МАҲАЛЛА ЁШЛАРИНИНГ ЧИНАКАМ ДЎСТИ

Мамлакат тараққиёти, жамият ривожи, халқимизнинг муносиб турмуш шароитида яшаши ва халқаро майдондаги мавқеининг мустаҳкамланиши ёшлар таълим-тарбияси ҳамда келажагига қаратиладиган эътиборга ҳар жиҳатдан боғлиқ. Шу боис овул ва маҳаллаларда фаолият олиб бораётган етакчилар ҳудуд ёшларининг муаммоларини яқиндан ўрганиб, чинакам дўсти, яқинидаги суянчи ва ишончли ҳамкори бўлишга ҳаракат қилишмоқда, ҳаётда ўз йўлларини топиб олишларига кўмаклашишмоқда.

Янгиобод маҳалласида 378 та хонадонда 2220 нафар аҳоли яшайди. Ҳудудда 3 та умумтаълим мактаби, 1 та давлат мактабгача таълим ташкилоти, 3 та хусусий мактабгача таълим ташкилоти, 1 та IT маркази, 3 та озиқ-овқат дўкони, 1 та техникум жойлашган. Ўтган йили маҳаллада иш бошлаган ёшлар етакчиси Роза Камолова дастлаб уйма-уй юриб, хатлов ишларини амалга оширди. Хатлов давомида 14-30 ёш оралиғидаги ёшлар 505 нафарни ташкил қилишини, ушбу ёшларнинг 72 нафари олий таълимда, 29 нафари профессионал таълимда, 35 нафари бола тарбиясидалиги, 59 нафари расмий ва 129 нафари норасмий бандлиги аниқланган. Ишсиз ёшлар сони 43 нафарни, хорижий давлатларда ишлаш мақсадида кетган ёшлар сони 37 нафардан иборатлиги маълум бўлди.

Ёшлар етакчиси Роза Камолова олдин 82-сонли мактабда ёшлар етакчиси бўлиб ишлаб тажриба орттиргани сабабли қисқа фурсат ичида самарали чора-тадбирларни йўлга қўйиб, кўплаб ёшларга амалий ёрдам беришга улгурди. У ўз ишини биринчи муаммоли ёшлар рўйхатини шакллантиришдан бошлади. “Ёшлар дафтари”га 29 нафар ёшларни киритиб, уларга манзилли ёрдам кўрсатилишини йўлга қўйди. Маҳалла ёшларининг муддатли ҳарбий хизматни ўташи, ҳайдовчилик курсларида ўқиши, “Ёшлар дафтари” жамғармаси томонидан маблағ ажратилишига кўмаклашди. Бундан ташқари, ўз йўналиши бўйича ўзини ўзи банд қилмоқчи бўлган ёшларга субсидия асосида тикиш машинаси ва имтиёзли кредитлар ажратилишини таъминлади. Деҳқончилик қилиш истаги бўлган ёшларга 10 йил муддатга ижарага бепул экин майдонлари ажратиб берилди. Олий таълимда тўлов-шартнома асосида таълим олиб, пулларини тўлашда қийналаётган 12 нафар талаба ёшларга ҳам жамғарма томонидан шартномасида кўрсатилган маблағнинг 50 фоизгача бўлган қисми тўлаб берилишида ёрдам кўрсатилди.

Жорий йилда яна 8 нафар ёшларга турли масалалар бўйича муаммоларини ҳал қилишда яқиндан ёрдам кўрсатилди. Улардан Шаҳло Қодирова имтиёзли кредит олиб гўзаллик салонини ташкил қилди. Шунингдек, 6 нафар талаба-ёшларнинг олий таълимда ўқишлари учун тўлов шартнома пуллари тўлаб берилди. Маҳаллада Шарофат Адилова, Ҳусан Қурбониёзов, Ғофуржон Эгамберганов, Манзура Қодироваларга жами 126 млн. сўмлик имтиёзли кредит олиб, ўзини ўзи банд қилишларига кўмаклашилди. Клара Ражабовага субсидия асосида тикув машинаси олиб берилди. Моддий аҳволи қийин бўлган ёшларни қўллаб-қувватлаш мақсадида Динора Ўрозбоева бир марталик моддий ёрдам ҳамда субсидия асосида электрон печ, Бектурсун Шомуродовга меҳнат қуроллари билан таъминланди. Ўтган йил мобайнида Янгиобод маҳалласида дафтарга киритилган ёшлар учун жамғарма ҳамда тижорат банклари томонидан жами 152 млн. 234 сўмлик маблағлар ажратилди.

Ўзларига яратилаётган имконият ва шароитлардан унумли фойдаланаётган маҳалла ёшлари беш ташаббус олимпиадасида туманда фахрли ўринларни олишга эришишди. “Зукко китобхон” кўрик-танловининг 1-мавсумида Қорақалпоғистон босқичида фаол иштирок этишди, 3-мавсумда эса 2-ўринни қўлга киритиш насиб қилди. Касблар бўйича ўтказилган танловда ҳам маҳалла ёшлари ошпазлик йўналиши бўйича туманда 1-ўринни эгаллади ва Қорақалпоғистон Республикаси босқичига йўлланмани қўлга киритди.

Маҳаллалардаги етакчилар ўзларига билдирилган катта ишончни оқлаш мақсадида ёшларни янги-янги юксак марралар сари бошлашмоқда. Янгиобод маҳалласи етакчиси Роза Камолова ҳам ўз ҳудуди ёшларининг ҳаётда ўз ўринларини топишларида яқин кўмакчи бўлмоқда.

О.Худойберганова.