ҚИЛИЧБОЙДА ТАРҒИБОТ ТАДБИРИ БЎЛИБ ЎТДИ

Азал-азалдан бир оила фарзандларидай Ўзбекистон заминида аҳил ва ҳамжиҳатликда, қон-қариндошлик, дўст-биродарлик ришталари билан мустаҳкам боғланиб умргузаронлик қилиб келаётган турли миллат вакилларидан ташкил топган халқимиз учун ғоят масъулиятли ва шарафли жараён – Асосий Қонунимизга киритилаётган ўзгаришларни маъқуллаш учун ўтказилаётган умумхалқ референдумига саноқлигина кунлар қолди.

Мамлакатимизнинг барча ҳудудларида бўлгани каби туманимизда  ҳам ушбу муҳим сиёсий жараёнга пухта ҳозирлик кўрилди. Референдум ўтказувчи участкалар зарур жиҳозлар, ахборот технология воситалари билан жиҳозланиб, фуқароларнинг эмин-эркин овоз беришлари учун шароитлар яратилди. Референдум олди тарғибот-ташвиқот тадбирларида аҳолига Конституциямизга киритилаётган ўзгаришлар, уларнинг зарурлиги ва аҳамияти кенг тушунтирилди.

Шуниси эътиборлики, Асосий Қонунимизга киритилаётган ўзгаришларнинг барчасида халқимизнинг хоҳиш-иродаси ўз аксини топган. Яъни мамлкатимиз аҳолисининг 220 мингдан  ортиқ фикр, таклифлари қабул қилинган ва таҳлил қилиниб, киритилаётган ўзгаришларда ўз ифодасини топган.

Шу йилнинг 27 апрелида туманимизнинг Қиличбой овулида ҳам Асосий Қонунимизга киритилаётган ўзгаришлар, умумхалқ референдумида фаоллик  билан қатнашиб, ўзгаришларни қўллаб-қувватлаш тарғиб этилган тадбир бўлиб ўтди.

Тадбирни овул фуқаролар йиғини раиси Баҳром Қодиров очди ва иштирокчиларни бефарқ бўлмай, 30 апрель куни бўлиб ўтадиган умумхалқ референдумида фаол қатнашиб, киритилаётган ўзгаришларни қўллаб-қувватлашга чақирди. Овулдаги Маданият маркази олдига йиғилган турли ёшдаги аҳоли унинг чақириғини қарсаклар билан олқишлади.

Олий Мажлис Қонунчилик палатаси депутати, Қиличбой элининг номдор фарзанди, ана шундай масъулиятли сиёсий жараён арафасида овулдошлари билан ҳамнафас  бўлиб турган Зумрад Бекатова ҳам сўзга чиқиб, Конституцияга киритилаётган ўзгаришлар хусусида батафсил гапирди ва барчани бу ўзгаришларга бефарқ бўлмасликка, қўллаб-қувватлашга  даъват этди. Таъкидланганидек, авваллари фуқарони  ишга қабул қилишда, тегишли лавозимларга тайинлашда яқин қариндошларининг судланганлик ҳолатига, ёхуд ижтиимоий келиб чиқишига қаралар эди. Афсуски бундай ёндашувдан азият чеккан, маҳорати, иқтидори топталганлар кўп бўлди. Ушбу адолатсиз тамойилга чек қўйиш мақсадида янги Конституцияда шахснинг судланганлиги ва бундан келиб чиқадиган ҳуқуқий оқибатлар унинг қариндошлари ҳуқуқларини чеклаш учун асос бўлиши мумкин эмаслиги қонун билан мустаҳкамланмоқда. Шунингдек 53-модданинг биринчи қисмида “Ҳар кимга илмий, техникавий ва бадиий ижод экинлиги, маданият ютуқларидан фойдаланиш ҳуқуқи кафолатланади. Интеллектуал мулк қонун билан муҳофаза қилинади”, дейилган. Бу норма бадиий ижод эркинлигининг ҳимоя қилиш ҳамда адибларни рассомларни, актёр ва режиссёрларни, оммавий ахборот воситалари вакилларини, истеъдодли ёш ижодкорларни қўллаб-қувватлашга қаратилгани билан аҳамиятлидир.

Маърузачи сўзи  охирида овулдошларини ҳар бир ўзгариш инсон бахт-саодати, юрт тинчлигига хизмат қилишини таъкидлаб, барчани референдумда фаол иштирок этиб, ўзгаришларни қўллаб-қувватлашга даъват этди.

Тадбирда 2-сектор раҳбари, туман прокурори Азиз Рўзметов ҳам сўзга чиқиб, аҳолини референдумда қатнашишга чақирди.

Тарғибот тадбири Қиличбой Маданият марказида фаолият юритаётган тўгараклар аъзолари иштирокида тайёрланган концерт дастури билан давом этди.

Ойгул РАЖАБОВА.