ГРАНТ ЛОЙИҲАСИ ДОИРАСИДА БОЛАЛАР УЧУН ТЕАТР ТОМОШАЛАРИ ТАШКИЛ ЭТИЛДИ

Халқимиз маънавиятини юксалтириш, ёш авлодни Ватанга муҳаббат, миллий ва умуминсоний қадриятлар руҳида камол топтиришда бадиий адабиётнинг ўрни, таъсири ва аҳамиятини янада ошириш, адабиёт, мусиқа, бадиий-амалий санъат равнақига ҳисса қўшиш бўйича жойлардаги каби туманимизда ҳам салмоқли ишлар амалга оширилмоқда. Ҳаваскор шоирлар ва ёзувчилар, ижодкорлар, санъаткорлар, бадиий ва амалий санъат усталарини қўллаб-қувватлаш, уларнинг ижодий салоҳиятларини рўёбга чиқаришга алоҳида эътибор қаратилмоқда.

Қиличбой маданият марказида “Жайхун илҳомлари” нодавлат нотижорат ташкилоти ҳамда “Менинг оилам” газетаси таҳририяти билан ҳамкорликда “Беш ташаббус – беш имконият!” Олий мажлис ҳузуридаги нодавлат нотижорат ташкилотларни қўллаб-қувватловчи Жамоат фонди томонидан молиялаштирилган грант лойиҳасининг иш режасига кўра театр томошалари уюштирилди. Томошага ҳудуддаги мактаблар ўқувчилари, ногиронлиги бўлган ёшлар, кам таъминланган оилалар фарзандлари таклиф этилди. Шунингдек, ҳудуддаги мактабларнинг бошланғич синф ўқувчилари ҳам ўқитувчилари ҳамроҳлигида иштирок этдилар.

Ёш томошабинлар эътиборига Қиличбой маданият марказидаги драма тўгарагининг “Ёш томошабинлар” театр гуруҳи томонидан “Эртаклар олами” деб номланган саҳна кўриниши ҳавола этилди. Унда жаҳолат устидан маърифат доимо ғалаба қозониши эратк қаҳрамонлари ижросида акс эттирилди.

Тўгарак раҳбари ва режиссёри Мирсаид Қодиров саҳналаштирган бу театр томошалари ўқувчилар кўнглида улкан ҳиссиётлар уйғотди. Бўри ролидаги Ўлмас Худойберганов, Қуён ролидаги Дамин Шуҳратовларнинг моҳирлик билан амалга оширган ижролари болаларни ҳақиқий эртаклари оламига олиб кирди.

Таъкидлаш жоизки, ёшларнинг маънавиятини юксалтириш, бўш вақтларини мазмунли ўтказиш, уларни мафкура майдонининг турли хуружларидан ишончли ҳимоя қилиш мақсадида таълим муассасаларида маънавий-маърифий тадбирлар, учрашувлар ва давра суҳбатлари, спорт тадбирлари, концерт дастурлари, экскурсиялар ва шу каби вазифалар муваффақиятли амалга ошириб келинмоқда. Айни пайтда муҳим аҳамият касб этиб келаётган – ёшлар маънавиятини юксалтириш ва уларнинг бўш вақтини мазмунли ташкил этиш бўйича 5 та муҳим ташаббус ҳам бу борадаги вазифаларни юқори даражада амалга оширишга асос бўлмоқда.

Туманимизнинг Қиличбой овули марказида жойлашган Қиличбой маданият маркази ходимлари бу борада салмоқли ишларни амалга ошириб келишмоқда. Айниқса, мазкур марказда 4 йилдан буён фаолият юритиб келаётган ёш томошабинлар ҳаваскор драма тўгараги аъзолари ўзларининг ижодий меҳнатлари билан эл олқишига сазовор бўлиб келмоқдалар. Тўгаракнинг 12 нафар аъзоси эртаклар асосида театр томошалари кўрсатиб, ёш томошабинларга улкан завқ-шавқ улашиб келмоқдалар. Тўгарак аъзолари яқинда Тахтакўпир туманида 27 март – Халқаро театр кунига бағишлаб ўтказилган анжуманда “Умид учқунлари” номли дастури билан қатнашиб, республика миқёсида совриндор бўлиб қайтдилар. Йил бошидан буён мактабгача таълим муассасаларида театр томошалари кўрсатиб келган тўгарак аъзолари эндиликда мактабларнинг бошланғич синф ўқувчилари учун ҳам театр томошаларини саҳналаштиришни режа қилишган.

Грант лойиҳаси режасига кўра ўтказилган театр томошалари давомида тўгарак ҳаваскорлари Севинчой Жумабоева, Диёрбек Пўлатовлар ижро этган қўшиқлар болаларнинг қувноқ рақсларига уланиб кетди. Театр томошалари ижодкорлари болажонларга жуда катта завқ улашишди.

Ў.РЕЙИМОВ, “Жайхун илҳомлари” ННТ раиси.