“ENG KITOBXON OILA BEKASI” BILAN UChRAShUV OʻTKAZILDI

Kitobga mehr – bu oʻz kelajagi uchun mustahkam zamin yaratish sari ezgu qadamdir. Buni dildan his qilgan kitobxon insonlar ham, ularning oila aʼzolari ham yuksak maʼnaviyatli, bilimdon, atrofidagilarning havas va ehtiromiga munosib shaxslar sifatida shakllanadilar. Shu bois, mamlakatimizda kitobxon oilalar safini yanada oshirish, ularning maʼnaviy-tarbiyaviy ishlarini ommalashtirish maqsadida “Eng kitobxon ibratli oila”, “Yangi Oʻzbekistonning ibratli oilasi” koʻrik-tanlovlari oʻtkazilib kelinmoqda.

Amudaryo tumanida ham bunday ibratli kitobxon oilalar koʻpchilikni tashkil etadi. Hatto “Eng kitobxon ibratli oila” koʻrik-tanlovining Oʻzbekiston Respublikasi gʻolib va sovrindorlarining ham borligi qalblarda iftixor tuygʻusini uygʻotadi.

Oʻsib kelayotgan yosh avlodning kitobga boʻlgan mehrini oshirish, kitob mutolaasiga qiziqtirish va ularni maʼnaviyat-maʼrifat maskanlari – kutubxonalarga keng jalb qilish maqsadida joriy yilning 24-may sanasida Amudaryo tumani Axborot-kutubxona markazida 2023-yilning 10-30-mart kunlari kutubxonachilar oʻrtasida oʻtkazilgan “Kitobsevarlik festivali”ning “Eng faol kutubxonachi” yoʻnalishi boʻyicha Qoraqalpogʻiston Respublikasi bosqichi 1-oʻrin sohibasi va “Yangi Oʻzbekistonning ibratli kitobxon oilasi” koʻrik-tanlovining “Eng ibratli kitobxon oila bekasi” yoʻnalishi boʻyicha Qoraqalpogʻiston Respublikasi gʻolibi, Nazarxon ovulidagi Turdimuratovlar oilasi va mazkur oilaning “Eng kitobxon oila bekasi”, mohir kutubxonachi Tazaxon Qidirniyazova bilan yosh kitobxonlarning uchrashuvi boʻlib oʻtdi.

Tadbirda Tazaxon Qidirniyazova kitobxon yoshlar bilan ochiq muloqot tarzida dildan suhbatlashdi. Suhbat asnosida u kitob mutolaasining oʻz hayotida tutgan oʻrni, kitobdan olgan betakror taassurotlari, ayniqsa, hayot sinovlarini yengib oʻtishda unga kitob eng yaqin hamdard, doʻst va masalahatgoʻy vazifasini bajargani haqida hayotiy misollar orqali qimmatli fikrlar bildirdi. Shuningdek, u farzandlari tarbiyasida, hayotda oʻz oʻrnini topib, oʻzi qiziqqan yoʻnalish – kutubxonachilik kasbida faoliyat yuritib, muvaffaqiyatlarga erishishida kitobxonlikning oʻrni beqiyos katta ahamiyat kasb etganini taʼkidladi.

Darvoqe, Tazaxon Qidirniyazova Amudaryo tumanidagi 3-sonli umumtaʼlim maktabi kutubxonachisi. U maktab kutubxonasi faoliyatini yuritish bilan birga kutubxona huzurida “Yosh ijodkorlar” guruhini ham tashkil etgan. Mazkur guruh oʻquvchilaridan Muhabbat Oʻrinbosarovaning ilk sheʼrlar toʻplami chop etilishida Tazaxonning hissasi katta. Shuningdek, kitobxon oʻquvchilardan Navbahor Sarsenboyevaning ham “Taraqqiyot koʻzgusi” gazetasi nashriyotida ilk sheʼrlar toʻplami nashr etilib, sheʼriyat ixlosmandlariga havola etildi. Tadbir davomida Tazaxon Qidirniyazovaning shogirdi, havaskor shoira maktab oʻquvchilarining “Kitobsevarlik festivali” Qoraqalpogʻiston Respublikasi bosqichi sovrindori, 3-darajali Diplom sohibasi Navbahor Sarsenboyeva kitobxon yoshlarga oʻzi yozgan sheʼrlaridan oʻqib berdi.

Tadbirda “Yangi Oʻzbekistoning ibratli oilasi” koʻrik-tanlovining “Eng kitobxon oila bekasi” yoʻnalishi boʻyicha Qoraqalpogʻiston Respublikasi boʻyicha gʻolibi Tazaxon Qidirniyazovaga ishtirokchilar oʻzlarini qiziqtirgan savollarni berdilar. Tazaxon Qidirniyazova har bir ishtirokchining savoliga hayotiy misollar orqali javoblar berdi va bu bilan oʻzining va oila aʼzolarining kitobdan olgan bebaho hikmatlarga oshna yashash zavqli ekanligini namoyon etdi. Tadbir nihoyatda mazmunli va qiziqarli taassurotlarga boy oʻtdi.

Robiya YOʻLDOShEVA.