Sugʻorish tizimiga yangicha yondashuv boʻyicha fermer xoʻjaligi raxbarlari, suvchi irrigatorlar, bank xodimlariga oʻquv seminar tashkil etildi

Oʻzbekiston Respublikasi Prezidenti Shavkat Mirziyoyev joriy yilning 18-aprel kuni suv xoʻjaligida amalga oshirilayotgan loyihalar va kelgusidagi vazifalar yuzasidan videoselektor yigʻilishi oʻtkazgan edi. Yigʻilish avvalida suv yoʻqotilishi, nasos stantsiyalarining energiya isteʼmoli koʻpligi, suv zaxiralari kamligi hamda suv tejovchi texnologiyalar bilan bogʻliq boʻlgan 4 ta katta masala muhokama qilindi. Yigʻilishda kanallarning foydali ish koeffitsiyenti pastligi va ichki tarmoqlarda suv koʻp yoʻqotilishi oqibatida qishloq xoʻjaligida yiliga 4 milliard 800 million dollar kam daromad olinayotganligi taʼkidlanib, yangicha sugʻorish tizimini joriy qilish boʻyicha topshiriqlar berildi.

Mazkur topshiriqlar ijrosini taʼminlash maqsadida Agrobank, Suv xoʻjaligi vazirligi va “Toshkent irrigatsiya va qishloq xoʻjaligini mexanizatsiyalash muhandislari instituti” milliy tadqiqot universiteti hamkorligida Suvchilar maktabi tashkil etilib Respublikamizning barcha tumanlarida joylarga chiqqan holda fermer xoʻjaligi rahbarlari, suvchi-irrigatorlar, bank xodimlarini oʻqitish vazifasi yuklatildi.

Amudaryo tumanida ham Suvchilar maktabining tajribali oʻqituvchilari tomonidan tumandagi fermer xoʻjalik raislari, bank va irrigatsiya boʻlimi xodimlari uchun oʻquv-seminar tashkil etildi. Oʻquv seminarda Suvchilar maktabini tashkil etishdan koʻzlangan maqsad va maktabning asosiy vazifalari xususida batafsil maʼlumot berildi.

Sektorlar kesimida guruhlarga boʻlingan ishtirokchilarga 3 kun davomida malakali mutaxassislar sohaga oid bilim va koʻnikmalarni berdilar.

Taʼkidlab oʻtilganidek, yildan yilga havo haroratining va aholi sonining oshishi, yogʻin miqdorining keskin kamayib ketishi hisobiga suv zahirlariga boʻlgan talab ham tobora ortib bormoqda.

Qolaversa, sugʻorma dehqonchilikda foydalanadigan suv zaxiralarimizning 80 foizi transchegaraviy daryolar hisobiga toʻgʻri kelishi, chegara hududlarda joylashgan qoʻshni davlatlarda ham suvga boʻlgan talabning oshib borishi suv zaxiralarining keskin kamayishiga sabab boʻlmoqda.

Seminar davomida yaqin kelajakda oldimizda kutib turgan mazkur muammolarning oldini olish uchun amalga oshirilishi lozim boʻlgan chora-tadbirlar xususida soʻz yuritildi.

Taʼkidlab oʻtilganidek, buning uchun zamonaviy sugʻorish usullariga oʻtilishi lozim. Zamonaviy sugʻorish usullaridan biri sifatida yopiq quvurli sugʻorish tizimini joriy qilish va uni tajribada sinab koʻrish koʻzda tutilmoqda.

Ayni kunlarda ushbu loyiha xarajatlarini qisqartirish, yopiq quvurli sugʻorish tizimini joriy qilish boʻyicha ikki yillik dastur ishlab chiqilmoqda. Prezidentimiz oʻzining videoselektor yigʻilishida uzoq dalalarga suv nasos stantsiyalari yordamida yetkazilishi, ularning aksariyati eskiligi tufayli elektr energiyasi isteʼmoli juda yuqoriligini, hali birorta ham yirik nasos stantsiyasi muqobil energiya manbaiga oʻtkazilmaganini, shu bois nasos stantsiyalarini xususiy sheriklikka berish, samarali loyihalarga qulay shartlarda kreditlar ajratilishi yoʻlga qoʻyilishini aytib oʻtgan edi.

Shuningdek, videoselektor yigʻilishida sel suvlarini kichik manbalarda jamgʻarish mumkinligi, bu borada tashabbuskorlarni qoʻllab-quvvatlash zarurligi taʼkidlangan edi.

Albatta, respublikamizdagi barcha fermer xoʻjaliklari ommaviy ravishda zamonaviy sugʻorish metodlariga oʻtayotgan bir jarayonda agrotexnik tadbirlar, moliyaviy qiyinchiliklar yuzaga kelishi tabiiy.

Suvchilar maktabi tomonidan tashkil etilayotgan oʻquv seminarlari fermer xoʻjaliklarining yuqoridagi kabi muammolarga duch kelmasliklari va sugʻorish tizimida yangicha yondashuvlarni tatbiq etishlarida muhim ahamiyat kasb etishi shubhasiz.

Fotima Eshimbetova.