BUTUNJAHON SILGA QARShI KURASh KUNIGA BAGʻIShLANGAN TADBIR BOʻLIB OʻTDI

Sil (tuberkulyoz) insoniyatga qadimdan maʼlum kasallik boʻlsa-da, shu kungacha ham dunyo aholisi bu darddan butunlay xalos boʻla olmadi. Aksincha ayni kunda ham turli yoshdagi odamlar, yoshlar orasida tobora koʻpayayotgani qayd etilmoqda.

Yer yuzida eng koʻp tarqalgan yuqumli va surunkali ushbu kasallikning yuqish yoʻli – kasallik tayoqchalarining organizmga tushishidir. Sil tayoqchasi avval oʻpkani zararlaydi. Ayrim hollarda miya, miya qobigʻi, suyak, boʻgʻin, koʻz ichak va boshqa aʼzolar sili ham uchrab turadi.

Shuni alohida ehtirof etish joizki, yurtimiz zamonaviy tibbiyoti aksariyat sil kasalliklarini davolash imkoniyatiga ega. Agar kasallikni aniqlash davolash toʻgʻri, qatʼiy nazorat ostida va muntazam olib borilsa, bemor albatta, sogʻayib ketadi.

Silga chalingan odamlarda birinchi galda yoʻtal, keyinchalik tez charchash, quvvatsizlik, koʻkrak qafasda ogʻriq, ishtaha pasayishi, ozib ketish holatlari paydo boʻladi. Agar kimdir ikki haftadan ortiq yoʻtalsa, darhol tibbiy muassasaga murojaat qilishi, chuqur tekshiruvlardan oʻtishi lozim.

Afsuski, odamlarning oʻz sogʻliqlariga beparvoligi yoki sil kasalligiga chalinganini bilsa ham oʻz vaqtida qatʼiy nazorat ostida davolanmasligi, oʻz bilganicha turli dorilarni qabul qilishi, oʻz kasalligini boshqalarda berkitishga urinishi baʼzan salbiy oqibatlarga olib keladi.

Ana shunday koʻngilsizliklarni oldini olish maqsadida tumanimizda aholi orasida tushuntirish-targʻibot masalalari tez-tez oʻtkazilmoqda.

Shunday tadbirlardan biri joriy yilning 24 kuni Mangʻit dehqon bozorida oʻtkazildi. Unda tuman Tibbiyot birlashmasi shifokorlari Matyoqub Ernazarov, Gulora Abdullayeva, Tamara Saidova, “Chegarasiz shifokorlar” tashkiloti xodimi Tursunoy Sultonboyevalar qatnashdilar.

Ochiq muloqot tarzida “Butunjahon silga qarshi kurash kuni” munosabati bilan oʻtkazilgan tadbirda Dehqon bozorda faoliyat yurituvchi, shuningdek roʻzgʻori xarajatlari uchun bozorga tashrif buyurgan aholi vakillari ishtirok etdilar.

“Chegarasiz shifokorlar” tashkiloti xodimi Tursunoy Sultonboyeva yigʻilganlarga 1982-yildan boshlab “24-mart – Xalqaro silga qarshi kurash kuni” deb eʼlon qilinganiligi, Jahon Sogʻliqni Saqlash tashkiloti bu kunni alohida nishonlash orqali fuqarolarni kasallikka doir, uning yuqishidan ogoh etish, saqlanish choralari haqida maʼlumotlarni keng ommaga yetkazish maqsad qilganini batafsil tushuntirdi. Shuningdek, tuman Tibbiyot birlashmasi shifokorlari tumanimizda ushbu kasallik profilaktikasi, davolash yoʻllari, silga chalinganlarni sogʻlomlashtirish maqsadida hukumatimiz koʻrsatayotgan gʻamxoʻrliklar haqida maʼruza qildilar.

Aholining sogʻlom turmush tarzi, sil kasalligi haqidagi bilimlarini sinovdan oʻtkazish maqsadida savol-javoblar oʻtkazildi va bu boradagi savollarga aniq, toʻliq javob berganlar ragʻbatlantirildi.

Yigʻilganlar sil kasalligidan himoyalanish, sogʻlom ovqatlanish, oilada sanitariya-gigiyena qoidalariga rioya qilinishining ahamiyati xususidagi maʼruzalarni ham qiziqib tingladilar va shifokorlarga oʻzlarini qiziqtirgan savollarni berib, batafsil javoblar oldilar.

Maʼlumot uchun: Oʻzbekistonda DOTS dasturiga muvofiq silga qarshi shifoxonalar bepul dori-darmonlar bilan taʼminlangan, hozirgi zamonaviy tibbiyot bu yuqumli kasallikni yengish imkoniga ega.

O.RAJABOVA.