Амударё туманидаги барча мактабларда сўнгги қўнғироқ чалинди
Бугун – 25 май куни мамлакатимизнинг барча жойларида бўлгани каби Амударё туманидаги умумтаълим мактабларида ҳам сўнгги қўнғироқ жаранглаб, жорий ўқув йили ниҳоясига етиши муносабати билан “Хайр, мактабим!” номли тадбирлар ўтказилди.
Амударё тумани Мактабгача ва мактаб таълими бўлимига қарашли 31-сонли умумтаълим мактабида 2022-2023 ўқув йили якунига бағишланган “Сўнгги қўнғироқ” тадбирида Қорақалпоғистон Республикаси Вазирлар Кенгаши Раиси Фарҳод Эрманов, туман ҳокими Султонбой Йўлдашевлар, секторлар раҳбарлари ва бошқа масъуллар иштирок этишди.
Тадбир байрамона безатилган мактаб ҳовлисида Ўзбекистон ва Қорақалпоғистон Республикаларининг давлат мадҳиялари садолари остида бошланди.
Тадбирда Қорақалпоғистон Республикаси Вазирлар Кенгаши Раиси Фарҳод Эрманов сўзга чиқиб, ўқитувчилар, ота-оналар барча битирувчиларни унутилмас сана — "Сўнгги қўнғироқ" байрами билан самимий қутлади, уларнинг келгуси ишларига муваффақият ва зафарлар тилади.
Туман ҳокими Султонбой Йўлдашев мактаб битирувчиларининг юртимизда яратилган имкониятлардан тўлиқ фойдаланган ҳолда, етук мутахассислар бўлиб етишишларига юртимиздаги замонавий кластерлар, фермер хўжаликлари, ишлаб чиқариш корхоналари, катта-катта қурилишлар, фирма ва компаниялар, давлат ва нодавлат ташкилотлар, маданий ва ижодий жамоаларда иш бошлаб, Ватанимиз равнақи, халқимиз фаровонлигини оширишга хисса қўшишларига ишонч билдирди.
Тадбирда узоқ йиллардан буён 31-сонли мактабда фаолият юритиб келаётган ўқитувчилардан бири Саним Узакбаева, битирувчиларнинг бобо ва бувилари, ота-оналари сўзга чиқишиб, ёшларни мактаб таълимини муваффақиятли тамомлагани, ҳаётидаги дастлабки муҳим довондан ошгани билан самимий қутлашди.
Тадбирда жонажон Ватанимизни, тинчлик-осойишталикни, ёшлик ва муҳаббатни, устозларга эхтиромни тараннум этувчи шеърлар ўқилди, куй-қўшиқлар ижро этилди.
Фан олимпиадалари, интеллектуал беллашувлар, ижодий танловларда, жамоат ишларида фаол иштирок этган ёшлар ва уларнинг ота-оналарига ташаккурнома ва эсдалик совғалари тантанали тарзда топширилди.
Айтиш керакки, бу йил Амударё туманидаги умумтаълим мактабларини 2 704 нафар ўқувчи ёшлар битказишмоқда.
Жумладан, 31-сонли мактабни 76 нафар битирувчилар тамомлаб, улар орасида 2 нафари олтин, 1 нафари кумуш медаль соҳиблари бўлишди.
Тадбир якунида сўнгги қўнғироқ чалинди. Битирувчилар жонажон мактаби ва ўқитувчилари билан хайрлашдилар.
Барча битирувчиларнинг давлат имтиҳонларидан муваффақиятли ўтиб, олий таълим муассасалари талабаси бўлиш бахтига эришишларига тилакдошмиз! Ўйлаймизки, ёшларимиз Президентимиз ишонч билдирганларидек, мамлакатимизда яратилган имкониятлар асосида ўз касбининг етук мутахассислари бўлиб етишиб чиқишади ҳамда Ватанимиз равнақи, халқимиз фаровонлигини оширишга муносиб ҳисса қўшишади.
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
