“VATANPARVAR” HARBIY SPORT MUSOBAQASI GʻOLIBLARI TAQDIRLANDI

Globallashuv jarayoni shiddat bilan kechayotgan, dunyoning turli burchaklarida oʻzaro urush-nizolar, qarama-qarshiliklar tobora avj olayotgan hozirgi davrda yoshlarni milliy gʻoya va Vatanga sadoqat ruhida tarbiyalash, ularda yon-atrofimizda roʻy berayotgan siyosiy-ijtimoiy jarayonlarga milliy manfaatlarimizdan kelib chiqqan holda munosabatda boʻlish koʻnikmalarini shakllantirish, ichki va tashqi tahdidlarga qarshi mafkuraviy immunitetni tarbiyalash juda muhim masala sanaladi. Shu maqsadda Oʻzbekiston Respublikasi Mudofaa vaziri, Oʻzbekiston Respublikasi yoshlar ittifoqi markaziy kengashi raisi, Xalq taʼlimi vaziri va Oʻzbekiston Respublikasi mudofaasiga koʻmaklashuvchi “Vatanparvar” tashkiloti Markaziy kengashi raisining birgalikda “Vatanparvar” harbiy sport musobaqalarini oʻtkazish boʻyicha qoʻshma qarori qabul qilingan edi.

Oʻzbekiston Respublikasi Mudofaa vazirining kubogi uchun oʻtkaziladigan “Vatanparvar” harbiy-sport musobaqalarida umumiy oʻrta taʼlim muassasalarida taʼlim olayotgan 10- va 11-sinflar oʻquvchilari ishtirok etishlari koʻzda tutilgan. Yoshlarning sport bilan ommaviy tarzda shugʻullanishlariga erishish, ular orasida oʻzaro madaniy aloqalarni yaxshi yoʻlga qoʻyish, harbiy amaliy sport musobaqalarga keng jalb etish orqali koʻnglida vatanparvarlik tuygʻularini yuksaltirishga xizmat qiluvchi musobaqaning tuman bosqichi shu yilning 7-aprelida Oʻzbekiston Respublikasi mudofaasiga koʻmaklashuvchi “Vatanparvar” tashkiloti Amudaryo tuman Kengashi binosida oʻtkazildi.

Ushbu nufuzli musobaqada tumanimizdagi 1-, 12-, 15-, 35-, 48-, 59-umumiy oʻrta taʼlim maktablari oʻquvchilari ishtirok etdilar. Qizgʻin kurashlar ostida kechgan musobaqada 15-sonli maktab oʻquvchilarining “Samoviy burgutlar”jamoasi gʻoliblikni qoʻlga kiritdi. Ikkinchi oʻrinni 12-sonli, uchinchi oʻrinni esa 59-sonli maktablar oʻquvchilari egalladilar.

Musobaqa soʻngida gʻolib jamoalar tashkilotchilar tomonidan munosib taqdirlandi.

Tuman Mudofaa ishlari boʻlimi boshligʻi Sherzod Murodov, Xalq taʼlimi boʻlimi, Yoshlar ishlari agentligi tuman boʻlimi, mudofaaga koʻmaklashuvchi “Vatanparvar” tashkiloti oʻquv-sport texnika klubi xodimlari gʻolib va sovrindor oʻquvchilarga esdalik sovgʻalar, Faxriy yorliqlarni tantanali ravishda topshirdilar va ularning kelgusi oʻqish va ishlarida muvaffaqiyatlar tiladilar.

Zokir Saʼdullayev, tuman Mudofaa boʻlimi boshligʻi oʻrinbosari.