АХБОРОТ-КУТУБХОНА МАРКАЗИДА МУҲАММАД ЮСУФ ТАВАЛЛУДИНИНГ 69 ЙИЛЛИГИГА БАҒИШЛАНГАН КЕЧА ТАШКИЛ ЭТИЛДИ

Китобхонларнинг севимли маскани, туман Ахборот-кутубхона марказида севимли шоиримиз Ўзбекистон халқ шоири Муҳаммад Юсуф таваллудининг 69 йиллигига бағишланган “Унутмоқ осонмас” номли шеърият кечаси ташкил қилинди.

27 апрель куни бўлиб ўтган ушбу шеърият кечасида Амударё муҳандислик техникуми талабалари ва 33-сонли мактаб ўқувчилари иштирок этишди. Тадбирда Амударё муҳандислик техникумининг кутубхонашунослик йўналиши талабалари томонидан “Улуғимсан Ватаним” номли расмли китоб кўргазмаси ҳам ташкил қилдилар.

Тадбирни туман Ахборот-кутубхона марказининг ахборот-библиография хизмати раҳбари Роҳатой Романова очиб берди. У дастлаб халқ шоири Муҳаммад Юсуф ҳаёти ва ижодига кенг тўхталиб ўтди. Ўз даврида шоирлар орасида ёш бўлишига қарамасдан Ўзбекистон халқ шоири унвонига эришган, “Дўстлик” орденига мушарраф бўлган Муҳаммад Юсуф ижодининг авж палласида дунёдан ўтгани, унинг Ватанни мадҳ этувчи, муҳаббат, она ҳақидаги шеърлари мухлислари қалбидан абадий жой олгани хусусида сўзлади.

Тадбирда сўзга чиққанлар ҳам Муҳаммад Юсуф ўзбек шеъриятида ўчмас из қолдиргани, халқимизнинг севимли ва ардоқли шоирлардан бири эканлигини, шоир қисқа умр кўрган бўлса-да, ўзидан яхши ном, бетакрор излар, юксак ижодий мерослар қолдириб кетганини таъкидлашди. Шоирнинг жондан севган Ватанини, халқини, севги-садоқатни, меҳр-муҳаббатни тараннум этувчи шеър ва ғазаллари шеърият ихлосмандлари томонидан ҳалига қадар севиб ўқилаётганини айтиб ўтдилар. Шунингдек, шеърият инсон қалбини гўзаллаштирувчи бемисл олам эканлигини, ёшлар Муҳаммад Юсуф ижодини кўпроқ ўқишса, дунёқараши кенгайиб, тафаккур ва тасаввурлари ўсиб боришини эътироф этишди.

Лирик шоир Муҳаммад Юсуф 1954 йил 26 апрелда Андижон вилоятининг Марҳамат туманидаги Қовунчи қишлоғида деҳқон оиласида туғилган. У республика Рус тили ва адабиёт институтида таҳсил олди. Ўқишни тугатганидан сўнг, “Тошкент оқшоми”, “Ўзбекистон овози” газеталарида, Ғафур Ғулом номидаги Адабиёт ва санъат нашриётида, Ўзбекистон Миллий Ахборот агентлигида ишлади. Умрининг охиригача Ўзбекистон Ёзувчилар уюшмаси раиси ўринбосари лавозимида фаолият кўрсатди.

Бадиий ижод билан эса талабалик давридан шуғуллана бошлаган. Шеърга ғоят маъсулият ва талабчанлик билан муносабатда бўладиган Муҳаммад Юсуфни илк тўплами – “Таниш тераклар” китоби элга танитди. Тўпламдаги шеърлардан дунёга келган дилтортар қўшиқлари эса уни машҳур қилди. Иқтидорли шоирнинг “Булбулга бир гапим бор”, “Уйқудаги қиз”, “Ҳалима энам аллалари”, “Иш кемаси”, “Кўнглимда бир ёр”, “Бевафо кўп экан”, “Ёлғончи ёр”, “Eрка кийик”, “Осмономга олиб кетаман”каби кўплаб шеърий китоблари босилиб чиққан. Халқидан олган илҳомини яна халққа бериб, дилидан жой олган шоир агар ҳаёт бўлганида бу йил 69 ёшга тўлган бўлар эди.

 Шу каби маълумотлар ҳам берилган тадбир давомида Амударё муҳандислик техникуми талабаларидан Гуласал Эркабоева, Гулсара Матирзаева, Ойгул Мавлешова, Маҳфуза Юсупова, Гулора Сапарбоева, Саодат Тожибоевалар шоирнинг шеърларидан ифодали айтиб беришди. Шунингдек, кечада иштирок этаётган 33-сонли умумтаълим мактаби ўқувчиларидан Дилнура Сафарбоева, Умида Давронбоева, Лайло Жўллибоевалар шоирнинг шеърларидан намуналар ўқиб, кечага файз киритдилар.

Кечада фаол иштирок этган иштирокчилар туман Ахборот-кутубхона маркази томонидан эсдалик совғалар билан тақдирландилар. Тадбир қизиқарли ва мазмунли ўтди.

Санжар Собиров, туман Ахборот-кутубхона маркази ходими.