“ВАТАНПАРВАР” ҲАРБИЙ СПОРТ МУСОБАҚАСИ ҒОЛИБЛАРИ ТАҚДИРЛАНДИ

Глобаллашув жараёни шиддат билан кечаётган, дунёнинг турли бурчакларида ўзаро уруш-низолар, қарама-қаршиликлар тобора авж олаётган ҳозирги даврда ёшларни миллий ғоя ва Ватанга садоқат руҳида тарбиялаш, уларда ён-атрофимизда рўй бераётган сиёсий-ижтимоий жараёнларга миллий манфаатларимиздан келиб чиққан ҳолда муносабатда бўлиш кўникмаларини шакллантириш, ички ва ташқи таҳдидларга қарши мафкуравий иммунитетни тарбиялаш жуда муҳим масала саналади. Шу мақсадда Ўзбекистон Республикаси Мудофаа вазири, Ўзбекистон Республикаси ёшлар иттифоқи марказий кенгаши раиси, Халқ таълими вазири ва Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши раисининг биргаликда “Ватанпарвар” ҳарбий спорт мусобақаларини ўтказиш бўйича қўшма қарори қабул қилинган эди.

Ўзбекистон Республикаси Мудофаа вазирининг кубоги учун ўтказиладиган “Ватанпарвар” ҳарбий-спорт мусобақаларида умумий ўрта таълим муассасаларида таълим олаётган 10- ва 11-синфлар ўқувчилари иштирок этишлари кўзда тутилган. Ёшларнинг спорт билан оммавий тарзда шуғулланишларига эришиш, улар орасида ўзаро маданий алоқаларни яхши йўлга қўйиш, ҳарбий амалий спорт мусобақаларга кенг жалб этиш орқали кўнглида ватанпарварлик туйғуларини юксалтиришга хизмат қилувчи мусобақанинг туман босқичи шу йилнинг 7 апрелида Ўзбекистон Республикаси мудофаасига кўмаклашувчи “Ватанпарвар” ташкилоти Амударё туман Кенгаши биносида ўтказилди.

Ушбу нуфузли мусобақада туманимиздаги 1-, 12-, 15-, 35-, 48-, 59-умумий ўрта таълим мактаблари ўқувчилари иштирок этдилар. Қизғин курашлар остида кечган мусобақада 15-сонли мактаб ўқувчиларининг “Самовий бургутлар”жамоаси ғолибликни қўлга киритди. Иккинчи ўринни 12-сонли, учинчи ўринни эса 59-сонли мактаблар ўқувчилари эгалладилар.

Мусобақа сўнгида ғолиб жамоалар ташкилотчилар томонидан муносиб тақдирланди.

Туман Мудофаа ишлари бўлими бошлиғи Шерзод Муродов, Халқ таълими бўлими, Ёшлар ишлари агентлиги туман бўлими, мудофаага кўмаклашувчи “Ватанпарвар” ташкилоти ўқув-спорт техника клуби ходимлари ғолиб ва совриндор ўқувчиларга эсдалик совғалар, Фахрий ёрлиқларни тантанали равишда топширдилар ва уларнинг келгуси ўқиш ва ишларида муваффақиятлар тиладилар.

Зокир Саъдуллаев, туман Мудофаа бўлими бошлиғи ўринбосари.