“ЭНГ КИТОБХОН ОИЛА БЕКАСИ” БИЛАН УЧРАШУВ ЎТКАЗИЛДИ

Китобга меҳр – бу ўз келажаги учун мустаҳкам замин яратиш сари эзгу қадамдир. Буни дилдан ҳис қилган китобхон инсонлар ҳам, уларнинг оила аъзолари ҳам юксак маънавиятли, билимдон, атрофидагиларнинг ҳавас ва эҳтиромига муносиб шахслар сифатида шаклланадилар. Шу боис, мамлакатимизда китобхон оилалар сафини янада ошириш, уларнинг маънавий-тарбиявий ишларини оммалаштириш мақсадида “Энг китобхон ибратли оила”, “Янги Ўзбекистоннинг ибратли оиласи” кўрик-танловлари ўтказилиб келинмоқда.

Амударё туманида ҳам бундай ибратли китобхон оилалар кўпчиликни ташкил этади. Ҳатто “Энг китобхон ибратли оила” кўрик-танловининг Ўзбекистон Республикаси ғолиб ва совриндорларининг ҳам борлиги қалбларда ифтихор туйғусини уйғотади.

Ўсиб келаётган ёш авлоднинг китобга бўлган меҳрини ошириш, китоб мутолаасига қизиқтириш ва уларни маънавият-маърифат масканлари – кутубхоналарга кенг жалб қилиш мақсадида жорий йилнинг 24 май санасида Амударё тумани Ахборот-кутубхона марказида 2023 йилнинг 10-30 март кунлари кутубхоначилар ўртасида ўтказилган “Китобсеварлик фестивали”нинг “Энг фаол кутубхоначи” йўналиши бўйича Қорақалпоғистон Республикаси босқичи 1-ўрин соҳибаси ва “Янги Ўзбекистоннинг ибратли китобхон оиласи” кўрик-танловининг “Энг ибратли китобхон оила бекаси” йўналиши бўйича Қорақалпоғистон Республикаси ғолиби, Назархон овулидаги Турдимуратовлар оиласи ва мазкур оиланинг “Энг китобхон оила бекаси”, моҳир кутубхоначи Тазахон Қидирниязова билан ёш китобхонларнинг учрашуви бўлиб ўтди.

Тадбирда Тазахон Қидирниязова китобхон ёшлар билан очиқ мулоқот тарзида дилдан суҳбатлашди. Суҳбат асносида у китоб мутолаасининг ўз ҳаётида тутган ўрни, китобдан олган бетакрор таассуротлари, айниқса, ҳаёт синовларини енгиб ўтишда унга китоб энг яқин ҳамдард, дўст ва масалаҳатгўй вазифасини бажаргани ҳақида ҳаётий мисоллар орқали қимматли фикрлар билдирди. Шунингдек, у фарзандлари тарбиясида, ҳаётда ўз ўрнини топиб, ўзи қизиққан йўналиш – кутубхоначилик касбида фаолият юритиб, муваффақиятларга эришишида китобхонликнинг ўрни беқиёс катта аҳамият касб этганини таъкидлади.

Дарвоқе, Тазахон Қидирниязова Амударё туманидаги 3-сонли умумтаълим мактаби кутубхоначиси. У мактаб кутубхонаси фаолиятини юритиш билан бирга кутубхона ҳузурида “Ёш ижодкорлар” гуруҳини ҳам ташкил этган. Мазкур гуруҳ ўқувчиларидан Муҳаббат Ўринбосарованинг илк шеърлар тўплами чоп этилишида Тазахоннинг ҳиссаси катта. Шунингдек, китобхон ўқувчилардан Навбаҳор Сарсенбоеванинг ҳам “Тараққиёт кўзгуси” газетаси нашриётида илк шеърлар тўплами нашр этилиб, шеърият ихлосмандларига ҳавола этилди. Тадбир давомида Тазахон Қидирниязованинг шогирди, ҳаваскор шоира мактаб ўқувчиларининг “Китобсеварлик фестивали” Қорақалпоғистон Республикаси босқичи совриндори, 3-даражали Диплом соҳибаси Навбаҳор Сарсенбоева китобхон ёшларга ўзи ёзган шеърларидан ўқиб берди.

Тадбирда “Янги Ўзбекистонинг ибратли оиласи” кўрик-танловининг “Энг китобхон оила бекаси” йўналиши бўйича Қорақалпоғистон Республикаси бўйича ғолиби Тазахон Қидирниязовага иштирокчилар ўзларини қизиқтирган саволларни бердилар. Тазахон Қидирниязова ҳар бир иштирокчининг саволига ҳаётий мисоллар орқали жавоблар берди ва бу билан ўзининг ва оила аъзоларининг китобдан олган бебаҳо ҳикматларга ошна яшаш завқли эканлигини намоён этди. Тадбир ниҳоятда мазмунли ва қизиқарли таассуротларга бой ўтди.

Робия ЙЎЛДОШЕВА.