KOʻChABOShChI AYoLLAR IShTIROKIDA YIGʻILISh OʻTKAZILDI

Yurtimizda oilalar tinch-osoyishtaligini taʼminlash, aholi, xususan ayol-qizlar uchun munosib turmush sharoitlarini yaratish, ularning oʻz hayotlaridan rozi boʻlib yashashlariga erishish borasidagi chora-tadbirlar izchillik bilan davom ettirilmoqda. Bugungi kunda “Yangi Oʻzbekistonda el aziz, inson aziz” degan ezgu gʻoya turmushimizning barcha sohalarida oʻzining yaqqol ifodasini topayapti.

Oʻzbekiston Respublikasi Oila va xotin-qizlar davlat qoʻmitasining buyrugʻiga koʻra, qoʻmita tizimida jamoatchilik asosida “Koʻchaboshchi ayollar” tuzilmasining tashkil etilgani ham xotin-qizlarning mamlakat iqtisodiy, siyosiy va ijtimoiy hayotining barcha jabhalarida faolligini oshirishga, xotin-qizlarni ijtimoiy himoya qilish tizimini yanada kuchaytirishga, ularning muammolarini xonadonboy oʻrganish va hal etishga qaratilgani bilan ahamiyatlidir. Ushbu maqsadda respublika boʻyicha mahallalardagi xotin-qizlar faollariga koʻmaklashuvchi jamoatchilik asosida faoliyat yurituvchi 111 ming 241 nafar koʻchaboshchi ayollar roʻyxatga olindi. Ular oʻzlari istiqomat qiladigan koʻchada faol, koʻpni koʻrgan, boy hayotiy tajribaga ega boʻlgan faxriy onaxonlardir.

Ularning zimmasiga oʻz hududlaridagi oilalarda notinchliklar yuzaga kelganda bartaraf etishga harakat qilish, bu haqda fuqarolar yigʻinlari masʼullarini xabardor qilish, aholi, yoshlar ishtirokida maʼnaviy-maʼrifiy tadbirlar oʻtkazish, erta nikoh, qarindoshlar orasidagi nikohlarning oldini olish, yoshlarni oilaviy hayotga tayyorlash borasida asosli targʻibotlar olib borish yuklatilgan.

Butun mamlakatimizda boʻlgani singari Amudaryo tumanining ovul, mahalla, shaharchalarida ham koʻchaboshchi ayollar faoliyati yoʻlga qoʻyildi. Koʻchaboshchi qilib roʻyxatga olingan faol ayollar oʻz hududlarida xonadonboy yurish orqali oilaviy tadbirlarni tartibga solish, mahallaning ichki tartiblarini tushuntirish, oilalar tinch-osoyishtaligiga xavf tugʻdiruvchi holatlarning oldini olish, oʻsib kelayotgan yosh avlodning odobli, maʼnaviyatli boʻlib kamolga yetishiga koʻmaklashish borasida xotin-qizlar faollariga yaqin koʻmakchi boʻlishayotir.

4-iyul kuni Mangʻit shahridagi Yangiobod mahalla fuqarolar yigʻini binosida mahalla Koʻchaboshchi ayollari bilan tuman hokimi oʻrinbosari, oila va xotin-qizlar boʻlimi boshligʻi Goʻzal Soburova uchrashib, amalga oshirilayotgan ishlar, galdagi dolzarb vazifalar xususida suhbatlashdi.

Uchrashuvda shuningdek, Yangiobod mahalla fuqarolar yigʻini raisi Roman Roʻzmetov, xotin-qizlar faoli Mohira Oʻrozboyeva, 11 nafar koʻchaboshchi ayollar, mahalla faollari ishtirok etdilar.

Uchrashuvda tuman hokimi oʻrinbosari Goʻzal Soburova, Yangiobod mahalla fuqarolar yigʻini raisi Roman Roʻzmetov, xotin-qizlar faoli Mohira Oʻrozboyevalar koʻchaboshchi ayollar faoliyatiga yaxshi baho berishib, mamlakatimiz ulkan siyosiy jarayon – Oʻzbekiston Respublikasi Prezident saylovi arafasida turgan bir vaqtda ularning aholi orasida toʻgʻri targʻibot-tashviqot olib borishlari juda muhim ekanligini taʼkidladilar.

Uchrashuvda koʻchaboshchi ayollar oʻzlariga bildirilgan ishonchni oqlashga soʻz berishdi.

Oygul RAJABOVA.