MAHALLA YoShLARINING ChINAKAM DOʻSTI

Mamlakat taraqqiyoti, jamiyat rivoji, xalqimizning munosib turmush sharoitida yashashi va xalqaro maydondagi mavqeining mustahkamlanishi yoshlar taʼlim-tarbiyasi hamda kelajagiga qaratiladigan eʼtiborga har jihatdan bogʻliq. Shu bois ovul va mahallalarda faoliyat olib borayotgan yetakchilar hudud yoshlarining muammolarini yaqindan oʻrganib, chinakam doʻsti, yaqinidagi suyanchi va ishonchli hamkori boʻlishga harakat qilishmoqda, hayotda oʻz yoʻllarini topib olishlariga koʻmaklashishmoqda.

Yangiobod mahallasida 378 ta xonadonda 2220 nafar aholi yashaydi. Hududda 3 ta umumtaʼlim maktabi, 1 ta davlat maktabgacha taʼlim tashkiloti, 3 ta xususiy maktabgacha taʼlim tashkiloti, 1 ta IT markazi, 3 ta oziq-ovqat doʻkoni, 1 ta texnikum joylashgan. Oʻtgan yili mahallada ish boshlagan yoshlar yetakchisi Roza Kamolova dastlab uyma-uy yurib, xatlov ishlarini amalga oshirdi. Xatlov davomida 14-30 yosh oraligʻidagi yoshlar 505 nafarni tashkil qilishini, ushbu yoshlarning 72 nafari oliy taʼlimda, 29 nafari professional taʼlimda, 35 nafari bola tarbiyasidaligi, 59 nafari rasmiy va 129 nafari norasmiy bandligi aniqlangan. Ishsiz yoshlar soni 43 nafarni, xorijiy davlatlarda ishlash maqsadida ketgan yoshlar soni 37 nafardan iboratligi maʼlum boʻldi.

Yoshlar yetakchisi Roza Kamolova oldin 82-sonli maktabda yoshlar yetakchisi boʻlib ishlab tajriba orttirgani sababli qisqa fursat ichida samarali chora-tadbirlarni yoʻlga qoʻyib, koʻplab yoshlarga amaliy yordam berishga ulgurdi. U oʻz ishini birinchi muammoli yoshlar roʻyxatini shakllantirishdan boshladi. “Yoshlar daftari”ga 29 nafar yoshlarni kiritib, ularga manzilli yordam koʻrsatilishini yoʻlga qoʻydi. Mahalla yoshlarining muddatli harbiy xizmatni oʻtashi, haydovchilik kurslarida oʻqishi, “Yoshlar daftari” jamgʻarmasi tomonidan mablagʻ ajratilishiga koʻmaklashdi. Bundan tashqari, oʻz yoʻnalishi boʻyicha oʻzini oʻzi band qilmoqchi boʻlgan yoshlarga subsidiya asosida tikish mashinasi va imtiyozli kreditlar ajratilishini taʼminladi. Dehqonchilik qilish istagi boʻlgan yoshlarga 10-yil muddatga ijaraga bepul ekin maydonlari ajratib berildi. Oliy taʼlimda toʻlov-shartnoma asosida taʼlim olib, pullarini toʻlashda qiynalayotgan 12 nafar talaba yoshlarga ham jamgʻarma tomonidan shartnomasida koʻrsatilgan mablagʻning 50 foizgacha boʻlgan qismi toʻlab berilishida yordam koʻrsatildi.

Joriy yilda yana 8 nafar yoshlarga turli masalalar boʻyicha muammolarini hal qilishda yaqindan yordam koʻrsatildi. Ulardan Shahlo Qodirova imtiyozli kredit olib goʻzallik salonini tashkil qildi. Shuningdek, 6 nafar talaba-yoshlarning oliy taʼlimda oʻqishlari uchun toʻlov shartnoma pullari toʻlab berildi. Mahallada Sharofat Adilova, Husan Qurboniyozov, Gʻofurjon Egamberganov, Manzura Qodirovalarga jami 126 mln. soʻmlik imtiyozli kredit olib, oʻzini oʻzi band qilishlariga koʻmaklashildi. Klara Rajabovaga subsidiya asosida tikuv mashinasi olib berildi. Moddiy ahvoli qiyin boʻlgan yoshlarni qoʻllab-quvvatlash maqsadida Dinora Oʻrozboyeva bir martalik moddiy yordam hamda subsidiya asosida elektron pech, Bektursun Shomurodovga mehnat qurollari bilan taʼminlandi. Oʻtgan yil mobaynida Yangiobod mahallasida daftarga kiritilgan yoshlar uchun jamgʻarma hamda tijorat banklari tomonidan jami 152 mln. 234 soʻmlik mablagʻlar ajratildi.

Oʻzlariga yaratilayotgan imkoniyat va sharoitlardan unumli foydalanayotgan mahalla yoshlari besh tashabbus olimpiadasida tumanda faxrli oʻrinlarni olishga erishishdi. “Zukko kitobxon” koʻrik-tanlovining 1-mavsumida Qoraqalpogʻiston bosqichida faol ishtirok etishdi, 3-mavsumda esa 2-oʻrinni qoʻlga kiritish nasib qildi. Kasblar boʻyicha oʻtkazilgan tanlovda ham mahalla yoshlari oshpazlik yoʻnalishi boʻyicha tumanda 1-oʻrinni egalladi va Qoraqalpogʻiston Respublikasi bosqichiga yoʻllanmani qoʻlga kiritdi.

Mahallalardagi yetakchilar oʻzlariga bildirilgan katta ishonchni oqlash maqsadida yoshlarni yangi-yangi yuksak marralar sari boshlashmoqda. Yangiobod mahallasi yetakchisi Roza Kamolova ham oʻz hududi yoshlarining hayotda oʻz oʻrinlarini topishlarida yaqin koʻmakchi boʻlmoqda.

O.Xudoyberganova.