BOShLANGʻICh SINF BITIRUVChILARI BIRINChI USTOZIGA EHTIROM KOʻRSATDILAR

Ayni kunlarda butun mamlakatimiz boʻylab umumtaʼlim maktablarida boshlangʻich sinflar bitiruvchilari uchun hayajonli damlar – ularga oq-qorani tanitgan, hayotning mazmun-mohiyatini anglatgan, ilmning sirli-sinoatli manzillari tomon ilk yoʻl koʻrsatgan aziz ustozlariga yuksak hurmat-ehtirom ramzi sifatida “Xayr, birinchi ustozim!” adabiy-musiqiy xayrlashuv tadbirlari boʻlib oʻtmoqda.

Xalqimiz oʻqituvchini “yoʻlchi yulduz, hayotimiz charogʻboni”, deya ulugʻlashadi. Otashnafas oʻzbek shoiri Shuhrat:

“Agar hayot karvon boʻlsa, sarbon muallim,

Agar hayot uzuk boʻlsa, gavhar muallim”,

deya ustozning maqomini yuksak hurmat va ehtirom ila madh etgan edilar. Haqiqatan ham bu hayot karvonining boshida ustoz turgani uchun ham insoniyat buyuk ishlar kashfiyotchisi, ulugʻ olim-u arbob, jamiki ezguliklar meʼmori sifatida shakllandi.

Mangʻit shahridagi 16-sonli umumtaʼlim maktabining 4-V sinf bitiruvchilarining teran nigohlarida, burro soʻzlashlarida, odob-u axloqida aziz va muhtarama birinchi ustozlari Matluba Rahimovaning juda katta va fidoyi mehnatlari aks etib turgan boʻlsa, ne ajab!

Chunki mazkur sinf oʻquvchilari 4-yil davomida birinchi ustozlari Matluba Rahimova rahbarligida ilmning sirli eshiklarini birma-bir ochib, zukko va bilimdon, intiluvchan oʻquvchilarga aylandilar. Keyingi hayotlari uchun ilk tamal toshini Matluba Rahimova rahbarligida qoʻydilar. Tadbirda 4-V sinf oʻquvchilari 4-yil davomida egallagan boshlangʻich taʼlim asoslari boʻyicha guruhlarga boʻlinib, savol-javoblar orqali oʻz bilimlarini namoyish etdilar. Oʻrgangan sheʼrlarini ifodali oʻqib berdilar. Ustozidan minnatdorlik ramzi sifatida sahnaviy koʻrinishlarni taqdim etishib, kuy va qoʻshiqlar ijro etishdi.

Oʻquvchilar 4-yil davomida juda katta yutuqlarni qoʻlga kiritishdi. Xususan, Diyorbek Qoʻchqorboyev ingliz tili fanidan oʻtkazilgan onlayn olimpiadada tumanda faxrli 2-oʻrinni, Durbek Nurbekov esa matematika fanidan boshlangʻich sinflar oʻrtasida oʻtkazilgan onlayn olimpiadada tumanda faxrli 1-oʻrinni egallashdi. Dilorom Ilhamova sportning badiiy gimnastika yoʻnalishida Respublika miqyosida sovrindor boʻldi. Saidbek Davlatboyev esa mental arifmetika bilimdoni. Suhrob Soatboyev 10 yoshli bolalar orasida mohir futbolchi, Zarina Fayzullayeva ingliz tili fani boʻyicha onlayn olimpiadaning tuman gʻolibi. Qisqasi, 26 nafar 4-V sinf bitiruvchi oʻquvchilarning har biri bir olam.

“Xayr, birinchi ustozim!” tadbirining aziz mehmonlari boʻlgan ota-onalar farzandlarining goʻzal xulq-atvorli, oʻzaro ahil va inoq doʻstlar boʻlib voyaga yetayotganidan, ayniqsa, oila bilan maktab hamkorligining natijasi sifatida har bir oʻquvchining murgʻak qalbida ona yurtga, xalqimizga, aziz ustozlariga cheksiz mehr-muhabbat tuygʻulari shakllanganidan minnatdor ekanliklarini izhor etdilar.

Shuni mamnuniyat bilan eʼtirof etish kerakki, tadbirda har bir oʻquvchi koʻzida sevinch yoshlari bilan birinchi ustoziga oʻz soʻzini aytishdi: joʻshqinlik, dadillik aks etib turgan xatti-harakatlari bilan birinchi ustoziga chin shogirdlik soʻzini berishdi. Sahnada bir-birlarining qoʻllaridan tutib, ahil va jipsliklarini namoyon qildilar va yangi 2023-2024 oʻqish yilida yanada jipslik bilan ilm olishga, birinchi ustozining ishonchiga butun umr sazovor yashashga, mustaqil Oʻzbekistonga munosib farzandlar boʻlib kamolga yetishga ahd qildilar.

Tadbir yakunida bitiruvchi 4-V sinf oʻquvchilari “Xayr, birinchi ustozim!” deya baralla kuyladilar va raqsga tushdilar.

Robiya YOʻLDOShEVA.