ХОРИЖИЙ ТИЛЛАРНИ ЎҚИТИШ БЎЙИЧА ЭНГ ЯХШИ МАКТАБ АНИҚЛАНДИ

Ўзбекистон Республикаси Президентининг “Ўзбекистон Республикасида хорижий тилларни ўрганишни оммалаштириш фаолиятини сифат жиҳатидан янги босқичга олиб чиқиш чора-тадбирлари тўғрисида”ги 2021 йил 19 майдаги Қарорига асосан 19 апрель куни Амударё туманидаги 40-сонли мактабда “Хорижий тилларни ўқитиш бўйича энг яхши мактаб” танловининг туман босқичи ўтказилди.

Ушбу танловни ўтказишдан кўзланган мақсад – мактаблар ўртасида соғлом рақобат муҳитини шакллантириш, уларда хорижий тилларни ўқитишнинг даражаси ва сифатини оширишни рағбатлантириш, ўқитиш сифати бўйича халқаро мезон ва стандартларга мувофиқ юқори кўрсаткичларга эришишга замин яратишдан иборат. Шунингдек, мактабларда хорижий тилларни ўқитиш бўйича амалга оширилаётган чора-тадбирлар натижадорлигини таҳлил қилиш, хорижий тиллар бўйича ўқувчиларга сифатли таълим бераётган, самарали фаолият олиб бораётган ўқитувчиларни аниқлаш ва рағбатлантириш, танловда юқори кўрсаткичларни қайд этган мактабларни рағбатлантириш, уларнинг тажрибасини оммалаштиришга эътибор қаратиш мазкур танлов ташкилотчиларининг асосий вазифаларига киради.

Танлов Низомига асосан ҳар бир мактабдан бир нафардан инглиз, немис ёки француз тили бўйича 7- 9-синфларда таҳсил оладиган 5 нафар ўқувчидан ташкил топган битта терма жамоа иштирок этиши белгиланган. Унга кўра, танловда туманимизнинг 70 та умумтаълим мактабларидан 343 нафар ўқувчи иштирок этди.

Танловда иштирок этиш истагини билдирган 70 та мактаб 2022 йил сентябрь-декабрь ойларида Ўзбекистон Республикаси Мактабгача ва мактаб таълими вазирлигининг ахборот тизимига Вазирлик томонидан белгиланган асосий кўрсаткичларини киритди ва тизим томонидан баҳоланди. Мактаб терма жамоасининг хорижий тилларни билиш даражаси тест топшириқлари воситасида синовдан ўтказилди. Тест синовлари барча туман ва шаҳарларда бир вақтда, 2023 йил 19 апрель куни соат 11:00 да бошланди ва бир вақтда, 12:30 да якунланди.

Хорижий тил билиш даражасини аниқлашга қаратилган тест топшириқлари 7-9-синф ўқувчилари учун мўлжалланган бўлиб, топшириқлар халқаро таълим стандартлари асосида тайёрланган 30 та топшириқдан иборат бўлиб, мактаб терма жамоасининг бали жамоа аъзолари тўплаган жами балларни 5 га бўлган ҳолда аниқланди ва асосий кўрсаткичларга қўйилган баллар қўшилган ҳолда мактабнинг умумий натижаси аниқланди.

Умумий натижага асосан энг юқори балл тўплаган мактаблар баллар кетма-кетлигига кўра, 1-ўринни туманимизнинг 40-сонли мактаби, 2-ўринни- 30-сонли мактаб, 3-ўринни 56-сонли мактаблар эгаллади. Туман босқичида 1-ўринни кўлга киритган мактаб Қорақалпоғистон Республикаси босқичида қатнашиш ҳуқуқига эга бўлди.

Танлов низомига кўра, ғолиблар Ўзбекистон Республикаси Президентининг соврини билан мукофотланади, яъни, туман ёки шаҳар босқичида 1-ўрин учун — 100 миллион сўм, 2-ўрин учун — 75 миллион сўм, 3-ўрин учун — 50 миллион сўм. Мукофот пуллари туман ёки шаҳар маҳаллий бюджетлари ҳисобидан ажратилади.

Қорақалпоғистон Республикаси, вилоятлар ва Тошкент шаҳар босқичида 1-ўрин учун — 250 миллион сўм, 2-ўрин учун — 200 миллион сўм, 3-ўрин учун — 150 миллион сўм мукофот пули ажратилган бўлиб, ушбу маблағ Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари ҳисобидан ажратилиши белгиланган.

Ўзбекистон Республикаси босқичида эса 1-ўрин учун — 500 миллион сўм, 2-ўрин учун — 400 миллион сўм, 3-ўрин ўрин учун — 300 миллион сўм пул мукофотлари берилади ва маблағ республика бюджетидан ва Халқ таълими вазирлигининг марказлашган харажатларига ажратиладиган маблағлар ҳисобидан қопланади.

Биз танловнинг туман босқичи ғолибларини чин дилдан табриклаймиз ва кейинги босқичларда омад тилаймиз.

Равшан БАҲРОМОВ