Амударё тумани ҳокими С.Йўлдашевнинг Қорақалпоғистон Республикаси Конституциясининг 30 йиллиги муносабати билан байрам табриги

Қадрли юртдошлар!

Аввало, Cиз, азизларни, Сизлар орқали кўпмиллатли халқимизни Қорақалпоғистон Республикаси Конституцияси қабул қилинганининг 30 йиллиги билан чин қалбимдан самимий муборакбод этаман.

Бундан 30 йил муқаддам – 1993 йил 9 апрель куни Қорақалпоғистон Республикаси Олий Кенгаши томонидан Республикамиз фуқароларининг муносиб ҳаёт кечиришларини таъминлаш, инсонпарвар демократик ҳуқуқий давлат барпо этиш, фуқаролар тинчлиги ва миллий тотувлигини таъминлаш мақсадида Қорақалпоғистон Республикасининг Конституцияси қабул қилинган эди.

Конституциямиз мустақиллик йилларида эришган барча ютуқ ва марраларимизнинг мустаҳкам ҳуқуқий пойдевори, халқимиз эркин ва фаровон турмуш кечиришининг қонуний кафолати бўлиб хизмат қилиб келмоқда.

Қорақалпоғистон Республикаси Конституциясида инсон-нинг ижтимоий ҳуқуқларига катта эътибор қаратган бўлиб, меҳнат қилиш, эркин касб танлаш, адолатли шароитларида ишлаш, ишсизликдан ҳимояланиш, ижтимоий таъминот олиш каби ҳуқуқлар конституциявий даражада эътироф этилган.

Азиз дўстлар!

Хабарингиз бор, халқимиз ҳаётини янада обод ва фаровон қилиш, юртимизда яшаётган миллати, тили ва динидан қатъий назар ҳар бир инсонга эътибор ва ғамхўрлик кўрсатиш мақсадида Ўзбекистон Республикаси Конститу-циясига қўшимча ва ўзгартиришлар киритилмоқда.

Янгиланаётган Конституциямизда Ўзбекистон – ижтимоий давлат деб белгиланмоқда. Бу – инсонга эътибор ва ғамхўрлик, деганидир. Давлатнинг ижтимоий соҳадаги мажбуриятлари билан боғлиқ Конституциядаги нормалар 3 баробарга кўпайтирилмоқда.

Қорақалпоғистон Республикаси аҳолисининг барча таклифлар ҳамда ҳудуднинг ўзига хос этник, маданий хусусиятлари, миллий урф-одат ва қадриятлари, алоҳида ҳуқуқий мақомини эътиборга олган ҳолда янгиланаётган Конституцияда Қорақалпоғистоннинг давлат тузилиши ва сиёсий тизими билан боғлиқ моддалар ўзгаришсиз қолдирилмоқда.

Фурсатдан фойдаланиб, барча юртдошларимизни 30 апрель куни бўлиб ўтадиган Референдумда фаол иштирок этиб, Янги Ўзбекистоннинг янгиланаётган Конституцияси учун овоз беришга чақираман.

Сабаби, мамлакатимизни ислоҳ этиш ва демократлаштириш, инсон қадрини улуғлаш, халқимиз учун энг олий неъмат – тинчлик ва осойишталикнинг, тараққиёт ва фаровонликнинг бардавом бўлишида Конституциямиз мустаҳкам пойдевор вазифасини ўташи шубҳасиз.

Азиз ва муҳтарам юртдошлар!

Сизларни яна бир бора Қорақалпоғистон Республикаси Конституцияси қабул қилинганининг 30 йиллик шодиёнаси билан чин қалбимдан табриклаб, барчангизга сиҳат-саломатлик, хонадонларингизга тинчлик-хотиржамлик, файзу барака тилайман!