдек рўзғори харажатлари учун бозорга ташриф буюрган аҳоли вакиллари иштирок этдилар.

“Чегарасиз шифокорлар” ташкилоти ходими Турсуной Султонбоева йиғилганларга 1982 йилдан бошлаб “24 март – Халқаро силга қарши кураш куни” деб эълон қилинганилиги, Жаҳон Соғлиқни Сақлаш ташкилоти бу кунни алоҳида нишонлаш орқали фуқароларни касалликка доир, унинг юқишидан огоҳ этиш, сақланиш чоралари ҳақида маълумотларни кенг оммага етказиш мақсад қилганини батафсил тушунтирди. Шунингдек, туман Тиббиёт бирлашмаси шифокорлари туманимизда ушбу касаллик профилактикаси, даволаш йўллари, силга чалинганларни соғломлаштириш мақсадида ҳукуматимиз кўрсатаётган ғамхўрликлар ҳақида маъруза қилдилар.

Аҳолининг соғлом турмуш тарзи, сил касаллиги ҳақидаги билимларини синовдан ўтказиш мақсадида савол-жавоблар ўтказилди ва бу борадаги саволларга аниқ, тўлиқ жавоб берганлар рағбатлантирилди.

Йиғилганлар сил касаллигидан ҳимояланиш, соғлом овқатланиш, оилада санитария-гигиена қоидаларига риоя қилинишининг аҳамияти хусусидаги маърузаларни ҳам қизиқиб тингладилар ва шифокорларга ўзларини қизиқтирган саволларни бериб, батафсил жавоблар олдилар.

Маълумот учун: Ўзбекистонда ДОТС дастурига мувофиқ силга қарши шифохоналар бепул дори-дармонлар билан таъминланган, ҳозирги замонавий тиббиёт бу юқумли касалликни енгиш имконига эга.

О.РАЖАБОВА.