Иншолар танлови ғолиблари тақдирланди

“Маҳалла” хайрия жамоат фонди Амударё туман бўлинмаси томонидан “Обод маҳаллам” номли грант лойиҳасининг иш режаси бўйича ўринларда турли тадбирлар, учрашувлар, семинарлар ўтказилиб келинмоқда.

Лойиҳанинг асосий мақсади атроф-муҳитни муҳофаза қилиш ва табиий ресурслардан оқилона фойдаланиш, фуқароларнинг ўзини ўзи бошқариш органлари, нодавлат нотижорат ташкилотлари ва фуқаролар билан ҳамкорликда ҳудудларни ободонлаштириш ва кўкаламзорлаштириш, атроф-муҳит муҳофазасига ҳисса қўшишдан иборатдир.

Шунингдек, мазкур лойиҳа асосида мактаб ўқувчилари ўртасида Экологияга оид мавзуларда иншолар танловлари ўтказилиб келинмоқда. Жумладан ўтган йилнинг декабрь ойида Қипчоқ ҳудудидаги мактаблар ўқувчилари ўртасида “Яшил табиатни асраш – ўз қўлимизда” шу йилнинг февраль ойида эса Қиличбой ҳудудидаги мактаблар ўқувчилари ўртасида “Кўчат экиш эзгу анъана” мавзусида иншолар танловлари ўтказилди.

“Тараққиёт кўзгуси” газетаси таҳририяти билан ҳамкорликда ўтказилган бу иншолар танловларида ўқувчилар экология ва жонли табиат ҳақида чуқур билимларга эга эканлигини намойиш этдилар.

Қувонарли жойи шундаки, мактаб ўқувчилари она табиатга бўлган илиқ муносабатларини мўйқалам орқали ҳам ифодалай олдилар. Манғит шаҳри ва шаҳар атрофидаги ҳудудларда жойлашган мактаблар ўқувчилари ўртасида ўтказилган “Табиат ва биз” мавзусидаги расмлар танлови сўзимизнинг далилидир.

Яқинда биз сўз юритаётган “Обод маҳаллам” лойиҳаси асосида аҳоли, айниқса ёшларни табиатга эҳтиёткорона муносабатда бўлиш, табиий ресурсларни тежашга даъват қилиш, уларнинг экологияга оид билимларини ошириш мақсадида “Жайхун илҳомлари” ННТ билан биргаликда Хитой овули ҳудудида жойлашган мактаблар ўқувчилари ўртасида “Мен эккан инҳол” мавзусида иншолар танлови ўтказилди. Бу иншолар танловида ҳудуддаги 13 та умумтаълим мактабларидан ўқувчилар иштирок этишди.

Иншолар танловининг ғолиблари ва совриндорлари бадиий кенгаш аъзолари томонидан аниқланди. Унга кўра, 85-сонли мактабнинг 10-синф ўқувчиси Севинчой Умрбоева “Энг яхши, таҳлилий фикрлари учун” 1-ўринга, 2-сонли мактабнинг 8-синф ўқувчиси Гулҳаё Парахатова “Инсонпарварлик туйғулари улуғланган жўшқин фикрлари учун” 2-ўринга, 68-сонли мактабнинг 10-синф ўқувчиси Машҳура Файзуллаева “Энг яхши, эзгулик тарғиботчилиги учун” 3-ўринга муносиб деб топилдилар.

Шунингдек, 10-сонли мактабнинг 11-синф ўқувчиси Шоҳноза Шеримбетова, 9-сонли мактабнинг 10-синф ўқувчиси Зиёда Собирова иншолар танловидаги “Фаол иштироки учун” совриндорлар қаторидан ўрин олдилар.

Ғолиб ва совриндорларга “Маҳалла” хайрия жамоат фонди Амударё туман бўлинмаси томонидан тайёрланган қимматбаҳо совғалар ва “Фахрий ёрлиқлар” тантанали равишда топширилди.

Ў.Рейимов.