БОЙОВУЛ МАҲАЛЛАСИДА ХОТИН-ҚИЗЛАР ИШТИРОКИДА СПОРТ-СОҒЛОМЛАШТИРИШ ТАДБИРИ ЎТКАЗИЛДИ
Юртимизда жисмоний тарбия ва спортни янада ривожлантириш, унинг оммавийлигини ошириш, шунингдек, соғлом турмуш тарзини кенг тарғиб қилишга эътибор тобора кучаймоқда. Барча жойларда аҳолининг, айниқса, хотин-қизларнинг жисмоний тарбия ва оммавий спорт билан мунтазам шуғулланиши учун зарур шароитлар яратилмоқда. Амударё туманида ҳам спорт иншоотлари ва мажмуалари, ўйингоҳлар бунёд этилиб, фойдаланишга топширилмоқда. Овул ва маҳаллаларда эса хотин-қизлар иштирокида турли тадбирлар, мусобақалар ва беллашувлар мунтазам равишда ташкил этилмоқда.
Манғит шаҳрининг Бойовул маҳалласида жойлашган спорт майдончасида маҳалла хотин-қизлар фаоли Ҳуснида Абдураҳмонова ташаббуси билан маҳалла хотин-қизлари иштирокида спорт-соғломлаштириш тадбири ўтказилди. Унда маҳалла аёл-қизлари эрталабки оммавий бадантарбия машқлари ҳамда спортнинг баскетбол, волейбол турлари бўйича машғулотлар амалга оширилди. Тадбирда маҳалланинг кўчабошчи аёллари, фаол хотин-қизлар қатнашдилар.
Мамлакатимизда жисмоний тарбия ва спортни оммалаштириш ижтимоий сиёсатнинг муҳим йўналишларидан бири этиб белгиланган.
Моҳиятан, спорт саломатлик гарови эканини барчамиз яхши биламиз. Шу боис, барча ҳудудларда бўлгани каби туманимизда ҳам спорт билан шуғулланиш оммавий тус олмоқда. Бугунги кунда соғлом турмуш тарзига амал қилаётган юртдошларимиз сони кун сайин кўпайиб бораётгани ҳам фикримиз далили.
Спорт-соғломлаштириш машғулотлари хотин-қизларни қўллаб-қувватлашга доир давлат сиёсатини самарали амалга ошириш, ҳаётдаги роли ва фаоллигини қўллаб-қувватлаш, шу билан бирга хотин-қизларни ҳар томонлама соғлом ва жисмонан бақувват бўлишларини таъминлашга хизмат қилади.
Спорт тадбирларини ўтказишдан асосий мақсад – “Соғлом аёл — соғлом жамият” ғоясини илгари суриш, аёлларни соғлом ҳаёт кечиришга ўргатиш, оналар саломатлигини мустаҳкамлаш, хотин-қизларни спорт учун вақт ажратишга жалб қилишдан иборат. Шунингдек, тадбирда иштирок этишни истаган барча хотин-қизлар учун спорт майдончалари, спорт анжомларидан фойдаланган ҳолда саломатликларини тиклашлари учун барча имкониятлар яратилган.
Иштирокчилар машқлар давомида ўйингоҳ майдони бўйлаб югуриб, турли хил бадантарбия машқларини бажаришди. Сўнгра икки гуруҳга ажралиб, спортнинг волейбол, баскетбол турлари бўйича ўзаро куч синашдилар.
Хотин-қизлар саломатлиги учун қайғуриш ҳар қандай даврда ҳам долзарб мавзу бўлиб келган. Негаки, соғлом авлоднинг дунёга келиши ва камолга етишида аёлларимиз, оналаримизнинг ўрнини ҳеч нарсага тенглаштириб бўлмайди. Шунинг учун улар ўртасида спорт ва жисмоний маданиятни тарғиб этиш,соғлом турмуш тарзининг барқарор бўлишига эришиш бугунги куннинг асосий вазифаларидандир.
Шу маънода олиб қарайдиган бўлсак, меҳнат жамоаларида, овул ва маҳаллаларда ўтказилаётган оммавий спорт-соғломлаштириш тадбирларининг ўрни улкан.
Бойовул маҳалласида ўтказилган спорт-соғломлаштириш тадбирларида ҳам маҳаллада истиқомат қилувчи турли ёшдаги аёл-қизлар иштирок этиб, спорт турлари бўйича ўз иқтидорларини синовдан ўтказдилар ва машғулотлардан кейин жисмонан тетикликни ҳис қилдилар.
Севара Исмоилова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
