“СЕНИ СОҒИНДИК, БАҲОР!” ШИОРИ ОСТИДА ЎТКАЗИЛАЁТГАН “КИНОКАРВОН” МАНҒИТДА БЎЛДИ

Юртимизда Кинематография агентлиги томонидан эълон қилинган “Сени соғиндик, баҳор!” шиори остида “Кинокарвон” акцияси ўтказилмоқда. Республиканинг барча ҳудудларида акция доирасида бўлиб ўтаётган тадбирларда таниқли режиссёрлар, операторлар, актёрлар ва актрисалар кўпсонли мухлислари билан учрашиб, кино соҳасидаги янгиликлар, сўнгги йилларда суратга олинаётган бадиий ва ҳужжатли фильмлар, уларда акс эттирилаётган мавзу ва ғоялар, соҳага доир янгиликлар ҳақида қизиқарли суҳбатлар уюштирмоқдалар ҳамда энг сара фильмларни намойиш этмоқдалар.

Кинокарвон акцияси иштирокчиларидан бир гуруҳи 11 апрель куни Амударё туманига ҳам ташриф буюришди. Меҳмонлар Манғит шаҳридаги туман Маданият бўлими муҳташам биноси олдида карнай-сурнайлар садоси остида қарши олинди. Киноижодкорларга остонада халқимизнинг одатига кўра нон тутилди. Азиз меҳмонлар байрамона безатилган бино ичкарисида таклиф этилди. Туман ҳокими Султонбой Йўлдашев ва бошқа масъуллар ҳамроҳлигида уларнинг томошалар залига кириб келишларини кўпсонли кино мухлислари қарсаклар билан олқишлаб турдилар.

Кинематография агентлигининг “Кино санъати” журнали директори Сайдулла Ражабов, кинорежиссёр Рустам Сагдиев, театр ва кино режиссёри Фарҳод Маҳмудов, актриса Анжелика Есимбаева, актриса Шахсанем Абдижамилова, оператор Лочин Ибрагимовлардан иборат ижодий гуруҳ билан дийдорлашув манғитликларда ўчмас таассуротлар қолдирди.

Тадбирда туман ҳокими Султонбой Йўлдашев сўзга чиқиб, “Сени соғиндик, баҳор!” шиори остида республикамиз бўйлаб ўтказилаётган кинокарвон акцияси доирасида киноижодкорларнинг туманимизга ташрифи учун уларга чуқур миннатдорчилик билдирди, ижодий ишларига муваффақиятлар тилади ва ушбу учрашув амударёлик киноихлосмандлар учун унутилмас таассуротлар ҳадя этишини таъкидлади.

Акция иштирокчилари Кинематография агентлиги томонидан ишлаб чиқарилаётган янги бадиий ва ҳужжатли фильмлар, кино соҳасидаги янгиликлар ва янги суратга олинган фильмларнинг халқаро фестивалларда намойиш этилиб, юксак эътирофларга сазовор бўлаётгани, нуфузли мукофотларни қўлга киритаётгани ҳақида, шунингдек, “Кинокарвон” акциясининг томошабинларга янги бадиий, ҳужжатли фильмларни тарғиб этишдаги ўрни ҳақида томошабинлар билан самимий суҳбатлашишди.

Ёрқин таассуротларга бой суҳбат сўнгида киноижодкорлар айни кунларда бутун мамлакат бўйлаб давом этаётган “Конституция меники, сеники, бизники. Конституция ўзимизники!” шиори остида ўтаётган референдумолди тадбирлар, амалдаги Констутуциямизга киритилаётган ўзгартиш ва қўшимчалар ҳақидаги фикрлари билан ўртоқлашдилар.

Учрашувда томошабинларни қизиқтирган кино соҳасига оид саволларга батафсил жавоблар берилди. Шундан сўнг ўзбек киноижодкорлари меҳнати маҳсули бўлган “Барон-2. Соғинч” бадиий фильми намойиш этилди.

Юртимиз тинчлиги ва халқимиз осойишталигини сақлаш йўлидаги мардлик, фидойилик, Ватанга садоқат улуғланган фильм барчада улкан таассуротлар қолдирди.

Ойгул РАЖАБОВА.