XOTIRA VA QADRLASh KUNI MUNOSABATI BILAN MARAFON OʻTKAZILDI

Mamlakatimizda aholi salomatligini mustahkamlash, sogʻlom turmush tarzi koʻnikmalarini rivojlantirish, jismoniy faolligini oshirish maqsadida amalga oshirilayotgan chora-tadbirlar natijasida qishloq va mahallalarda salomatlik guzarlari, minifutbol, stritbol, voleybol va basketbol maydonchalari tashkil etilib, bolalar va oʻsmirlar, yoshlar va keksalar oʻrtasida turli xil sport musobaqalari oʻtkazilib kelinmoqda. Ayniqsa, turli bayram sanalari munosabati bilan amalga oshirilayotgan marafon musobaqalarida aholining barcha yosh toifasidagi qatlami keng qamrab olinayotgani aholi oʻrtasida sportni yanada ommalashtirish imkonini bermoqda.

Oʻzbekiston Respublikasi Prezidentining 2021-yil 5-noyabrdagi “Yurish, yugurish, minifutbol, badminton, stritbol va vorkautsport turlarni rivojlantirish chora-tadbirlari toʻgʻrisida”gi Qarori ijrosini taʼminlash maqsadida amalga oshirilayotgan keng miqyosli chora-tadbirlar tufayli ertalabki yurish, yugurish, minifutbol, badminton, stritbol va vorkautsport aholi oʻrtasida tobora ommalashib bormoqda.

8-may kuni Xotira va qadrlash kuni – umumxalq bayramiga bagʻishlab Amudaryo tumanida oʻtkazilgan marafon musobaqasida ham turli yosh toifasidagi sportsevarlar ishtirok etishdi.

Amudaryo tumanining qishloq va mahallalarida istiqomat qiluvchi, 16 yoshdan yuqori boʻlgan erkaklar va ayollar ishtirokida oʻtkazilgan musobaqalar qiziqarli taassurotlarga boy tarzda oʻtkazildi. 196 nafar ishtirokchining 68 nafari ayol-qizlardan iborat boʻlib, har bir ishtirokchi oldindan musobaqa Nizomi va zarur shartlari bilan yaqindan tanishtirildi.

Erkaklar oʻrtasida boʻlib oʻtgan marafon musobaqalari yakuniga koʻra, Xolimbeg ovulidan kelgan jamoa aʼzosi Rashidbek Iskandarov faxrli 1-oʻrinni egallab, xolimbegliklar ishonchini sharafli ado etdi. Shuningdek, erkaklar oʻrtasidagi musobaqalarda Toryop mahallasidan Yashnarbek Shukurullayev faxrli 2-oʻrinni, Toʻlqin ovulidan Sardorbek Shomurodov esa 3-oʻrinni egalladilar.

Ayol-qizlar oʻrtasidagi musobaqalar yanada qiziqarli va doʻstona vaziyatda oʻtdi. Unda 1-oʻrin Mangʻit shahrining Oybek nomli mahallasidan Dinora Ozodovaga nasib etdi. 2-oʻrinni Kuyuk koʻpir ovulidan Muxlisaxon Tojiboyeva egallagan boʻlsa, 3-oʻrin Muxlisaxonning hamqishlogʻi, yana bir Kuyuk koʻpir ovullik sportchi Gulbonu Oʻrinboyeva hisobiga yozib qoʻyildi.

Ahillik va jipslik asosida boʻlib oʻtgan marafon musobaqalarda har bir ishtirokchi oʻz qishlogʻi va mahallasi shaʼni uchun kurashdilar hamda erishgan gʻalabalari bilan ona Vatanga cheksiz muhabbat, bugungi dorilomon kunlar uchun jonlarini fido etgan vatanparvar, fidoyi bobolari xotiralariga hurmat-ehtirom tuygʻularini namoyon etdilar.

Robiya YOʻLDOShEVA