ХОТИРА ВА ҚАДРЛАШ КУНИ МУНОСАБАТИ БИЛАН МАРАФОН ЎТКАЗИЛДИ

Мамлакатимизда аҳоли саломатлигини мустаҳкамлаш, соғлом турмуш тарзи кўникмаларини ривожлантириш, жисмоний фаоллигини ошириш мақсадида амалга оширилаётган чора-тадбирлар натижасида қишлоқ ва маҳаллаларда саломатлик гузарлари, минифутбол, стритбол, волейбол ва баскетбол майдончалари ташкил этилиб, болалар ва ўсмирлар, ёшлар ва кексалар ўртасида турли хил спорт мусобақалари ўтказилиб келинмоқда. Айниқса, турли байрам саналари муносабати билан амалга оширилаётган марафон мусобақаларида аҳолининг барча ёш тоифасидаги қатлами кенг қамраб олинаётгани аҳоли ўртасида спортни янада оммалаштириш имконини бермоқда.

Ўзбекистон Республикаси Президентининг 2021 йил 5 ноябрдаги “Юриш, югуриш, минифутбол, бадминтон, стритбол ва воркаутспорт турларни ривожлантириш чора-тадбирлари тўғрисида”ги Қарори ижросини таъминлаш мақсадида амалга оширилаётган кенг миқёсли чора-тадбирлар туфайли эрталабки юриш, югуриш, минифутбол, бадминтон, стритбол ва воркаутспорт аҳоли ўртасида тобора оммалашиб бормоқда.

8 май куни Хотира ва қадрлаш куни – умумхалқ байрамига бағишлаб Амударё туманида ўтказилган марафон мусобақасида ҳам турли ёш тоифасидаги спортсеварлар иштирок этишди.

Амударё туманининг қишлоқ ва маҳаллаларида истиқомат қилувчи, 16 ёшдан юқори бўлган эркаклар ва аёллар иштирокида ўтказилган мусобақалар қизиқарли таассуротларга бой тарзда ўтказилди. 196 нафар иштирокчининг 68 нафари аёл-қизлардан иборат бўлиб, ҳар бир иштирокчи олдиндан мусобақа Низоми ва зарур шартлари билан яқиндан таништирилди.

Эркаклар ўртасида бўлиб ўтган марафон мусобақалари якунига кўра, Холимбег овулидан келган жамоа аъзоси Рашидбек Искандаров фахрли 1-ўринни эгаллаб, холимбегликлар ишончини шарафли адо этди. Шунингдек, эркаклар ўртасидаги мусобақаларда Торёп маҳалласидан Яшнарбек Шукуруллаев фахрли 2-ўринни, Тўлқин овулидан Сардорбек Шомуродов эса 3-ўринни эгалладилар.

Аёл-қизлар ўртасидаги мусобақалар янада қизиқарли ва дўстона вазиятда ўтди. Унда 1-ўрин Манғит шаҳрининг Ойбек номли маҳалласидан Динора Озодовага насиб этди. 2-ўринни Куюк кўпир овулидан Мухлисахон Тожибоева эгаллаган бўлса, 3-ўрин Мухлисахоннинг ҳамқишлоғи, яна бир Куюк кўпир овуллик спортчи Гулбону Ўринбоева ҳисобига ёзиб қўйилди.

Аҳиллик ва жипслик асосида бўлиб ўтган марафон мусобақаларда ҳар бир иштирокчи ўз қишлоғи ва маҳалласи шаъни учун курашдилар ҳамда эришган ғалабалари билан она Ватанга чексиз муҳаббат, бугунги дориломон кунлар учун жонларини фидо этган ватанпарвар, фидойи боболари хотираларига ҳурмат-эҳтиром туйғуларини намоён этдилар.

Робия ЙЎЛДОШЕВА