Maʼnaviy-maʼrifiy va tarbiyaviy ishlar yaxshi yoʻlga qoʻyilgan ilgʻor maktab

Tumanimizda iqtidorli yoshlarni qoʻllab-quvvatlash, isteʼdodini yuzaga chiqarish, hamda vatanparvarlik ruhida tarbiyalash maqsadida koʻplab saʼy-harakatlar amalga oshirilmoqda. Ayniqsa, maktab taʼlim tizimida bu boradagi ishlar izchillik bilan amalga oshirilmoqda. Sababi, ertangi kun egalari boʻlgan yosh avlod maʼnaviyati maktabda rivojlanadi, sayqal topadi.

Tumandagi Tosh yop ovuli hududida joylashgan 5-sonli umumtaʼlim maktabi maʼnaviy-maʼrifiy ishlar yaxshi yoʻlga qoʻyilgan eng ilgʻor maktablardan biri hisoblanadi. Maktabda bir-biridan mahoratli, oʻz kasbining haqiqiy fidoiysi boʻlgan ustozlar oʻquvchilarga oʻzlaridagi bor bilim va tajribani berib kelishmoqda.

Maktabning frantsuz tili fani oʻqituvchisi Gulbahor Saidova oʻz kasbiga mehri, dars oʻtishdagi oʻziga xos mahorati, chuqur bilimi tufayli oliy toifali oʻqituvchi, Qoraqalpogʻiston Xalq taʼlimi aʼlochisi boʻldi. U 2011-yilda mamlakatimizning bir guruh mahoratli va iqtidorli frantsuz tili oʻqituvchilari qatorida Frantsiyaning Ruaya shahrida bir oylik malaka oshirish kursida oʻqib qaytdi. Bu tajribali muallimning oʻqituvchilik faoliyatida oʻziga xos yorqin davr boʻldi. Frantsuz tilida, shu til vatanida shu tilda juda ravon gapirishi, soʻzlarni erkin talaffuz qila olishi u yerdagi oʻqituvchilarni ham befarq qoldirmadi.

Undan tashqari, Gulbahor Saidova 2022-yilning 1-oktyabr kuni “Oʻqituvchilar va murabbiylar kuni” munosabati bilan Prezident Farmoniga koʻra II darajali “Sogʻlom avlod uchun” ordeni bilan taqdirlandi. Joriy 2023-yil ham oʻqituvchi uchun kasbiy faoliyatida muvaffaqiyatlarga toʻla yil boʻldi. U 30-mart kuni “Xalq taʼlimi fidoiysi” koʻkrak nishoni bilan taqdirlandi. Koʻplab iqtidorli yoshlar taʼlim olayotgan ushbu maktabda Gulbahor Saidova singari oʻqituvchilar talaygina.

Maktabda oʻquvchi yoshlar oʻrtasida sogʻlom turmush tarzini, jismoniy tarbiya va sportni keng targʻib qilish maqsadida turli sport toʻgaraklari, sport bellashuvlari yoʻlga qoʻyilgan. Quvonarlisi, sportning voleybol, shaxmat-shashka turlari boʻyicha maktabning oʻgʻil va qiz bolalar jamoasi tumanda faxrli oʻrinlarni qoʻlga kiritib kelishmoqda.

Maktabda muntazam ravishda oʻtkazilib kelinadigan “Quvnoq startlar” sport musobaqalari esa oʻquvchilarning sportga boʻlgan qiziqishlarini yanada oshirishga xizmat qilmoqda.

Taʼlim maskanida oʻquvchilarni kasbga oʻqitish, ayniqsa qiz bolalarni qoʻl mehnatiga oʻrgatish maqsadida toʻgaraklar tashkil etilgan. Oʻquvchi qizlar mehnat fani oʻqituvchilari bilan birgalikda toʻqish, tikish, keraksiz buyumlardan bejirim xona bezaklari, roʻzgʻor buyumlarini yasash, pishiriqlar tayyorlashni oʻrganishayotgan boʻlsalar, oʻgʻil bolalar yogʻoch, fanerlardan duradgorlik buyumlarini yasab oʻrganishmoqda.

Yana shuni alohida taʼkidlash kerakki, maktabda turli yozuvchi va shoirlarning, tarixiy shaxslarning tavallud kunlari, siyosiy, va koʻngilochar tadbirlar muntazam ravishda oʻtkazilib kelinadi.

9-aprel kuni maktabda Qoraqalpogʻiston Respublikasi Konstitutsiyasi qabul qilinganining 30-yilligi va Amir Temur tavalludining 687-yilligi keng tarzda nishonlandi. Iqtidorli oʻquvchilar buyuk bobokalonimizning ibratli hayot yoʻlini mahorat bilan sahna koʻrinishlari orqali gavdalantirib berishdi.

 Dramatik rollar ijro etishga qiziquvchi, aktyorlik mahorati bor, iqtidorli oʻquvchilarni qoʻllab-quvvatalash, isteʼdodlarini yuzaga chiqarish maqsadida maktab maʼmuriyati tomonidan oʻquvchilar uchun barcha sharoit va imkoniyatlar yaratilgan. Oʻquvchilar darsadan boʻsh paytlarida oʻzlarining moʻjazgina qoʻgʻirchoq teatrida oʻzbek xalq ertaklaridan parchalar ijro etib, boshlangʻich sinf oʻquvchilari eʼtiboriga havola etishadi. Yuqori sinfda oʻqiydigan aka-opalari tomonidan sahnalashtirilgan tomoshalar ularda katta tassurotlar qoldiradi, albatta.

Tumanimizdagi barcha taʼlim va tarbiya oʻchogʻi hisoblangan maktablarda oʻquvchilarning bilim olishi, boʻsh vaqtini mazmunli oʻtkazishi uchun barcha sharoit va imkoniyatlar mavjud. Oʻquvchilardan esa qunt bilan bilim olishgina talab etiladi xalos.

Tuman hokimligining Axborot xizmati.