9 май – Хотира ва қадрлаш куни муносабати билан Амударё тумани ҳокими Султонбой Йўлдашевнинг барча амударёликларга байрам табриги

Ҳурматли ватандошлар!

Қадрли меҳнат фахрийлари, азиз юртдошлар!

Аввало, Сиз азизларни, сизнинг тимсолингизда кўпмиллатли халқимизни Хотира ва қадрлаш куни ҳамда Иккинчи жаҳон урушида эришилган Ғалабанинг 78 йиллиги билан чин қалбимдан табриклайман! Барчангизга ўзимнинг юксак ҳурмат-эҳтиромим ва эзгу тилакларимни билдираман.

Муҳтарам фахрийлар!

Бугунги шонли санани биз доимо чексиз қувонч ва изтироб билан нишонлаймиз. Ватан озодлиги учун, ҳозирги тинч-омон кунлар учун жанг майдонларида ҳалок бўлган ота-боболаримизнинг, фронт ортида фидокорона меҳнат қилган юртдошларимизнинг муқаддас хотирасини ёд этиб, орамизда яшаётган қаҳрамонларимизга ҳурмат бажо келтирамиз.

Машъум Иккинчи жаҳон уруши миллионлаб инсонлар қатори кимнингдир бобоси ёки бувиси, яна кимнингдир ота-онаси ёки яқинларининг бевақт ўлимига сабаб бўлди. Оловли жангларда ҳалок бўлган аждодларимизнинг табаррук қони, ўз жонини хатарга қўйиб юртини асраган ота-боболаримизнинг матонати, туну-кун оромидан кечиб, фронт ортида заҳмат чеккан юртдошларимизнинг пешона тери эвазига қўлга киритилган Ғалаба барчамиз учун қадрлидир. Бу йўлда ҳалок бўлганларнинг хотираси қалбимизда абадий, шу кунларга етган табаррук бобо ва момоларимизнинг қадри эса ҳамма нарсадан улуғдир!

Ҳеч шубҳасиз, орадан қанча йиллар, замонлар ўтмасин, фашизм устидан қозонилган Ғалабанинг қадр-қиммати ва аҳамияти тобора ортиб бораверади.

Инсоният тарихидаги энг даҳшатли бу урушда ўша пайтдаги жами 6 миллион Ўзбекистон аҳолисининг 1 ярим миллиондан ортиғи қатнашган. Уларнинг ярим миллиондан зиёди жанг майдонларида ҳалок бўлишган. 133 минг нафарга яқини бедарак йўқолган. 60 мингдан ортиқ ватандошимиз эса урушдан ногирон бўлиб қайтган.

Туманимиздан эса 4 минг 344 нафар юртдошимиз урушга қатнашиб, уларнинг 897 нафари жанг майдонларида ҳалок бўлган бўлса, 1 минг 927 нафари бедарак йўқолган ҳамда 1 минг 500 нафарга яқини ўз уйларига ногирон бўлиб қайтганлар.

Ўзбекистон аҳли уруш ҳудудларидан кўчириб келтирилган 1 миллионга яқин инсонга бошпана бериб, ўз нонини улар билан баҳам кўришди. Ота-онаси, оиласидан жудо бўлган 200 минг нафар бегуноҳ болаларни “Сен етим эмассан!” деб бағрига босиб, меҳр-мурувват кўрсатдилар.

Биз бу рақамларни ҳар йили 9 май санасида қайта-қайта эсга оламиз. Булар шунчаки оддий рақамлар эмас. Уларнинг замирида муштипар оналаримиз, мотамсаро момоларимиз, мард ва жасур оталаримиз, бутун халқимизнинг қалбидаги чексиз қайғу ва ҳасрат мужассам.

Қадрли юртдошлар!

Уруш халқимизнинг иродасини синовдан ўтказди. Аждодларимиз синовли йилларда ҳам шароит оғир бўлишига қарамай, асрлар оша мерос бўлиб келаётган Ватанга муҳаббат, садоқат туйғуларини йўқотмай, одамийлик намунасини кўрсатди. Уйда қолган хотин-қизлар, кексалар ва болалар қишлоқ хўжалигида, завод ва фабрикаларда кечаю кундуз меҳнат қилиб, ўзлари емай, киймай фронтга жўнатган. Бу ҳам қаҳрамонлик ва жасорат намунасидир.

Бугунги таҳликали дунёда юз бераётган воқеалар барчамизни тинчликнинг қадрига етишга ундайди. Яқин қўшниларимиз бўлган давлатларда содир бўлган ва давом этаётган нотинчликлар, дунёнинг турли нуқталарида бўлаётган урушлар миллионлаб тинч аҳолини ўз домига тортиб, шаҳар ва қишлоқларнинг вайрон бўлишига, юз минглаб аҳоли, айниқса бегуноҳ гўдакларнинг ҳаётдан бевақт кўз юмишига сабаб бўлмоқда. Бу урушлар тинч аҳоли бошига қандай оғир азоб-уқубат ва талофатлар, беҳисоб қурбонлар олиб келганига барчамиз гувоҳ бўлмоқдамиз.

Aлбатта, ушбу мудҳиш урушлар оқибатлари бебаҳо неъмат − тинчликнинг қадрига етишга, доимо ҳушёр ва огоҳ бўлиб яшашга, ёшларимиз онгини бузғунчи ғоялардан ҳимоя қилиб Ватанга садоқат руҳида тарбиялашга чорлаб туради.

Азиз дўстлар!

Мамлакатимизда кейинги йилларда барча соҳаларда туб ислоҳотлар амалга оширилмоқда. Инсон қадри ва манфаати йўлида амалга оширилаётган бу улкан ўзгаришлар, бошқаларнинг ҳавасини тортадиган ютуқ ҳамда марраларга эришганимизнинг ортида улуғ неъмат − тинчлик ва осойишталик турибди.

Туманимизда амалга оширилаётган бунёдкорлик, ободонлаштириш ишлари ҳам шулар жумласидандир. Кейинги йилларда биргина Амударё туманида юзлаб оилалар учун мўлжалланган намунавий лойиҳалар асосидаги арзонлаштирилган уй-жойлар, таълим ва тиббиёт муассасалари, маҳалла фуқаролар йиғинларининг, юзлаб янги тадбиркорлик субъектларининг бинолари қўрилиб, фойдаланишга топширилди.

Азиз юртдошлар, муҳтарам фахрийлар!

Бугунги қутлуғ айём − Хотира ва қадрлаш кунида ота-боболаримизнинг шонли анъаналарини муносиб давом эттириб, Ватан ҳимояси йўлида ўзини аямасдан, фидокорона хизмат қилаётган мард ва жасур аскарларимизга, офицер ва посбонларимизга туманимиз аҳли номидан самимий миннатдорчилик изҳор этамиз. 

Фурсатдан фойдаланиб, муҳтарам фахрийларимизни, ҳамюртларимизни ушбу қутлуғ байрам билан яна бир бор муборакбод этаман.

Барчангизга тинчлик-омонлик, хонадонларингизга қут-барака тилайман. Юртимиз тинч, осмонимиз мусаффо бўлсин!