КЎЧАБОШЧИ АЁЛЛАР ИШТИРОКИДА ЙИҒИЛИШ ЎТКАЗИЛДИ
Юртимизда оилалар тинч-осойишталигини таъминлаш, аҳоли, хусусан аёл-қизлар учун муносиб турмуш шароитларини яратиш, уларнинг ўз ҳаётларидан рози бўлиб яшашларига эришиш борасидаги чора-тадбирлар изчиллик билан давом эттирилмоқда. Бугунги кунда “Янги Ўзбекистонда эл азиз, инсон азиз” деган эзгу ғоя турмушимизнинг барча соҳаларида ўзининг яққол ифодасини топаяпти.
Ўзбекистон Республикаси Оила ва хотин-қизлар давлат қўмитасининг буйруғига кўра, қўмита тизимида жамоатчилик асосида “Кўчабошчи аёллар” тузилмасининг ташкил этилгани ҳам хотин-қизларнинг мамлакат иқтисодий, сиёсий ва ижтимоий ҳаётининг барча жабҳаларида фаоллигини оширишга, хотин-қизларни ижтимоий ҳимоя қилиш тизимини янада кучайтиришга, уларнинг муаммоларини хонадонбой ўрганиш ва ҳал этишга қаратилгани билан аҳамиятлидир. Ушбу мақсадда республика бўйича маҳаллалардаги хотин-қизлар фаолларига кўмаклашувчи жамоатчилик асосида фаолият юритувчи 111 минг 241 нафар кўчабошчи аёллар рўйхатга олинди. Улар ўзлари истиқомат қиладиган кўчада фаол, кўпни кўрган, бой ҳаётий тажрибага эга бўлган фахрий онахонлардир.
Уларнинг зиммасига ўз ҳудудларидаги оилаларда нотинчликлар юзага келганда бартараф этишга ҳаракат қилиш, бу ҳақда фуқаролар йиғинлари масъулларини хабардор қилиш, аҳоли, ёшлар иштирокида маънавий-маърифий тадбирлар ўтказиш, эрта никоҳ, қариндошлар орасидаги никоҳларнинг олдини олиш, ёшларни оилавий ҳаётга тайёрлаш борасида асосли тарғиботлар олиб бориш юклатилган.
Бутун мамлакатимизда бўлгани сингари Амударё туманининг овул, маҳалла, шаҳарчаларида ҳам кўчабошчи аёллар фаолияти йўлга қўйилди. Кўчабошчи қилиб рўйхатга олинган фаол аёллар ўз ҳудудларида хонадонбой юриш орқали оилавий тадбирларни тартибга солиш, маҳалланинг ички тартибларини тушунтириш, оилалар тинч-осойишталигига хавф туғдирувчи ҳолатларнинг олдини олиш, ўсиб келаётган ёш авлоднинг одобли, маънавиятли бўлиб камолга етишига кўмаклашиш борасида хотин-қизлар фаолларига яқин кўмакчи бўлишаётир.
4 июль куни Манғит шаҳридаги Янгиобод маҳалла фуқаролар йиғини биносида маҳалла Кўчабошчи аёллари билан туман ҳокими ўринбосари, оила ва хотин-қизлар бўлими бошлиғи Гўзал Собурова учрашиб, амалга оширилаётган ишлар, галдаги долзарб вазифалар хусусида суҳбатлашди.
Учрашувда шунингдек, Янгиобод маҳалла фуқаролар йиғини раиси Роман Рўзметов, хотин-қизлар фаоли Моҳира Ўрозбоева, 11 нафар кўчабошчи аёллар, маҳалла фаоллари иштирок этдилар.
Учрашувда туман ҳокими ўринбосари Гўзал Собурова, Янгиобод маҳалла фуқаролар йиғини раиси Роман Рўзметов, хотин-қизлар фаоли Моҳира Ўрозбоевалар кўчабошчи аёллар фаолиятига яхши баҳо беришиб, мамлакатимиз улкан сиёсий жараён – Ўзбекистон Республикаси Президент сайлови арафасида турган бир вақтда уларнинг аҳоли орасида тўғри тарғибот-ташвиқот олиб боришлари жуда муҳим эканлигини таъкидладилар.
Учрашувда кўчабошчи аёллар ўзларига билдирилган ишончни оқлашга сўз беришди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
