Халқ депутатлари Амударё туман Кенгашининг иккинчи сессияси тўғрисида АХБОРОТ

2015 йил 6 февраль куни туман ҳокимлигида Халқ депутатлари Амударё туман Кенгашининг иккинчи сессияси бўлиб ўтди. 

Халқ депутатлари туман Кенгашининг иккинчи сессиясига халқ депутатлари Амударё туман Кенгаши Регламентининг 16-моддасига мувофиқ туман ҳокими топшириғига биноан депутат Рустам Рўзметов раислик қилди.

Сессияга туман Кенгаши депутатлари, ҳоким ўринбосарлари, ҳокимлик масъул ходимлари, ҳуқуқ-тартибот органлари ва бўлимлар раҳбарлари, жамоат ташкилотлари ва оммавий ахборот воситалари вакиллари таклиф қилинди.

Сессия котиблигига 3-"Бойовул” сайлов округидан депутат Нилуфар Давлетова сайланди.

Сессия кун тартибига "Ўзбекистон Республикаси Президенти сайловини ўтказувчи участка сайлов комиссиялари аъзолигига номзодлар тавсия қилиш тўғрисида”ги, "Халқ депутатлари Амударё туман Кенгаши ва Кенгаш доимий комиссияларининг 2015 йилга мўлжалланган иш режаларини тасдиқлаш тўғрисида”ги, "2014 йил 12 ойи давомида жиноятчилик ва қонунийликнинг аҳволи ва бу борада туман прокуратураси томонидан амалга оширилган ишлар юзасидан туман прокурорининг ахбороти тўғрисида”ги ҳамда "Амударё тумани ҳокимининг 2014 йил 17 декабрдаги "Тураев Шерзод Қурбанбаевични туман Ободонлаштириш бошқармаси бошлиғи лавозимига тайинлаш тўғрисида”ги 837-сонли қарорини тасдиқлаш ҳақида”ги масалалар киритилди.

Кун тартибидаги биринчи масала муҳокамасида таъкидланганидек, айни кунларда Ўзбекистон Республикаси Президенти сайлови кампанияси қизғин паллага кирди. Туманимизда ҳам Ўзбекистон Республикаси Президенти сайловига доир ишлар қонун талабларига мувофиқ амалга оширилмоқда. Туман ҳокими томонидан Амударё тумани ҳудудида Ўзбекистон Республикаси Президенти сайловини ўтказувчи 58 та сайлов участкаларини тузиш бўйича тақдимнома берилди. 1-Қорақалпоғистон округ сайлов комиссияси томонидан шу йилнинг 26 январида сайлов участкаларини тузиш тўғрисида қарори қабул қилинди. Депутатларучастка сайлов комиссиялари аъзолигига номзодларни бир овоздан маъқулладилар.

Кун тартибидаги иккинчи масала, яъни халқ депутатлари Амударё туман Кенгаши ва Кенгаш доимий комиссияларининг 2015 йилга мўлжалланган иш режаларини тасдиқлаш тўғрисидаги масала кўриб чиқилиб, туман Кенгаши сессиялари ва 6 та доимий комиссиялар йиғилишларида жорий йилда муҳокама қилинадиган масалаларни ўз ичига олган иш режа лойиҳаси ўқиб эшиттирилди ва депутатлар томонидан тасдиқланди.

Сессияда 2014 йил 12 ойи давомида жиноятчилик ва қонунийликнинг аҳволи ва бу борада туман прокуратураси томонидан амалга оширилган ишлар юзасидан ахборот тингланди.

Ахборот юзасидан туман ҳокими ўринбосари, хотин-қизлар қўмитаси раиси, Қорақалпоғистон Республикаси Жўқорғи Кенгеси депутати Марям Ахмедова, туман ички ишлар бўлими бошлиғининг биринчи ўринбосари Улуғбек Худайберганов, туман Кенгашининг Қонунийлик, ҳуқуқ-тартибот ва фуқаролар хавфсизлигини таъминлаш масалалари бўйича доимий комиссияси раиси Рузимбой Нуримбетовлар ўз фикрларини билдирдилар.

Шунингдек, сессияда Амударё тумани ҳокимининг 2014 йил 17 декабрдаги "Тураев Шерзод Қурбанбаевични туман ободонлаштириш бошқармаси бошлиғи лавозимига тайинлаш тўғрисида”ги 837-сонли қарори депутатлар томонидан тасдиқланди.