Chigit ekish ishlari zamonaviy texnologiyalar asosida, qatʼiy nazorat ostida amalga oshirilmoqda

Qishloq xoʻjaligi sohasida yuqori samaradorlikka erishish, yer resurslaridan unumli va oqilona foydalanish, shuningdek, aholi farovonligini taʼminlash bugungi kunning eng dolzarb vazifalaridan biri sanaladi. Ayniqsa, mamlakatimizda paxtachilik yoʻnalishida amalga oshirilayotgan izchil islohotlar, ilgʻor agrotexnologiyalarni amaliyotga keng joriy etish va zamonaviy klaster tizimi asosida faoliyat yuritish ushbu sohaning mutlaqo yangi bosqichga koʻtarilishiga mustahkam zamin yaratmoqda. Shu bilan birga qishloq xoʻjaligida, xususan, paxtachilik tarmogʻida ilm-fanning soʻnggi yutuqlariga tayanish, eng zamonaviy va tejamkor agrotexnologiyalardan foydalanish, ortiqcha xarajatlarni keskin kamaytirish hamda dehqon va fermerlarning real daromadini oshirishga ham alohida eʼtibor qaratmoqda.

Yurtimiz dalalarida bahor nafasi kezayotgan, tabiat uygʻonib, tuproq tobga kelgan ayni aprel oyining iliq kunlarida Amudaryo tumanidagi barcha fermer xoʻjaliklarida ham joriy yilgi paxta hosili uchun chigit ekish ishlari jadal surʼatlarda, uyushqoqlik bilan olib borilmoqda. Mazkur jarayonlarning borishi Oʻzbekiston Respublikasi Vazirlar Mahkamasi huzuridagi Agrosanoat majmui ustidan nazorat qilish inspektsiyasi Qoraqalpogʻiston Respublikasi boshqarmasi Amudaryo tuman boʻlimi mutaxassislari va inspektorlari tomonidan kunlik qatʼiy nazoratga olingan.

Aytish joizki, joriy yilda tumandagi mavjud 335 ta fermer xoʻjaligi va boshqa qishloq xoʻjaligi subʼektlari tomonidan jami 13 ming gektar unumdor yer maydoniga chigit ekilishi rejalashtirilgan. Eʼtiborga molik va muhim jihati shundaki, ushbu maydonlarning 6230 gektarida serhosil xorijiy navli chigitlar, qolgan 6770 gektarida esa oʻzimizning mahalliy iqlim sharoitlariga moslashgan, sinalgan mahalliy gʻoʻza navlari ekilishi moʻljallangan. Xorijiy va mahalliy navlarning bunday mutanosiblikda tanlanishi va uygʻunlikdagi ilmiy yondashuv kelgusida hosilning ham sifat, ham hajm jihatidan keskin oshishiga, tolaning jahon bozoridagi raqobatbardoshligini taʼminlashga xizmat qilishi kutilmoqda. Zamonaviy texnika va texnologiyalarning dalalarga kirib kelishi esa dehqonlarning ogʻirini yengil qilish bilan birga, ish unumdorligini karrasiga oshirmoqda.

Qilichboy ovuli hududidagi “Shirin buloq” fermer xoʻjaligida bu yilgi mavsumda 20 gektar yer maydoniga chigit qadash rejalashtirilgan boʻlib, bugungi kunda xoʻjalik dalalarida eng soʻnggi rusumdagi zamonaviy texnika va agregatlar yordamida, shuningdek, inson omili kamaytirilgan holda, yaʼni avto boshqaruv tizimi asosida chigit ekish ishlari muvaffaqiyatli olib borilmoqda.

Xuddi shunday ilgʻor tajribani Oʻrta Qala ovuli hududida faoliyat yuritayotgan “Ermanov Oʻrazboy” fermer xoʻjaligi misolida ham kuzatish mumkin. Mazkur xoʻjalikning 54 gektar yer maydoniga chigit ekish rejalashtirilgan boʻlib, bu yerda ham ishlar toʻliq zamonaviy texnikalar va yuqori aniqlikda ishlaydigan avto boshqaruv tizimidagi agregatlar yordamida amalga oshirilmoqda. Ushbu smart-texnologiyalar urugʻning bir tekisda, belgilangan chuqurlik va masofada qadalishini taʼminlab, kelgusida nihollarning bir tekis unib chiqishiga zamin yaratadi.

Maʼlumot oʻrnida taʼkidlash joizki, ushbu oʻta masʼuliyatli va tigʻiz mavsum oldidan tumandagi barcha qishloq xoʻjaligi texnikalari va agregatlari toʻliq koʻrikdan oʻtkazilib, shay va tayyor holatga keltirilgan. Jarayonda jami 150 ta seyalka uzluksiz ishlamoqda. Ularning tarkibida zamonaviy texnologiyalar asosida yaratilgan, koʻp funktsiyali Shinjon usulidagi 34 ta seyalka, 8 ta qoʻsh qatorli, 30 ta yakka qatorli seyalkalar mavjud. 78 ta eski rusumdagi seyalkalar esa bugungi talablar darajasida modernizatsiya qilingan. Hozirda ushbu barcha texnika va agregatlar soz holatda ishga tushirilgan boʻlib, chigit ekish kampaniyasida faol ishtirok etmoqda. Texnikalarning uzluksiz ishlashi esa masʼuliyatli pallada vaqtdan unumli foydalanish va namlikni qochirmasdan urugʻ qadashga imkoniyatini yaratadi.

Albatta, har bir qadalgan urugʻdan moʻl hosil olish koʻp jihatdan agrotexnik qoidalarga qanchalik toʻgʻri amal qilinishiga bogʻliq. Shu boisdan ham, tumanda chigit ekish ishlarining har bir bosqichi Agrosanoat majmui ustidan nazorat qilish inspektsiyasi xodimlari tomonidan tizimli va qatʼiy nazorat qilib borilmoqda. Ularning saʼy-harakatlari natijasida barcha agrotexnik tadbirlar, yerni tayyorlashdan tortib chigitni yerga qadashgacha boʻlgan jarayonlar belgilangan qatʼiy talab va meʼyorlarga toʻliq rioya etilgan holda, eng yuqori sifat darajasida amalga oshirilmoqda.

Ushbu jarayonlarda fidokorona mehnat qilayotgan dehqonlar va mutaxassislarning maqsadi bitta, u ham boʻlsa el dasturxoni toʻkinligi va mamlakat iqtisodiyoti rivoji uchun oʻzining munosib hissasini qoʻshishdir. Shunday ekan, dalalarimizda tunu kun ter toʻkayotgan barcha fermer xoʻjaliklari aʼzolariga va agrar sohada mehnat qilayotgan fidoyi yurtdoshlarimizga ushbu masʼuliyatli mavsumda ulkan muvaffaqiyatlar tilab qolamiz.