“КОНСТИТУЦИЯ ВА ЁШЛАР” МАВЗУСИДА СЕМИНАР ТАШКИЛ ЭТИЛДИ

Конституциямиз мустақил, суверен демократик давлат барпо этиш, инсон манфаатлари, ҳуқуқ ва унинг ҳимоясини кафолатлаш, шунингдек, инсон манфаатлари, ҳуқуқ ва эркинликлари олий қадрият ҳисобланган фуқаролик жамиятини шакллантиришнинг асосий пойдеворидир.

Шахс, жамият ва давлат учун энг муҳим бўлган қоидани ўзида ифода этиб, мамлакатимизда баркамол авлод тарбиясини ташкил этишни ҳуқуқий мустаҳкамлашга хизмат қилувчи Бош Қомусимизнинг ҳар бир бўлим, боб ва моддасининг ҳаётимиздаги аҳамияти ва ўрнини ёш авлодга чуқур етказиш мақсадида Қорақалпоқ Давлат Университетининг доценти, юридика фанлар номзоди Қурбонбой Саидназаров иштирокида “Конституция ва ёшлар” мавзусида семинар ташкил этилди.

Шу йил 5 май куни 35-сонли мактабда бўлиб ўтган ушбу семинарда 35-, 17-, 73-, 83-сонли мактабларнинг тарих ва давлат ҳуқуқ асослари фани ўқитувчилар ҳамда мактабнинг 11-синф ўқувчилар қатнашишди.

Семинарда юридика фанлар номзоди Қурбонбой Саидназаров сўзга чиқиб, яқинда бўлиб ўтган референдум ва шу йил 1 майдан кучга кирган Ўзбекистон Республикасининг янги таҳрирдаги Конституцияси хусусида гапирди.

Таъкидланганидек, инсоният тарихига назар ташлар эканмиз, фаровон жамият барпо этишни орзу қилган, инсон қадри азиз бўлган адолатли давлат қуришни ўз олдига мақсад қилган ҳар қандай халқ давлат ва ҳуқуқ тараққиётининг машаққатли ва шарафли йўлини босиб ўтганига гувоҳ бўламиз. Сўнгги йилларда халқимиз янги улуғвор марралар сари собит қадамлар ташлаганча барча тўсиқ ва қийинчиликларни енгиб ўтиб, моҳиятан бир-бирини тақозо этувчи сиёсий, иқтисодий, ижтимоий ва ҳуқуқий соҳалардаги изчил ислоҳотларни амалга оширмоқда.

Семинар давомида Ўзбекистон Марказий сайлов комиссияси томонидан 30 апрель куни ўтказилган референдум якунлари тўғрисида қарор қабул қилингани, Қарорга асосан, “Ўзбекистон Республикаси Конституцияси тўғрисида”ги Ўзбекистон Республикаси Конституциявий қонуни референдумда умумхалқ овоз бериш орқали қабул қилинган деб тан олингани, Қонун мазкур қарор расмий эълон қилинган кун – 1 майдан эътиборан кучга киргани тўғрисида маълумот берилди. Шунингдек, янги Конституция 6 бўлим, 155 моддадан иборатлиги, эндиликда Конституция нормаларига тегишли қонунлар ва бошқа норматив-ҳуқуқий ҳужжатлар қабул қилинишидан ёки мавжудлигидан қатъий назар, тўғридан-тўғри амал қилиниши таъкидлаб ўтилди.

Ундан ташқари, бунга қадар 1992 йилдан буён Констититуцияга жами 15 марта ўзгартиш киритилгани, бу сафар эса ўзгаришлар кўлами катталиги сабаб ҳужжатнинг янги таҳрири қабул қилингани, янгиланиш натижасида, бош Қомусдаги моддалар сони 128 тадан 155 тага, ундаги нормалар эса 275 тадан 434 тага ошгани тўғрисида ҳам маълумотлар берилди. Ушбу Конституцияда ўқитувчилар алоҳида эътироф этилгани, ўқитувчилар ҳақида 2 банддан иборат янги модда қўшилгани ҳақида ҳам айтиб ўтилди.

Шундан сўнг, ўқитувчи ва ўқувчилар янги Конституция бўйича ўзларини қизиқтирган саволларни бериб, тўлиқ жавоблар олдилар.

О.Худойберганова