БОШЛАНҒИЧ СИНФ БИТИРУВЧИЛАРИ БИРИНЧИ УСТОЗИГА ЭҲТИРОМ КЎРСАТДИЛАР

Айни кунларда бутун мамлакатимиз бўйлаб умумтаълим мактабларида бошланғич синфлар битирувчилари учун ҳаяжонли дамлар – уларга оқ-қорани танитган, ҳаётнинг мазмун-моҳиятини англатган, илмнинг сирли-синоатли манзиллари томон илк йўл кўрсатган азиз устозларига юксак ҳурмат-эҳтиром рамзи сифатида “Хайр, биринчи устозим!” адабий-мусиқий хайрлашув тадбирлари бўлиб ўтмоқда.

Халқимиз ўқитувчини “йўлчи юлдуз, ҳаётимиз чароғбони”, дея улуғлашади. Оташнафас ўзбек шоири Шуҳрат:

“Агар ҳаёт карвон бўлса, сарбон муаллим,

Агар ҳаёт узук бўлса, гавҳар муаллим”,

дея устознинг мақомини юксак ҳурмат ва эҳтиром ила мадҳ этган эдилар. Ҳақиқатан ҳам бу ҳаёт карвонининг бошида устоз тургани учун ҳам инсоният буюк ишлар кашфиётчиси, улуғ олим-у арбоб, жамики эзгуликлар меъмори сифатида шаклланди.

Манғит шаҳридаги 16-сонли умумтаълим мактабининг 4-В синф битирувчиларининг теран нигоҳларида, бурро сўзлашларида, одоб-у ахлоқида азиз ва муҳтарама биринчи устозлари Матлуба Раҳимованинг жуда катта ва фидойи меҳнатлари акс этиб турган бўлса, не ажаб!

Чунки мазкур синф ўқувчилари 4 йил давомида биринчи устозлари Матлуба Раҳимова раҳбарлигида илмнинг сирли эшикларини бирма-бир очиб, зукко ва билимдон, интилувчан ўқувчиларга айландилар. Кейинги ҳаётлари учун илк тамал тошини Матлуба Раҳимова раҳбарлигида қўйдилар. Тадбирда 4-В синф ўқувчилари 4 йил давомида эгаллаган бошланғич таълим асослари бўйича гуруҳларга бўлиниб, савол-жавоблар орқали ўз билимларини намойиш этдилар. Ўрганган шеърларини ифодали ўқиб бердилар. Устозидан миннатдорлик рамзи сифатида саҳнавий кўринишларни тақдим этишиб, куй ва қўшиқлар ижро этишди.

Ўқувчилар 4 йил давомида жуда катта ютуқларни қўлга киритишди. Хусусан, Диёрбек Қўчқорбоев инглиз тили фанидан ўтказилган онлайн олимпиадада туманда фахрли 2-ўринни, Дурбек Нурбеков эса математика фанидан бошланғич синфлар ўртасида ўтказилган онлайн олимпиадада туманда фахрли 1-ўринни эгаллашди. Дилором Илҳамова спортнинг бадиий гимнастика йўналишида Республика миқёсида совриндор бўлди. Саидбек Давлатбоев эса ментал арифметика билимдони. Суҳроб Соатбоев 10 ёшли болалар орасида моҳир футболчи, Зарина Файзуллаева инглиз тили фани бўйича онлайн олимпиаданинг туман ғолиби. Қисқаси, 26 нафар 4-В синф битирувчи ўқувчиларнинг ҳар бири бир олам.

“Хайр, биринчи устозим!” тадбирининг азиз меҳмонлари бўлган ота-оналар фарзандларининг гўзал хулқ-атворли, ўзаро аҳил ва иноқ дўстлар бўлиб вояга етаётганидан, айниқса, оила билан мактаб ҳамкорлигининг натижаси сифатида ҳар бир ўқувчининг мурғак қалбида она юртга, халқимизга, азиз устозларига чексиз меҳр-муҳаббат туйғулари шаклланганидан миннатдор эканликларини изҳор этдилар.

Шуни мамнуният билан эътироф этиш керакки, тадбирда ҳар бир ўқувчи кўзида севинч ёшлари билан биринчи устозига ўз сўзини айтишди: жўшқинлик, дадиллик акс этиб турган хатти-ҳаракатлари билан биринчи устозига чин шогирдлик сўзини беришди. Саҳнада бир-бирларининг қўлларидан тутиб, аҳил ва жипсликларини намоён қилдилар ва янги 2023-2024 ўқиш йилида янада жипслик билан илм олишга, биринчи устозининг ишончига бутун умр сазовор яшашга, мустақил Ўзбекистонга муносиб фарзандлар бўлиб камолга етишга аҳд қилдилар.

Тадбир якунида битирувчи 4-В синф ўқувчилари “Хайр, биринчи устозим!” дея баралла куйладилар ва рақсга тушдилар.

Робия ЙЎЛДОШЕВА.