ТИНЧЛИКНИНГ ҚАДРИНИ УРУШ КЎРГАНЛАР АЙТДИ
Уруш! Бу сўз замиридаги даҳшатни, талофатларни, вайронагарчиликларни ва бегуноҳ инсонларга етказувчи азоб-уқубатларини фақат бошидан ўтказганларгина тўла ҳис қилишади. Шу боисдан ҳам улар тинчлик-осойишталик қадрини чуқур англайдилар, бугунгидай фаровон, дориломон кунларга беадад шукрона айтиб яшайдилар.
1979 йилда бошланиб, қарийб 10 йилга яқин муддат давом этган афғон уруши қатнашчилари ана шундай инсонлар тоифасидан.
Ҳар йили 9 май – Хотира ва қадрлаш куни олдидан бутун мамлакатимизда бўлгани каби туманимизда ҳам йигитлик куч-ғайрати, соғлиғини йўқотиб, турли жароҳатлар олиб бўлса-да омон қайтган фахрий афғончи жангчилар иштирокида турли тадбирлар ўтказилади, уларга совғалар ҳадя қилинади.
Шу йилнинг 5 май куни 76-сонли мактабда ҳам афғон уруши қатнашчилари Мамбатсолий Абдуллаев, Озод Хўжаниёзов, Анвар Қўшбоев, Зарифбой Эшниёзовлар билан учрашув ўтказилди.
Тадбирни мактаб директорининг маънавий-маърифий ишлар бўйича ўринбосари Дилфуза Якубова очди ва олиб борди. У ўз сўзида ўқувчиларга Афғонистонда 1979 йилдан 1989 йилгача давом этган машъум уруш, ушбу урушга туманимизнинг ҳам кўпгина илмли, иқтидорли ва жасур йигитлари жалб этилганлиги хусусида батафсил маълумотлар берди.
Тадбирда сўзга чиққан азиз меҳмонлар – афғон уруши иштирокчилари ўзларининг жанг майдонларида бошидан ўтказган азоблари ҳақида, тинчлик улуғ неъмат эканлиги, уни асраш лозимлиги хусусида гапириб бердилар ва ёшларни бугунгидай дориломон даврда уларга яратилган шароитлардан унумли фойдаланиб, илм олиб, улғайиб, элга муносиб бўлиб вояга етишга даъват этдилар.
Тадбир ўқувчиларда чуқур таассуротлар қолдирди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
