AXBOROT-KUTUBXONA MARKAZIDA MUHAMMAD YuSUF TAVALLUDINING 69-YILLIGIGA BAGʻIShLANGAN KEChA TAShKIL ETILDI

Kitobxonlarning sevimli maskani, tuman Axborot-kutubxona markazida sevimli shoirimiz Oʻzbekiston xalq shoiri Muhammad Yusuf tavalludining 69-yilligiga bagʻishlangan “Unutmoq osonmas” nomli sheʼriyat kechasi tashkil qilindi.

27-aprel kuni boʻlib oʻtgan ushbu sheʼriyat kechasida Amudaryo muhandislik texnikumi talabalari va 33-sonli maktab oʻquvchilari ishtirok etishdi. Tadbirda Amudaryo muhandislik texnikumining kutubxonashunoslik yoʻnalishi talabalari tomonidan “Ulugʻimsan Vatanim” nomli rasmli kitob koʻrgazmasi ham tashkil qildilar.

Tadbirni tuman Axborot-kutubxona markazining axborot-bibliografiya xizmati rahbari Rohatoy Romanova ochib berdi. U dastlab xalq shoiri Muhammad Yusuf hayoti va ijodiga keng toʻxtalib oʻtdi. Oʻz davrida shoirlar orasida yosh boʻlishiga qaramasdan Oʻzbekiston xalq shoiri unvoniga erishgan, “Doʻstlik” ordeniga musharraf boʻlgan Muhammad Yusuf ijodining avj pallasida dunyodan oʻtgani, uning Vatanni madh etuvchi, muhabbat, ona haqidagi sheʼrlari muxlislari qalbidan abadiy joy olgani xususida soʻzladi.

Tadbirda soʻzga chiqqanlar ham Muhammad Yusuf oʻzbek sheʼriyatida oʻchmas iz qoldirgani, xalqimizning sevimli va ardoqli shoirlardan biri ekanligini, shoir qisqa umr koʻrgan boʻlsa-da, oʻzidan yaxshi nom, betakror izlar, yuksak ijodiy meroslar qoldirib ketganini taʼkidlashdi. Shoirning jondan sevgan Vatanini, xalqini, sevgi-sadoqatni, mehr-muhabbatni tarannum etuvchi sheʼr va gʻazallari sheʼriyat ixlosmandlari tomonidan haliga qadar sevib oʻqilayotganini aytib oʻtdilar. Shuningdek, sheʼriyat inson qalbini goʻzallashtiruvchi bemisl olam ekanligini, yoshlar Muhammad Yusuf ijodini koʻproq oʻqishsa, dunyoqarashi kengayib, tafakkur va tasavvurlari oʻsib borishini eʼtirof etishdi.

Lirik shoir Muhammad Yusuf 1954-yil 26-aprelda Andijon viloyatining Marhamat tumanidagi Qovunchi qishlogʻida dehqon oilasida tugʻilgan. U respublika Rus tili va adabiyot institutida tahsil oldi. Oʻqishni tugatganidan soʻng, “Toshkent oqshomi”, “Oʻzbekiston ovozi” gazetalarida, Gʻafur Gʻulom nomidagi Adabiyot va sanʼat nashriyotida, Oʻzbekiston Milliy Axborot agentligida ishladi. Umrining oxirigacha Oʻzbekiston Yozuvchilar uyushmasi raisi oʻrinbosari lavozimida faoliyat koʻrsatdi.

Badiiy ijod bilan esa talabalik davridan shugʻullana boshlagan. Sheʼrga gʻoyat maʼsuliyat va talabchanlik bilan munosabatda boʻladigan Muhammad Yusufni ilk toʻplami – “Tanish teraklar” kitobi elga tanitdi. Toʻplamdagi sheʼrlardan dunyoga kelgan diltortar qoʻshiqlari esa uni mashhur qildi. Iqtidorli shoirning “Bulbulga bir gapim bor”, “Uyqudagi qiz”, “Halima enam allalari”, “Ish kemasi”, “Koʻnglimda bir yor”, “Bevafo koʻp ekan”, “Yolgʻonchi yor”, “Erka kiyik”, “Osmonomga olib ketaman”kabi koʻplab sheʼriy kitoblari bosilib chiqqan. Xalqidan olgan ilhomini yana xalqqa berib, dilidan joy olgan shoir agar hayot boʻlganida bu yil 69 yoshga toʻlgan boʻlar edi.

 Shu kabi maʼlumotlar ham berilgan tadbir davomida Amudaryo muhandislik texnikumi talabalaridan Gulasal Erkaboyeva, Gulsara Matirzayeva, Oygul Mavleshova, Mahfuza Yusupova, Gulora Saparboyeva, Saodat Tojiboyevalar shoirning sheʼrlaridan ifodali aytib berishdi. Shuningdek, kechada ishtirok etayotgan 33-sonli umumtaʼlim maktabi oʻquvchilaridan Dilnura Safarboyeva, Umida Davronboyeva, Laylo Joʻlliboyevalar shoirning sheʼrlaridan namunalar oʻqib, kechaga fayz kiritdilar.

Kechada faol ishtirok etgan ishtirokchilar tuman Axborot-kutubxona markazi tomonidan esdalik sovgʻalar bilan taqdirlandilar. Tadbir qiziqarli va mazmunli oʻtdi.

Sanjar Sobirov, tuman Axborot-kutubxona markazi xodimi.