“SENI SOGʻINDIK, BAHOR!” ShIORI OSTIDA OʻTKAZILAYoTGAN “KINOKARVON” MANGʻITDA BOʻLDI

Yurtimizda Kinematografiya agentligi tomonidan eʼlon qilingan “Seni sogʻindik, bahor!” shiori ostida “Kinokarvon” aktsiyasi oʻtkazilmoqda. Respublikaning barcha hududlarida aktsiya doirasida boʻlib oʻtayotgan tadbirlarda taniqli rejissyorlar, operatorlar, aktyorlar va aktrisalar koʻpsonli muxlislari bilan uchrashib, kino sohasidagi yangiliklar, soʻnggi yillarda suratga olinayotgan badiiy va hujjatli filmlar, ularda aks ettirilayotgan mavzu va gʻoyalar, sohaga doir yangiliklar haqida qiziqarli suhbatlar uyushtirmoqdalar hamda eng sara filmlarni namoyish etmoqdalar.

Kinokarvon aktsiyasi ishtirokchilaridan bir guruhi 11-aprel kuni Amudaryo tumaniga ham tashrif buyurishdi. Mehmonlar Mangʻit shahridagi tuman Madaniyat boʻlimi muhtasham binosi oldida karnay-surnaylar sadosi ostida qarshi olindi. Kinoijodkorlarga ostonada xalqimizning odatiga koʻra non tutildi. Aziz mehmonlar bayramona bezatilgan bino ichkarisida taklif etildi. Tuman hokimi Sultonboy Yoʻldashev va boshqa masʼullar hamrohligida ularning tomoshalar zaliga kirib kelishlarini koʻpsonli kino muxlislari qarsaklar bilan olqishlab turdilar.

Kinematografiya agentligining “Kino sanʼati” jurnali direktori Saydulla Rajabov, kinorejissyor Rustam Sagdiyev, teatr va kino rejissyori Farhod Mahmudov, aktrisa Anjelika Yesimbayeva, aktrisa Shaxsanem Abdijamilova, operator Lochin Ibragimovlardan iborat ijodiy guruh bilan diydorlashuv mangʻitliklarda oʻchmas taassurotlar qoldirdi.

Tadbirda tuman hokimi Sultonboy Yoʻldashev soʻzga chiqib, “Seni sogʻindik, bahor!” shiori ostida respublikamiz boʻylab oʻtkazilayotgan kinokarvon aktsiyasi doirasida kinoijodkorlarning tumanimizga tashrifi uchun ularga chuqur minnatdorchilik bildirdi, ijodiy ishlariga muvaffaqiyatlar tiladi va ushbu uchrashuv amudaryolik kinoixlosmandlar uchun unutilmas taassurotlar hadya etishini taʼkidladi.

Aktsiya ishtirokchilari Kinematografiya agentligi tomonidan ishlab chiqarilayotgan yangi badiiy va hujjatli filmlar, kino sohasidagi yangiliklar va yangi suratga olingan filmlarning xalqaro festivallarda namoyish etilib, yuksak eʼtiroflarga sazovor boʻlayotgani, nufuzli mukofotlarni qoʻlga kiritayotgani haqida, shuningdek, “Kinokarvon” aktsiyasining tomoshabinlarga yangi badiiy, hujjatli filmlarni targʻib etishdagi oʻrni haqida tomoshabinlar bilan samimiy suhbatlashishdi.

Yorqin taassurotlarga boy suhbat soʻngida kinoijodkorlar ayni kunlarda butun mamlakat boʻylab davom etayotgan “Konstitutsiya meniki, seniki, bizniki. Konstitutsiya oʻzimizniki!” shiori ostida oʻtayotgan referendumoldi tadbirlar, amaldagi Konstututsiyamizga kiritilayotgan oʻzgartish va qoʻshimchalar haqidagi fikrlari bilan oʻrtoqlashdilar.

Uchrashuvda tomoshabinlarni qiziqtirgan kino sohasiga oid savollarga batafsil javoblar berildi. Shundan soʻng oʻzbek kinoijodkorlari mehnati mahsuli boʻlgan “Baron-2. Sogʻinch” badiiy filmi namoyish etildi.

Yurtimiz tinchligi va xalqimiz osoyishtaligini saqlash yoʻlidagi mardlik, fidoyilik, Vatanga sadoqat ulugʻlangan film barchada ulkan taassurotlar qoldirdi.

Oygul RAJABOVA.