GRANT LOYIHASI DOIRASIDA BOLALAR UChUN TEATR TOMOShALARI TAShKIL ETILDI

Xalqimiz maʼnaviyatini yuksaltirish, yosh avlodni Vatanga muhabbat, milliy va umuminsoniy qadriyatlar ruhida kamol toptirishda badiiy adabiyotning oʻrni, taʼsiri va ahamiyatini yanada oshirish, adabiyot, musiqa, badiiy-amaliy sanʼat ravnaqiga hissa qoʻshish boʻyicha joylardagi kabi tumanimizda ham salmoqli ishlar amalga oshirilmoqda. Havaskor shoirlar va yozuvchilar, ijodkorlar, sanʼatkorlar, badiiy va amaliy sanʼat ustalarini qoʻllab-quvvatlash, ularning ijodiy salohiyatlarini roʻyobga chiqarishga alohida eʼtibor qaratilmoqda.

Qilichboy madaniyat markazida “Jayxun ilhomlari” nodavlat notijorat tashkiloti hamda “Mening oilam” gazetasi tahririyati bilan hamkorlikda “Besh tashabbus – besh imkoniyat!” Oliy majlis huzuridagi nodavlat notijorat tashkilotlarni qoʻllab-quvvatlovchi Jamoat fondi tomonidan moliyalashtirilgan grant loyihasining ish rejasiga koʻra teatr tomoshalari uyushtirildi. Tomoshaga hududdagi maktablar oʻquvchilari, nogironligi boʻlgan yoshlar, kam taʼminlangan oilalar farzandlari taklif etildi. Shuningdek, hududdagi maktablarning boshlangʻich sinf oʻquvchilari ham oʻqituvchilari hamrohligida ishtirok etdilar.

Yosh tomoshabinlar eʼtiboriga Qilichboy madaniyat markazidagi drama toʻgaragining “Yosh tomoshabinlar” teatr guruhi tomonidan “Ertaklar olami” deb nomlangan sahna koʻrinishi havola etildi. Unda jaholat ustidan maʼrifat doimo gʻalaba qozonishi eratk qahramonlari ijrosida aks ettirildi.

Toʻgarak rahbari va rejissyori Mirsaid Qodirov sahnalashtirgan bu teatr tomoshalari oʻquvchilar koʻnglida ulkan hissiyotlar uygʻotdi. Boʻri rolidagi Oʻlmas Xudoyberganov, Quyon rolidagi Damin Shuhratovlarning mohirlik bilan amalga oshirgan ijrolari bolalarni haqiqiy ertaklari olamiga olib kirdi.

Taʼkidlash joizki, yoshlarning maʼnaviyatini yuksaltirish, boʻsh vaqtlarini mazmunli oʻtkazish, ularni mafkura maydonining turli xurujlaridan ishonchli himoya qilish maqsadida taʼlim muassasalarida maʼnaviy-maʼrifiy tadbirlar, uchrashuvlar va davra suhbatlari, sport tadbirlari, kontsert dasturlari, ekskursiyalar va shu kabi vazifalar muvaffaqiyatli amalga oshirib kelinmoqda. Ayni paytda muhim ahamiyat kasb etib kelayotgan – yoshlar maʼnaviyatini yuksaltirish va ularning boʻsh vaqtini mazmunli tashkil etish boʻyicha 5 ta muhim tashabbus ham bu boradagi vazifalarni yuqori darajada amalga oshirishga asos boʻlmoqda.

Tumanimizning Qilichboy ovuli markazida joylashgan Qilichboy madaniyat markazi xodimlari bu borada salmoqli ishlarni amalga oshirib kelishmoqda. Ayniqsa, mazkur markazda 4-yildan buyon faoliyat yuritib kelayotgan yosh tomoshabinlar havaskor drama toʻgaragi aʼzolari oʻzlarining ijodiy mehnatlari bilan el olqishiga sazovor boʻlib kelmoqdalar. Toʻgarakning 12 nafar aʼzosi ertaklar asosida teatr tomoshalari koʻrsatib, yosh tomoshabinlarga ulkan zavq-shavq ulashib kelmoqdalar. Toʻgarak aʼzolari yaqinda Taxtakoʻpir tumanida 27-mart – Xalqaro teatr kuniga bagʻishlab oʻtkazilgan anjumanda “Umid uchqunlari” nomli dasturi bilan qatnashib, respublika miqyosida sovrindor boʻlib qaytdilar. Yil boshidan buyon maktabgacha taʼlim muassasalarida teatr tomoshalari koʻrsatib kelgan toʻgarak aʼzolari endilikda maktablarning boshlangʻich sinf oʻquvchilari uchun ham teatr tomoshalarini sahnalashtirishni reja qilishgan.

Grant loyihasi rejasiga koʻra oʻtkazilgan teatr tomoshalari davomida toʻgarak havaskorlari Sevinchoy Jumaboyeva, Diyorbek Poʻlatovlar ijro etgan qoʻshiqlar bolalarning quvnoq raqslariga ulanib ketdi. Teatr tomoshalari ijodkorlari bolajonlarga juda katta zavq ulashishdi.

Oʻ.REYIMOV, “Jayxun ilhomlari” NNT raisi.