Суғориш тизимига янгича ёндашув бўйича фермер хўжалиги рахбарлари, сувчи ирригаторлар, банк ходимларига ўқув семинар ташкил этилди

Ўзбекистон Республикаси Президенти Шавкат Мирзиёев жорий йилнинг 18 апрель куни сув хўжалигида амалга оширилаётган лойиҳалар ва келгусидаги вазифалар юзасидан видеоселектор йиғилиши ўтказган эди. Йиғилиш аввалида сув йўқотилиши, насос станцияларининг энергия истеъмоли кўплиги, сув захиралари камлиги ҳамда сув тежовчи технологиялар билан боғлиқ бўлган 4 та катта масала муҳокама қилинди. Йиғилишда каналларнинг фойдали иш коэффициенти пастлиги ва ички тармоқларда сув кўп йўқотилиши оқибатида қишлоқ хўжалигида йилига 4 миллиард 800 миллион доллар кам даромад олинаётганлиги таъкидланиб, янгича суғориш тизимини жорий қилиш бўйича топшириқлар берилди.

Мазкур топшириқлар ижросини таъминлаш мақсадида Агробанк, Сув хўжалиги вазирлиги ва “Тошкент ирригация ва қишлоқ хўжалигини механизациялаш муҳандислари институти” миллий тадқиқот университети ҳамкорлигида Сувчилар мактаби ташкил этилиб Республикамизнинг барча туманларида жойларга чиққан ҳолда фермер хўжалиги раҳбарлари, сувчи-ирригаторлар, банк ходимларини ўқитиш вазифаси юклатилди.

Амударё туманида ҳам Сувчилар мактабининг тажрибали ўқитувчилари томонидан тумандаги фермер хўжалик раислари, банк ва ирригация бўлими ходимлари учун ўқув-семинар ташкил этилди. Ўқув семинарда Сувчилар мактабини ташкил этишдан кўзланган мақсад ва мактабнинг асосий вазифалари хусусида батафсил маълумот берилди.

Секторлар кесимида гуруҳларга бўлинган иштирокчиларга 3 кун давомида малакали мутахассислар соҳага оид билим ва кўникмаларни бердилар.

Таъкидлаб ўтилганидек, йилдан йилга ҳаво ҳароратининг ва аҳоли сонининг ошиши, ёғин миқдорининг кескин камайиб кетиши ҳисобига сув заҳирларига бўлган талаб ҳам тобора ортиб бормоқда.

Қолаверса, суғорма деҳқончиликда фойдаланадиган сув захираларимизнинг 80 фоизи трансчегаравий дарёлар ҳисобига тўғри келиши, чегара ҳудудларда жойлашган қўшни давлатларда ҳам сувга бўлган талабнинг ошиб бориши сув захираларининг кескин камайишига сабаб бўлмоқда.

Семинар давомида яқин келажакда олдимизда кутиб турган мазкур муаммоларнинг олдини олиш учун амалга оширилиши лозим бўлган чора-тадбирлар хусусида сўз юритилди.

Таъкидлаб ўтилганидек, бунинг учун замонавий суғориш усулларига ўтилиши лозим. Замонавий суғориш усулларидан бири сифатида ёпиқ қувурли суғориш тизимини жорий қилиш ва уни тажрибада синаб кўриш кўзда тутилмоқда.

Айни кунларда ушбу лойиҳа харажатларини қисқартириш, ёпиқ қувурли суғориш тизимини жорий қилиш бўйича икки йиллик дастур ишлаб чиқилмоқда. Президентимиз ўзининг видеоселектор йиғилишида узоқ далаларга сув насос станциялари ёрдамида етказилиши, уларнинг аксарияти эскилиги туфайли электр энергияси истеъмоли жуда юқорилигини, ҳали бирорта ҳам йирик насос станцияси муқобил энергия манбаига ўтказилмаганини, шу боис насос станцияларини хусусий шерикликка бериш, самарали лойиҳаларга қулай шартларда кредитлар ажратилиши йўлга қўйилишини айтиб ўтган эди.

Шунингдек, видеоселектор йиғилишида сел сувларини кичик манбаларда жамғариш мумкинлиги, бу борада ташаббускорларни қўллаб-қувватлаш зарурлиги таъкидланган эди.

Албатта, республикамиздаги барча фермер хўжаликлари оммавий равишда замонавий суғориш методларига ўтаётган бир жараёнда агротехник тадбирлар, молиявий қийинчиликлар юзага келиши табиий.

Сувчилар мактаби томонидан ташкил этилаётган ўқув семинарлари фермер хўжаликларининг юқоридаги каби муаммоларга дуч келмасликлари ва суғориш тизимида янгича ёндашувларни татбиқ этишларида муҳим аҳамият касб этиши шубҳасиз.

Фотима Эшимбетова.