3-sonli MTTda Xalqaro bolalarni himoya qilish kuni munosabati bilan bayram tadbiri tashkil etildi

Farzand – inson umrining mazmuni. Bolalar esa insoniyat hayotining mohiyati. Ular borligi uchun tamaddun charxpalagi hamon aylanib turibdi. Koʻzimiz quvonchi, ertamiz egasi boʻlgan bolajonlarni asrab-avaylash, komil inson etib tarbiyalash har bir ota-ona va oilaning burchi, har bir davlat taraqqiyotini belgilovchi eng muhim omil sanaladi.

Bola tabassumi – olam bezagi. Ayniqsa, 1-iyun – Xalqaro bolalarni himoya qilish kunida sayyoramiz bolajonlarning samimiy va begʻubor kulgusi bilan yanada yasharib ketadi. Bu sana quyoshli diyorimizda ham oʻzgacha intiqlik bilan kutiladi.

Azaldan bolajon boʻlgan xalqimiz shu kuni kundalik tashvishlarni bir chetga qoʻyib, farzandlarini istirohat bogʻlariyu koʻngilochar maskanlarga olib borishga oshiqadi. Bolajonlarga turli xil sovgʻalar ulashiladi. Bu esa oilada mehr-muhabbat rishtalarini mustahkamlashga xizmat qiladi.

Sana munosabati bilan bolajonlar sharafiga oʻzlari tarbiyalanayotgan maktabgacha taʼlim tashkilotlarida ham bayram tadbirlari tashkil etilib, ularning quvonchiga quvonch qoʻshilmoqda.

Amudaryo tumanining Chordara mahallasi hududida joylashgan 3-sonli maktabgacha taʼlim tashkilotida ham 1-iyun – Xalqaro bolalarni himoya qilish kuni munosabati bilan bayram tadbiri tashkil etildi. Maktabgacha taʼlim tashkiloti hovlisi bayramona uslubda bezatildi. Muassasa direktori Xolida Shomuratova bolajonlarni bayram bilan samimiy qutlab, ularning kelgusida Vatanimiz koriga yaraydigan munosib farzand boʻlib voyaga yetishishlariga tilakdoshlik bildirdi.

Tadbirda bolajonlar baxtli bolalik, tinchlik, ona Vatanni tarannum etuvchi goʻzal kuy-qoʻshiqlar ijro etishdi. Oʻz tengdoshlari tomonidan mahorat bilan ijro etilan kuy-qoʻshiqlar, raqslar va sahna koʻrinishlarini bolalar maroq bilan tomosha qilishdi.

Tadbirda soʻzga chiqqanlar barcha bolajonlarni bayram shodiyonasi bilan samimiy qutlab, ularning kelgusi hayotlarida ulkan zafarlar tilashdi, bolalarning komil inson boʻlib voyaga yetishlari uchun mamlakatimizda yaratilgan barcha shart-sharoitlar haqida toʻxtalib oʻtishdi.

Shuningdek, tadbirda bolajonlar esdalik sovgʻalari bilan taqdirlandi.

Darhaqiqat, ota-ona uchun dunyoda bolajonlar kulgusi va shodligidan aziz neʼmat yoʻq. Tiniq nigohi va biyron tili bilan olamdagi jamiki ajoyibotlarni oʻrganishga, mushohada qilishga urinayotgan bolakayning nurli chehrasiga boqqan har qanday inson hayot tashvishlarini unutadi. Farzandining saodatli va baxtiyor damlarini koʻrib yashash har bir inson umrining asosiy mazmunidir.

 Yana bir bora yurtimizdagi barcha bolajonlarni 1-iyun – Xalqaro bolalarni himoya qilish kuni bilan samimiy tabriklaymiz!

Siz – Vatanimizning kelajagi, ertangi kunimiz egalarisiz. Shunday ekan, ilm-fan, kasb-hunar sirlarini puxta egallab, kelajak sari dadil qadam tashlang! Buyuk bobolarimizga munosib izdosh, el-yurtimizga kamarbasta avlod, ota-onangiz orzu qilgan farzand boʻlib voyaga yeting, aziz bolajonlar!

Tuman hokimligining Axborot xizmati.