МАНҒИТДА ЯНГИ ЁҒ-МОЙ ЗАВОДИ ИШГА ТУШИШ АРАФАСИДА

Бугунги кунда Ўзбекистоннинг хорижий мамлакатлар билан иқтисодий, сиёсий-маданий алоқалари тобора ривожланиб бормоқда. Натижада мамлакатимиз дунёнинг етакчи давлатлари билан ҳамкорликни йўлга қўймоқда.

Айтиш жоизки, ишлаб чиқаришни мадернизациялаш, маҳаллийлаштириш, импорт ўрнини босувчи товарларни ишлаб чиқариш ва кўпайтириш бугунги куннинг асосий талабидир. Бу табиий ресурслар, қишлоқ хўжалиги маҳсулотлари, ишчи кучи мавжуд чекка ҳудудларда ишсизликни бартараф этишда ҳам ўзининг ижобий самарасини беради.

Амударё туманида масъулияти чекланган жамият шаклидаги “Amudaryotex” хорижий корхонаси заводи қошида ёғ-мой ишлаб чиқариш заводи фаолияти ҳам йўлга қўйилаётганлиги туфайли яна 100 нафардан зиёд амударёликлар иш билан таъминланади. Хитой технологияси асосида фаолият юритадиган завод пахта-тўқимачилик кластери сифатида фаолият юритаётган хорижий корхонада қайта ишлаш жараёнида пахтадан ажралиб чиққан чигитдан ёғ-мой ишлаб чиқаришга ихтисослашган.

Айни кунда заводда Жиззах ёғ-мой заводидан келган тажрибали технологлар ва технологияни ўрнатишда иштирок этган мутахассислар иштирокида маҳсулот ишлаб чиқариш жараёни кўздан ўтказилмоқда ва синов тариқасида маҳсулот ишлаб чиқарилмоқда.

Ушбу технологияларни ўрнатишга Инвестиция дастури доирасида 3,5 миллион АҚШ доллари миқдорида кредит маблағи ва “Amudaryotex” хорижий корхонасининг 27 миллиард 339 миллион сўм маблағи сарфланди.

Заводда ўрнатилган технология йилига 10 минг тонна ёғ-мой ишлаб чиқариш қувватига эга ва пахта чигити ёғи, кунгабоқар ёғи, соя ёғи ишлаб чиқариш имкониятига эга.

Заводда айни кунда технологияларни созлаш, ускуналарни синовдан ўтказиш ишлари олиб борилаяпти. Шунингдек, ишга қабул қилинган ишчиларга технологик ускуналар ҳамда иш жараёнларни бошқариш ўргатилаяпти.

Заводда ёғ-мой ишлаб чиқариш учта босқичда, яъни учта цехда амалга оширилади. Энг охирги босқичда маҳсулот тозаланиб, истеъмолга яроқли ҳолга келтиради.

Пахтани қайта ишлашга мўлжалланган масъулияти чекланган жамият шаклидаги “Amudaryotex” хорижий корхонаси йилига 10 минг тонналик ёғ-мой ишлаб чиқариш қувватига эга янги заводни ишга тушириши натижасида юртимиз аҳолисига сифатли пахта, кунгабоқар ва соя ёғини етказиб бериш имконига эга бўлиш бирга, туманимиз иқтисоди юксалишига ҳам муносиб ҳисса қўшади. Шунингдек, юз нафардан зиёд ишсиз фуқароларнинг бандлигини таъминлайди.

Юртимизда бугунги кунда янги ишлаб чиқариш корхоналарини ташкил этиш орқали аҳоли бандлигини таъминлаш, импортни қисқартириш ва экспортни ривожлантиришга алоҳида эътибор қаратилмоқда. Янгидан иш бошлаш арафасида турган ёғ-мой заводи ҳам туманимиз аҳолисининг ҳаёти яна ҳам фаровонлашишига хизмат қилади, албатта.

Ойгул РАЖАБОВА.