“KONSTITUTsIYa VA YoShLAR” MAVZUSIDA SEMINAR TAShKIL ETILDI

Konstitutsiyamiz mustaqil, suveren demokratik davlat barpo etish, inson manfaatlari, huquq va uning himoyasini kafolatlash, shuningdek, inson manfaatlari, huquq va erkinliklari oliy qadriyat hisoblangan fuqarolik jamiyatini shakllantirishning asosiy poydevoridir.

Shaxs, jamiyat va davlat uchun eng muhim boʻlgan qoidani oʻzida ifoda etib, mamlakatimizda barkamol avlod tarbiyasini tashkil etishni huquqiy mustahkamlashga xizmat qiluvchi Bosh Qomusimizning har bir boʻlim, bob va moddasining hayotimizdagi ahamiyati va oʻrnini yosh avlodga chuqur yetkazish maqsadida Qoraqalpoq Davlat Universitetining dotsenti, yuridika fanlar nomzodi Qurbonboy Saidnazarov ishtirokida “Konstitutsiya va yoshlar” mavzusida seminar tashkil etildi.

Shu yil 5-may kuni 35-sonli maktabda boʻlib oʻtgan ushbu seminarda 35-, 17-, 73-, 83-sonli maktablarning tarix va davlat huquq asoslari fani oʻqituvchilar hamda maktabning 11-sinf oʻquvchilar qatnashishdi.

Seminarda yuridika fanlar nomzodi Qurbonboy Saidnazarov soʻzga chiqib, yaqinda boʻlib oʻtgan referendum va shu yil 1-maydan kuchga kirgan Oʻzbekiston Respublikasining yangi tahrirdagi Konstitutsiyasi xususida gapirdi.

Taʼkidlanganidek, insoniyat tarixiga nazar tashlar ekanmiz, farovon jamiyat barpo etishni orzu qilgan, inson qadri aziz boʻlgan adolatli davlat qurishni oʻz oldiga maqsad qilgan har qanday xalq davlat va huquq taraqqiyotining mashaqqatli va sharafli yoʻlini bosib oʻtganiga guvoh boʻlamiz. Soʻnggi yillarda xalqimiz yangi ulugʻvor marralar sari sobit qadamlar tashlagancha barcha toʻsiq va qiyinchiliklarni yengib oʻtib, mohiyatan bir-birini taqozo etuvchi siyosiy, iqtisodiy, ijtimoiy va huquqiy sohalardagi izchil islohotlarni amalga oshirmoqda.

Seminar davomida Oʻzbekiston Markaziy saylov komissiyasi tomonidan 30-aprel kuni oʻtkazilgan referendum yakunlari toʻgʻrisida qaror qabul qilingani, Qarorga asosan, “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni referendumda umumxalq ovoz berish orqali qabul qilingan deb tan olingani, Qonun mazkur qaror rasmiy eʼlon qilingan kun – 1-maydan eʼtiboran kuchga kirgani toʻgʻrisida maʼlumot berildi. Shuningdek, yangi Konstitutsiya 6 boʻlim, 155 moddadan iboratligi, endilikda Konstitutsiya normalariga tegishli qonunlar va boshqa normativ-huquqiy hujjatlar qabul qilinishidan yoki mavjudligidan qatʼiy nazar, toʻgʻridan-toʻgʻri amal qilinishi taʼkidlab oʻtildi.

Undan tashqari, bunga qadar 1992-yildan buyon Konstititutsiyaga jami 15-marta oʻzgartish kiritilgani, bu safar esa oʻzgarishlar koʻlami kattaligi sabab hujjatning yangi tahriri qabul qilingani, yangilanish natijasida, bosh Qomusdagi moddalar soni 128 tadan 155 taga, undagi normalar esa 275 tadan 434 taga oshgani toʻgʻrisida ham maʼlumotlar berildi. Ushbu Konstitutsiyada oʻqituvchilar alohida eʼtirof etilgani, oʻqituvchilar haqida 2 banddan iborat yangi modda qoʻshilgani haqida ham aytib oʻtildi.

Shundan soʻng, oʻqituvchi va oʻquvchilar yangi Konstitutsiya boʻyicha oʻzlarini qiziqtirgan savollarni berib, toʻliq javoblar oldilar.

O.Xudoyberganova