Халқ қабулхонаси – халқ хизматида

Ўзбекистон Республикаси Президенти ташаббуси билан жойларда ташкил этилган Халқ қабулхоналари аҳоли мурожаатлари билан ишлашда расмиятчилик, сансоларлик каби иллатларни бартараф этишга хизмат қилиб, йиллар мобайнида фуқароларни қийнаб келаётган муаммо ва камчиликларни самарали ҳал этиш имконини бермоқда.

Шунингдек, Халқ қабулхоналарида фуқароларнинг ариза ва шикояти белгиланган тартибда, холислик тамойиллари асосида кўриб чиқилиб, ижобий ҳал этилаётгани мамлакатимизда инсон ҳуқуқ ва манфаатларига олий қадрият сифатида қаралаётганининг амалдаги ифодасидир.

Республикамизнинг барча туман ва шаҳарларида ташкил этилган Халқ қабулхоналари одамлар оғирини енгил қилиш, уларнинг муаммоларини ҳал этишда муҳим аҳамият касб этаётир. Буни Ўзбекистон Республикаси Президентининг Қорақалпоғистон Республикаси Амударё туманидаги Халқ қабулхонаси фаолияти мисолида ҳам кўриш мумкин.

Жорий йилнинг олти ойи мобайнида Ўзбекистон Республикаси Президентининг Виртуал қабулхонасига туман аҳолиси томонидан жами 2 минг 42та масала бўйича мурожаатлар келиб тушган.

Ушбу мурожаатлардан 2 минг 7таси кўриб чиқилган бўлиб, 1 минг 638таси қаноатлантирилган. Мазкур мурожаатларнинг 990таси яъни 49,3 фоизи ижобий ҳал қилинган бўлиб, 633тасига ҳуқуқий тушунтиришлар берилган. 15та мурожаат эса узоқ муддатли назоратга олинган.

Туман Халқ қабулхонасига жисмоний ва юридик шахслардан энг кўп келиб тушган мурожаатлар иш билан таъминлаш, соғлиқни сақлаш, моддий ёрдам ва алимент ундириш масалаларидир.

Асосий мақсади “Халқ давлат идораларига эмас, давлат идоралари халқимизга хизмат қилиши керак”, деган тамойилни ҳаётда қарор топтиришдан иборат бўлган туман Халқ қабулхонаси томонидан аҳолини қийнаётган бундай масалалар ечимига кўмаклашиш мақсадида ўтган давр мобайнида тумандаги сектор раҳбарлари иштирокида жами 112 маротаба сайёр қабуллар ташкил этилди. Қабуллар давомида 651 та мурожаатлар келиб тушган бўлиб, шундан, 454 та мурожаат ижобий ҳал қилинган. 153 тасига эса ҳуқуқий тушунтириш берилган.

Мурожаатлар билан ишлаш борасида йўлга қўйилган тизим, халқ дардини тинглаш ва кўтарилган масалаларни комплекс ҳал қилиш – бугун ўз самарасини бермоқда. Яна ҳам очиқроқ айтганда, Халқ қабулхоналарига келиб тушаётган мурожаатлар жамиятимизда туб ислоҳотларни амалга ошириш учун асос вазифасини ўтамоқда. Ва бу – халқ розилигига эришишнинг мукаммал йўли эканлиги амалиётда ўз исботини топди.

Ўзбекистон Республикаси Президентининг Амударё туманидаги Халқ қабулхонаси ҳам давлат органлари билан аҳоли ўртасида очиқ мулоқотни йўлга қўйиш, долзарб муаммоларни аниқлаш, мурожаатлар қонуний ва сифатли кўриб чиқилишини таъминлашда алоҳида ўрин тутиб, аҳолининг энг яқин кўмакчисига айланди. Мазкур ташкилот халқимизнинг ҳаётдан рози бўлиши учун янада кенг имконият ва шарт-шароитлар яратишга хизмат қилмоқда.

Туман ҳокимлигининг Ахборот хизмати.