QILIChBOYDA TARGʻIBOT TADBIRI BOʻLIB OʻTDI

Azal-azaldan bir oila farzandlariday Oʻzbekiston zaminida ahil va hamjihatlikda, qon-qarindoshlik, doʻst-birodarlik rishtalari bilan mustahkam bogʻlanib umrguzaronlik qilib kelayotgan turli millat vakillaridan tashkil topgan xalqimiz uchun gʻoyat masʼuliyatli va sharafli jarayon – Asosiy Qonunimizga kiritilayotgan oʻzgarishlarni maʼqullash uchun oʻtkazilayotgan umumxalq referendumiga sanoqligina kunlar qoldi.

Mamlakatimizning barcha hududlarida boʻlgani kabi tumanimizda  ham ushbu muhim siyosiy jarayonga puxta hozirlik koʻrildi. Referendum oʻtkazuvchi uchastkalar zarur jihozlar, axborot texnologiya vositalari bilan jihozlanib, fuqarolarning emin-erkin ovoz berishlari uchun sharoitlar yaratildi. Referendum oldi targʻibot-tashviqot tadbirlarida aholiga Konstitutsiyamizga kiritilayotgan oʻzgarishlar, ularning zarurligi va ahamiyati keng tushuntirildi.

Shunisi eʼtiborliki, Asosiy Qonunimizga kiritilayotgan oʻzgarishlarning barchasida xalqimizning xohish-irodasi oʻz aksini topgan. Yaʼni mamlkatimiz aholisining 220 mingdan  ortiq fikr, takliflari qabul qilingan va tahlil qilinib, kiritilayotgan oʻzgarishlarda oʻz ifodasini topgan.

Shu yilning 27-aprelida tumanimizning Qilichboy ovulida ham Asosiy Qonunimizga kiritilayotgan oʻzgarishlar, umumxalq referendumida faollik  bilan qatnashib, oʻzgarishlarni qoʻllab-quvvatlash targʻib etilgan tadbir boʻlib oʻtdi.

Tadbirni ovul fuqarolar yigʻini raisi Bahrom Qodirov ochdi va ishtirokchilarni befarq boʻlmay, 30-aprel kuni boʻlib oʻtadigan umumxalq referendumida faol qatnashib, kiritilayotgan oʻzgarishlarni qoʻllab-quvvatlashga chaqirdi. Ovuldagi Madaniyat markazi oldiga yigʻilgan turli yoshdagi aholi uning chaqirigʻini qarsaklar bilan olqishladi.

Oliy Majlis Qonunchilik palatasi deputati, Qilichboy elining nomdor farzandi, ana shunday masʼuliyatli siyosiy jarayon arafasida ovuldoshlari bilan hamnafas  boʻlib turgan Zumrad Bekatova ham soʻzga chiqib, Konstitutsiyaga kiritilayotgan oʻzgarishlar xususida batafsil gapirdi va barchani bu oʻzgarishlarga befarq boʻlmaslikka, qoʻllab-quvvatlashga  daʼvat etdi. Taʼkidlanganidek, avvallari fuqaroni  ishga qabul qilishda, tegishli lavozimlarga tayinlashda yaqin qarindoshlarining sudlanganlik holatiga, yoxud ijtiimoiy kelib chiqishiga qaralar edi. Afsuski bunday yondashuvdan aziyat chekkan, mahorati, iqtidori toptalganlar koʻp boʻldi. Ushbu adolatsiz tamoyilga chek qoʻyish maqsadida yangi Konstitutsiyada shaxsning sudlanganligi va bundan kelib chiqadigan huquqiy oqibatlar uning qarindoshlari huquqlarini cheklash uchun asos boʻlishi mumkin emasligi qonun bilan mustahkamlanmoqda. Shuningdek 53-moddaning birinchi qismida “Har kimga ilmiy, texnikaviy va badiiy ijod ekinligi, madaniyat yutuqlaridan foydalanish huquqi kafolatlanadi. Intellektual mulk qonun bilan muhofaza qilinadi”, deyilgan. Bu norma badiiy ijod erkinligining himoya qilish hamda adiblarni rassomlarni, aktyor va rejissyorlarni, ommaviy axborot vositalari vakillarini, isteʼdodli yosh ijodkorlarni qoʻllab-quvvatlashga qaratilgani bilan ahamiyatlidir.

Maʼruzachi soʻzi  oxirida ovuldoshlarini har bir oʻzgarish inson baxt-saodati, yurt tinchligiga xizmat qilishini taʼkidlab, barchani referendumda faol ishtirok etib, oʻzgarishlarni qoʻllab-quvvatlashga daʼvat etdi.

Tadbirda 2-sektor rahbari, tuman prokurori Aziz Roʻzmetov ham soʻzga chiqib, aholini referendumda qatnashishga chaqirdi.

Targʻibot tadbiri Qilichboy Madaniyat markazida faoliyat yuritayotgan toʻgaraklar aʼzolari ishtirokida tayyorlangan kontsert dasturi bilan davom etdi.

Oygul RAJABOVA.