Маънавий-маърифий ва тарбиявий ишлар яхши йўлга қўйилган илғор мактаб

Туманимизда иқтидорли ёшларни қўллаб-қувватлаш, истеъдодини юзага чиқариш, ҳамда ватанпарварлик руҳида тарбиялаш мақсадида кўплаб саъй-ҳаракатлар амалга оширилмоқда. Айниқса, мактаб таълим тизимида бу борадаги ишлар изчиллик билан амалга оширилмоқда. Сабаби, эртанги кун эгалари бўлган ёш авлод маънавияти мактабда ривожланади, сайқал топади.

Тумандаги Тош ёп овули ҳудудида жойлашган 5-сонли умумтаълим мактаби маънавий-маърифий ишлар яхши йўлга қўйилган энг илғор мактаблардан бири ҳисобланади. Мактабда бир-биридан маҳоратли, ўз касбининг ҳақиқий фидоийси бўлган устозлар ўқувчиларга ўзларидаги бор билим ва тажрибани бериб келишмоқда.

Мактабнинг француз тили фани ўқитувчиси Гулбаҳор Саидова ўз касбига меҳри, дарс ўтишдаги ўзига хос маҳорати, чуқур билими туфайли олий тоифали ўқитувчи, Қорақалпоғистон Халқ таълими аълочиси бўлди. У 2011 йилда мамлакатимизнинг бир гуруҳ маҳоратли ва иқтидорли француз тили ўқитувчилари қаторида Франциянинг Руая шаҳрида бир ойлик малака ошириш курсида ўқиб қайтди. Бу тажрибали муаллимнинг ўқитувчилик фаолиятида ўзига хос ёрқин давр бўлди. Француз тилида, шу тил ватанида шу тилда жуда равон гапириши, сўзларни эркин талаффуз қила олиши у ердаги ўқитувчиларни ҳам бефарқ қолдирмади.

Ундан ташқари, Гулбаҳор Саидова 2022 йилнинг 1 октябрь куни “Ўқитувчилар ва мураббийлар куни” муносабати билан Президент Фармонига кўра II даражали “Соғлом авлод учун” ордени билан тақдирланди. Жорий 2023 йил ҳам ўқитувчи учун касбий фаолиятида муваффақиятларга тўла йил бўлди. У 30 март куни “Халқ таълими фидоийси” кўкрак нишони билан тақдирланди. Кўплаб иқтидорли ёшлар таълим олаётган ушбу мактабда Гулбаҳор Саидова сингари ўқитувчилар талайгина.

Мактабда ўқувчи ёшлар ўртасида соғлом турмуш тарзини, жисмоний тарбия ва спортни кенг тарғиб қилиш мақсадида турли спорт тўгараклари, спорт беллашувлари йўлга қўйилган. Қувонарлиси, спортнинг волейбол, шахмат-шашка турлари бўйича мактабнинг ўғил ва қиз болалар жамоаси туманда фахрли ўринларни қўлга киритиб келишмоқда.

Мактабда мунтазам равишда ўтказилиб келинадиган “Қувноқ стартлар” спорт мусобақалари эса ўқувчиларнинг спортга бўлган қизиқишларини янада оширишга хизмат қилмоқда.

Таълим масканида ўқувчиларни касбга ўқитиш, айниқса қиз болаларни қўл меҳнатига ўргатиш мақсадида тўгараклар ташкил этилган. Ўқувчи қизлар меҳнат фани ўқитувчилари билан биргаликда тўқиш, тикиш, кераксиз буюмлардан бежирим хона безаклари, рўзғор буюмларини ясаш, пишириқлар тайёрлашни ўрганишаётган бўлсалар, ўғил болалар ёғоч, фанерлардан дурадгорлик буюмларини ясаб ўрганишмоқда.

Яна шуни алоҳида таъкидлаш керакки, мактабда турли ёзувчи ва шоирларнинг, тарихий шахсларнинг таваллуд кунлари, сиёсий, ва кўнгилочар тадбирлар мунтазам равишда ўтказилиб келинади.

9 апрель куни мактабда Қорақалпоғистон Республикаси Конституцияси қабул қилинганининг 30 йиллиги ва Амир Темур таваллудининг 687 йиллиги кенг тарзда нишонланди. Иқтидорли ўқувчилар буюк бобокалонимизнинг ибратли ҳаёт йўлини маҳорат билан саҳна кўринишлари орқали гавдалантириб беришди.

 Драматик роллар ижро этишга қизиқувчи, актёрлик маҳорати бор, иқтидорли ўқувчиларни қўллаб-қувваталаш, истеъдодларини юзага чиқариш мақсадида мактаб маъмурияти томонидан ўқувчилар учун барча шароит ва имкониятлар яратилган. Ўқувчилар дарсадан бўш пайтларида ўзларининг мўжазгина қўғирчоқ театрида ўзбек халқ эртакларидан парчалар ижро этиб, бошланғич синф ўқувчилари эътиборига ҳавола этишади. Юқори синфда ўқийдиган ака-опалари томонидан саҳналаштирилган томошалар уларда катта тассуротлар қолдиради, албатта.

Туманимиздаги барча таълим ва тарбия ўчоғи ҳисобланган мактабларда ўқувчиларнинг билим олиши, бўш вақтини мазмунли ўтказиши учун барча шароит ва имкониятлар мавжуд. Ўқувчилардан эса қунт билан билим олишгина талаб этилади халос.

Туман ҳокимлигининг Ахборот хизмати.