3-сонли МТТда Халқаро болаларни ҳимоя қилиш куни муносабати билан байрам тадбири ташкил этилди
Фарзанд – инсон умрининг мазмуни. Болалар эса инсоният ҳаётининг моҳияти. Улар борлиги учун тамаддун чархпалаги ҳамон айланиб турибди. Кўзимиз қувончи, эртамиз эгаси бўлган болажонларни асраб-авайлаш, комил инсон этиб тарбиялаш ҳар бир ота-она ва оиланинг бурчи, ҳар бир давлат тараққиётини белгиловчи энг муҳим омил саналади.
Бола табассуми – олам безаги. Айниқса, 1 июнь – Халқаро болаларни ҳимоя қилиш кунида сайёрамиз болажонларнинг самимий ва беғубор кулгуси билан янада яшариб кетади. Бу сана қуёшли диёримизда ҳам ўзгача интиқлик билан кутилади.
Азалдан болажон бўлган халқимиз шу куни кундалик ташвишларни бир четга қўйиб, фарзандларини истироҳат боғларию кўнгилочар масканларга олиб боришга ошиқади. Болажонларга турли хил совғалар улашилади. Бу эса оилада меҳр-муҳаббат ришталарини мустаҳкамлашга хизмат қилади.
Сана муносабати билан болажонлар шарафига ўзлари тарбияланаётган мактабгача таълим ташкилотларида ҳам байрам тадбирлари ташкил этилиб, уларнинг қувончига қувонч қўшилмоқда.
Амударё туманининг Чордара маҳалласи ҳудудида жойлашган 3-сонли мактабгача таълим ташкилотида ҳам 1 июнь – Халқаро болаларни ҳимоя қилиш куни муносабати билан байрам тадбири ташкил этилди. Мактабгача таълим ташкилоти ҳовлиси байрамона услубда безатилди. Муассаса директори Холида Шомуратова болажонларни байрам билан самимий қутлаб, уларнинг келгусида Ватанимиз корига ярайдиган муносиб фарзанд бўлиб вояга етишишларига тилакдошлик билдирди.
Тадбирда болажонлар бахтли болалик, тинчлик, она Ватанни тараннум этувчи гўзал куй-қўшиқлар ижро этишди. Ўз тенгдошлари томонидан маҳорат билан ижро этилан куй-қўшиқлар, рақслар ва саҳна кўринишларини болалар мароқ билан томоша қилишди.
Тадбирда сўзга чиққанлар барча болажонларни байрам шодиёнаси билан самимий қутлаб, уларнинг келгуси ҳаётларида улкан зафарлар тилашди, болаларнинг комил инсон бўлиб вояга етишлари учун мамлакатимизда яратилган барча шарт-шароитлар ҳақида тўхталиб ўтишди.
Шунингдек, тадбирда болажонлар эсдалик совғалари билан тақдирланди.
Дарҳақиқат, ота-она учун дунёда болажонлар кулгуси ва шодлигидан азиз неъмат йўқ. Тиниқ нигоҳи ва бийрон тили билан оламдаги жамики ажойиботларни ўрганишга, мушоҳада қилишга уринаётган болакайнинг нурли чеҳрасига боққан ҳар қандай инсон ҳаёт ташвишларини унутади. Фарзандининг саодатли ва бахтиёр дамларини кўриб яшаш ҳар бир инсон умрининг асосий мазмунидир.
Яна бир бора юртимиздаги барча болажонларни 1 июнь – Халқаро болаларни ҳимоя қилиш куни билан самимий табриклаймиз!
Сиз – Ватанимизнинг келажаги, эртанги кунимиз эгаларисиз. Шундай экан, илм-фан, касб-ҳунар сирларини пухта эгаллаб, келажак сари дадил қадам ташланг! Буюк боболаримизга муносиб издош, эл-юртимизга камарбаста авлод, ота-онангиз орзу қилган фарзанд бўлиб вояга етинг, азиз болажонлар!
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
