ҚЎШИҚЛАРИ ЭЛГА МАНЗУР
Санъат оламига эндигина қадам қўйган, ўзининг муаллифлигидаги қўшиқлари билан танилаётган, ўзига хос овоз эгаси, созанда ва хонанда Раҳматжон Ўрозимбетов истеъдодли ёшлардан бири. У айни пайтда Чойкўл овулидаги Маданият марказида эстрада тўгараги раҳбари бўлиб ишлайди. Раҳматжон ижросидаги халқона қўшиқлар аллақачон ўз мухлисларини топган. Хушовоз хонанданинг чиқишлари нафақат ёшлар, балки катталарга ҳам жуда манзур бўлмоқда.
Раҳматжон 1995 йилда Қипчоқ овулида таваллуд топган. Унинг санъатга, мусиқага қизиқишига дадаси Олламберган ака сабабчи бўлди. Кўпинча оила даврасида Олламберган ака доира чалар, бундай лаҳзалар улар учун жуда завқли эди. Доирани яхшигина чаладиган Олламберган акани тўй-ҳашамларга хизматга тез-тез чақириб туришар, гоҳида катта фарзанди Раҳматжон ҳам унга эргашарди. Шунданми, у кичиклигидан соз чалишга ҳавасманд бўлди. Овулдаги 18-сонли мактабда ўқий бошлаган Раҳматжоннинг энг севимли дарслари қаторига мусиқа дарси ҳам қўшилди. Мусиқа ўқитувчиси Эркабой Хўжаниёзов ундаги истеъдодни пайқаб, алоҳида шуғуллана бошлади.
Ота-онаси ҳам фарзандидаги қизиқишга қараб, 21-сонли БМСМ мактабига, тўгарак машғулотларига қатнашишига имконият яратишди. Мусиқа мактабида устози Т.Ҳайитбоевдан доира, сурнай ва қўшнай чалишни мукаммал ўрганиб олди.
Раҳматжон учун мусиқа ҳаёт мазмунига айланди. У 9-синфни тугатганидан сўнг, Элликқалъа туманидаги Отажон Худойшукуров номли Санъат ва педагогика коллежида анъанавий чолғу ижрочилиги йўналишида таҳсил олди. Ушбу масканда буломон ва кларнетда ҳам куй чалишни ўрганди. Маҳоратли устозлардан санъат оламининг сир-асрорларини тўлиқ билиб олишга ҳаракат қилди.
Маромига етказиб чалган наволари, хуш овозда куйлаган қўшиқлари билан эл назарига туша бошлаган Раҳматжон 2018 йилда таҳсилни Ажиниёз номидаги НДПИда, мусиқий таълим йўналишида давом эттирди. Ўқишни тугатгунича санъат соҳасида кўзга кўринишга улгурган ёш истеъдод эгаси туманга келганидан сўнг, Чойкўл маданият марказида иш бошлади. Ўз устида ишлашда давом этаётган Раҳматжон ўзининг муаллифлигида қатор қўшиқлар яратди. Айниқса, элликқалъалик шоир Хурсанд Каримов қаламига мансуб "Ҳаётимсан", "Ёқди мани" қўшиқлари, элимиздаги ҳаваскор ижодкорлар шеърларидан яратган “Амударё қизлари”, “Дўстим” деб номланган қўшиқлари мухлисларига жуда манзур бўлди.
Ҳозирги кунда эстрада йўналишида 20 нафарга яқин ёшларга мусиқадан сабоқ бериб келаётган ёш хонанданинг келгусидаги режалари катта. У мумтоз йўналишда ҳам қўшиқ куйлаб, ўз репертуарини янада бойитиш, хилма-хил мавзуларда халқнинг дилидан жой оладиган кўплаб қўшиқлар яратиш ниятида.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
